Read Karbi NINGDUK ALUN 5 Bible Online

NINGDUK ALUN 5 - Karbi bible

NINGDUK ALUN 5

¹Chemathatha, O HEMPHU, netum kopi cheplang-loma! Netum aphan langtha, lapen netum aphan kelangrem langtha.

²Netum akhi ke cheninepin atum aridengsi lelo. Bang adet asor netum ahem-heihei si dolo.

³Hotur atum netum aphusar atum aphan pathikoilo; lapen non nepei atum pahemelo.

⁴Kejunji alang aphan netum anam pinangji; me kechothor aphan theng nam nangji.

⁵Gadha lapen ka-ut aphan asonsi phlung pangtang-lo, netum laktang-lo, bonta kesangji aphan bida thothe.

⁶Dorphlup a-an kelong pen kerengverlongji aphan netum Ijip lapen Assiria adet damsi chorekdamlo.

⁷Netum aphusar atum pap klemlo, bonta non halatum avelo, lapen halatum apap apot netum sungnang-lo.

⁸Ban penta kehingno amonit atumsi netum aphan pangrilo lapen halatum ajakong pen netum aphan baduta pajok un-e-lo.

⁹Arong arongta pran karmut atum juiprelo, An kechori ahut netum apran chemathe the det-lo.

¹⁰Kangchir netum aphan pasodet-lo, kedang kepasotang aphule ason netum areng sodakdetik-lo.

¹¹Zaion anglong along amat nepiso atum aphan chonep-lo; Judia arongtinta netum asopimar atum atoi un-esi abang chehodainang-lo.

¹²Netum akejalin atum aphan pondetsi kokthat-ot-lo; Netum akesar amonit aphan thang aman pipe.

¹³Ban asonsi nerisomar atum aphan sang pakoi bor-itoilo; pinsomar atum theng arpu kardik-ongsi kedam krep-ringrang-lo.

¹⁴Akesar atum rongsopi anghap along ingni vangve, risomar atum kum-pongsi arki padode.

¹⁵Netum akai pen ning a-ong katjuilo; netum kekan along ningduksi dolo.

¹⁶Netum kechepindak iji ason thangnat ta bi tekangkedet-lo, netum pap klemlo lapen non netum kejut-lo.

¹⁷Netum aning-heihei keso longtang-lo lapen mekri-mek-lang pen chechar-o-edet-lo.

¹⁸Pima Zaion anglong isivet donanglunsi pangsamrilo, lapen ingnam aserung atum lahei akerutang ajo juijamlo.

¹⁹Bonta O HEMPHU, Nang kaike aphan arecholo, lapen kejut apor an ta Nangsi pangrilo.

²⁰Kopi athesi pu-an ajirkeding Nang netum aphan o-loma? Nang netum aphan puthot chemathathe-jilangma?

²¹Hemphu, netum aphan puthot Nanglong nepontha! Netum aphan puthot nepontha! Hako netum anong pavangthutha.

²²Mate Nang netum aphan obupver poma? Nangli ningkethi ahoi aveloma?