Read Karbi EZEKIEL 1 Bible Online

EZEKIEL 1 - Karbi bible

EZEKIEL 1

¹Thomkep aningkan , phli achiklo, niphai pho arni, neli, Ezekiel kurusar, Buzi asopo, Judia amonit, ban kepontang atum penpen Bebilon along Kebar Aroi akung dolo. Sining-inghun chingpudang-lo, lapen neli Arnam aphan mek-rengjeng ahut thek-long-lo.

²(Lake Jehoiachin Recho aphan ban kepontang pho aningkanlo.)

³Hadak Bebilon along Kebar Aroi akung, HEMPHU neliphan kepu alam arjulong-lo lapen alangli jakong neli chechinilo.

⁴Neli angsong lang-lo, lapen nirep pen tomon thepi kevang thek-long-lo. Inghun angsomthepi pen sining kebirlak ame turphlak-lo sining-inghun adang bithe the-angdang-lo. Sining kebirlak adim pen bitoi ason etjolo.

⁵Tomon-thepi angbongchitim along monit asonthot jonphli kereng-et api ne thek-long-lo,

⁶bonta ajontinta amahangphli do lapen avengkong phli do.

⁷Latum akeng kengson, lapen chainong alo atum asonthak thaksi akengpak do. Lahei kangthiphlan abitoi ason doilor.

⁸La amahang phli lapen avengkong phli aparta, latum ajontin monit ari hongphli do, ahongtin avengkong aber dolo.

⁹Ajontin api avengkong pakni chepurlo lapen avengkong angchun pachechusi atok-phli avaikang pinchong-lo. Latum klem seta angdi isi klemsi abang chetevarve pinlo.

¹⁰Ajontin kereng-et api akaprek kaprek amahang phli dolo: Angno monit amahang ason, ar-e anat ejon ahingho amahang ason, arvi anat chainong amahang ason, anung anat vomu amahang ason.

¹¹Ajontin api avengkong angchun chirungsi adung api avengkong angchun papholo lapen latum avengkong pakni abang chedip-lo.

¹²Ajontin apita ahin kaprek kaprek anatsi pangnolo, anke laso asong aninghang aling abang chetevarvepin pen dam unpo.

¹³Pi atum angbong , keturbong athengtom ason do, klem-voivai-ver. Me tur-angsi sining birlakpo.

¹⁴Sining kebirlak anat pi atum klemphrophra damvoivaipo.

¹⁵Pi jonphli aphan neli kelangding un ahut kongtelong dangphli longle paphoklok neli thek-long-lo, lahei kedo chepadunron.

¹⁶Kongtelong dangphlita ejatvet; adangtinta adorkeso a-arlong asonsi turbongbang-lo, lapen adangtinta ar-e kechetok anat kongtelong kaprek pacheropdun dolo,

¹⁷anke adang-heihei atok-ano-phli anatta dam unpo.

¹⁸Adang-heihei athak mek-heihei top-thip.

¹⁹Pi atum kedam ahut akongtelongta dunpo, lapen longle pen pi atum thur lote kongtelongta dunpo.

²⁰Pi atum aningkehang alingsi damlo, lapen kongtelong ta pi atum keklem atengthotsi klemlo, pima latum aphan pi atumsi ot-lo.

²¹Lasi pi atum kecheterek aphongtin mate kesang mate inghun athak karlu aphongtin, kongtelongta lasonthotsi klemdunlo.

²²Pi atum aphu athak kedoilor a-arlong pen keselam kebuilun nangnak aphuchong dolo.

²³Hala kebuilun aphuchong arumsi pi atum dolo, ajontinta avengkong pakni adung kedo anat chepurlo lapen avengkong pakni ke abang chedip-lo.

²⁴Latum kangjar arki neli arjulong-lo; la arki talo arki ason, ke-ongdung aron-armu arki ason, jakongkethe Arnam ase ason. Latum kangjar kangtonkok ahut, latum arveng cheduphlup-lo,

²⁵bonta latum kebuilun aphu athak aphuchong angsong pen arki vangbomlang.

²⁶Kebuilong aphuchong athak hadak arlong-chething-kelir pen keselam anghoi nangnak isi do, lapen inghoi athak inut amonit arje nangnak ingnilun;

²⁷Me angkang angbong tam-angchin nangnak kephlandong arje do. La bithe bitha keturbong pen pathe-angdang-lo,

²⁸mukak arong kedo-an la along dolo. La ke HEMPHU adak-atur kedo keturbong akethe-ang-lo. Neli la thek-longsi, longle athak neli kengphu patongruisi ardomkhrup-lo. Anke neli ase arju-long-lo, lapen pulo.