Read Karbi EZEKIEL 11 Bible Online

EZEKIEL 11 - Karbi bible

EZEKIEL 11

¹Arnam akarjong neliphan nerungtang-lo, lapen Kardom-hemthepi anghap nihang anat nepondet-lo. Hadak inghap adung bang ingkoirapho pinso amonit ne thek-long-lo, halatum angbong Azzur asopo, Jaazaniah lapen Benaiah asopo Pelatiah, banghini det ajalinlo.

²Neliphan Arnam pulo, “Monit aso, lahei amonit atum kehingno akam mang-lo, lapen laso arongsopi arlo kehingno abidi pilo.

³Latum pulo, ‘Ili puthot hem-heihei kimthulong dapprangji. Rongsopi ke isi ketun aphule asonlo, lapen ilike la along a-ok asonlo, bonta jongheseta la me pen ephan erailo.’

⁴Non lasi latum aphan pu-ak non, monit aso.”

⁵Arnam akarjong neliphan borlo, lapen rat aphan kepapijisi HEMPHU laso abirta nethanlo: “Israel arat atum nangtum kopima kepuji lapen kopima nangtum kemang Ne chini.

⁶Nangtum ongdung arat aphan laso arongsopi along lapu-an pran armut-lo, tovarpi-heihei along kethi arpumsi plengset-lo.”

⁷La apotsi Ne klem-un a-HEMPHU lahelo nangtum aphan kepuji alamthe. Ahok-lo laso arongsopi ke isi ketun aphule lo, bonta ok komat-lo? Nangtum pran karmut kethi arpum! Nangtum dak dolongle, nangtum aphan ne rongsopi angtan nangvarchorji!

⁸Nangtum nokjir aphan phererema? Nangtum aphan kepatengkheng-jisi anokjir penpen monit Ne vanji.

⁹Nangtum aphan ne rongsopi angtan nangpondetji lapen nangtum aphan bang adet aso arideng nanghodaidetji. Nangtum kethiji aphansi ne nangpulo,

¹⁰lapen nangtum nangmethang adet along amat ron chedansi thinangpo. Anke Ne helo HEMPHU-lo pu abangphutinta chinipo.

¹¹Phule arlo kedo a-ok aphan phule kerai ason laso arongsopi nangtum aphan nang raire. Israel arlo nangtum nahok-le do setame nangtum aphan Ne aduk nangpiji.

¹²Ne helo HEMPHU-lo pu nangtum chinipo lapen nangtum adung arei adet aron-heihei kekroi lake Ne aron-heihei kephrilo lapen Ne hukum-heihei kekroikrelo.

¹³Neli kemontribom ahut, Pelatiah krepbubsi thilot-lo. Neli longle domkhrupsi hangserlo, “Kali, klem un a-HEMPHU! Israel along ahin arat aphan nangli pathi-etpoma?”

¹⁴Neliphan HEMPHU pulo,

¹⁵“Monit aso,” Alangli pulo, “Jerusalem along kedo arat atum nanglam lapen nangjeng-jati ban kedam Israel aso alam chethanlo.” Latum pulo, “Ban kedam atum HEMPHU aphan karchoji kedo helo-ongchot. Alangli ilitum aphan det epilo.”

¹⁶Non, nangjeng-jati ban kedam atum aphan chethannon pu kepu tang alam. Ne si latum aphan kehelo adet padotoilo lapen akaprek adet atum angbong papratseilo. Tebonseta, malomso aphan latum kedam adet-heihei along dodunji.

¹⁷Lasi latum aphan, Ne klem un a-Hemphu-si kepulo pu ra than non. Ne kepapratsei adet-heihei pen latum aphan pangrumji, lapen latum aphan Israel adet pithuji.

¹⁸Latum nangkecherui ahut latum kangthirthe an, latum kelang kehijimmeme akumlin-heihei an che-o nangpo.

¹⁹Latum aphan Ne ningkemi lapen angthin kemi piji. Latum kebuikluihak arlong aning varchorpo lapen kekroithek aning latum aphan pipo.

²⁰Anke latum Ne aron-heihei kroipo lapen Ne hukumhei hei an kroithip pen kroithekpo. Latum Ne rat aso plangpo, lapen Ne latum a-Arnam plangpo.

²¹Bonta kangthirthe lapen kehijimmeme akumlin-heihei an aphan kardomji aningkehang arat atum aphan Ne aduk piji. Latum keklemtang akam apot Ne aduk piji. Klem un a-Hemphu-si ningjelo.

²²Kereng api kangjar cheng-lo, lapen kongtelongta latum along dunlo. Israel a-Arnam kedo angthek keturbong atur latum aputhak dolo.

²³Anke keturbong atur rongsopi olo, lapen inglongpi anihang anat cheterekjuilo.

²⁴Mek-rengjeng un ahut Arnam akarjong nerungtang lo lapen Bebilon adet ban kedam adim nevandet-lo. Anke kethek-long jutkok-lo,

²⁵lapen neliphan HEMPHU nepaklang alam an ban kedam atum aphan than-et-lo.