Read Karbi EZEKIEL 12 Bible Online

EZEKIEL 12 - Karbi bible

EZEKIEL 12

¹Neliphan HEMPHU nepulo.

²“Monit aso,” alangli pulo, “Nang kethurkrap arat angbongsi kedo. Latum amek do seta latum thangnatta thek-longle latum ano do seta thangnatta latum arjulongle, pima latum thurkrapverlo.”

³Non, Monit aso, kekat chepachong abang ason telup isi chetelupnon, lapen ningveve ako dam pangchengnon. Abangphutinta nang ke-o lapen along kaprek kedam nang pathek-longpet nang. Lahei kethur krap atum nangphan nang mathadunji tahai.

⁴Anerlole ban kedamji aphan chetelupnon, anke latum nangphan nangthek dunlongpo, lapen latum arnikangsam nang ke-o nangpalang dunlonang, ha ban kedamlo pule pamathanang.

⁵Latum nangkelang dun ahut, nanghem arpong angkok isi etvang non lapen la anat penle nangtelup ennon.

⁶Latum nangphang athak nangtelup kechebat lapen nangmek chephunghet pen ajo kedam ason nangpathek dunlong nang, anke nang konatma kedamji latum nangthek dun longlelo. Nang keklem an la ke Israel aso aphan isi pacheretoi lo.

⁷Neliphan HEMPHU nepaklemtoi akam an neli klemlo. Kekat chepachong abang asonsi halaso arni neli chetelup-lo, lapen halaso arnikangsam kangting ahut neliri pen arpong along isi ahilik hut-lo, lapen barlo. Kadokave nelangdungphrong ahut, atelup nephang athak chebatsi damlo.

⁸Puthot adap neliphan HEMPHU pulo,

⁹“Monit aso,” alangli pulo, “Non nang kopisi keklemloma pu hala kethurkrap a-Israel atum nang arjulote,

¹⁰latum aphan Ne keklem un a-Hemphu-si latum aphan kepulo pu thannon. Laso abirta lake Jerusalem kepangri arechoso lapen hadak kedo arat kedo-an aphanlo.

¹¹Nang kopima keklem lake latum aphan kopi plang poma pu isi angthek-lo pu thannon, latum chepachong nangpo lapen ban donangpo.

¹²Latum aphan kepangri arechoso abang amethang atelup kangting ajo cheparphangsi laphan latum arpong kehong angkrak pen la katpo. La amek chedipthippo lapen la konatsi kedamloma thek-longledetpo.

¹³Bonta Ne lan pur si la pen Ne nepchek po. Anke la aphan Ne ha Bebilon pondetpo, lapen amek checharchepin pen la hadak thipo.

¹⁴La kangsai abangphu atum lapen bidisore kepi abang lapen angphun kerai abang, atum aphan bithe bitha papratseiji, lapen latum aphan kepathijisi monit atum rivungpo.”

¹⁵Bang adet kaprek akhei atum angbong Ne latum aphan kepapratsei ahut Ne ajehak aphansi pareng-longchotji, anke khei atum angbong latum akam ko-an hijimeme loma chechinipo lapen Ne helo HEMPHU-lo pu chinipo.

¹⁶“Bonta ne halatum ajehak aphan nokjir kephonangji pen pajokji, avur lapen akhim penta pajokji, anke latum det kaprek angbong kedam aling ahut amethang akehingno an chekobirpo, lapen Ne helo HEMPHU-lo pu latumchinipo.”

¹⁷Neliphan HEMPHU pulo,

¹⁸“Monit aso,” alangli pulo, “Kecho ahut nang klemhurnon, lapen kejun ahut kephere klemhurnon.

¹⁹Jerusalem along kedo-an arat aphan keklem un a-HEMPHU abirta lahelo pu ra thannon: Latum kecho ahut klemhurji lapen kejun ahut latum kephere klemhurji. Latum adet samphridangpo, pima hadak kedo abangphutin ta aron kroikre.

²⁰Non monit keplengset arongsopi-heihei an pavirklungji det isi kejejangtang ajo paplangpo. Anke latum Ne helo HEMPHU-lo pu chinipo.”

²¹Neliphan HEMPHU pulo,

²²“Monit aso,” alangli pulo, “Laso asarlamthe rat atum kopisi kepubomlo: ‘Apor dambomlo, seta kemontri alam chekok ke?’”

²³Laso aputhak klem un a-HEMPHU kopi pu poma latum aphan thannon. Laso asarlamthe Ne pajutkokpo. Israel atum angbong mo nonphi seta chethan vangvedetpo. La alar latum aphan thannon: Apor nanglelo, lapen kemontri alam nangchekokbomlo!

²⁴Israel atum angbong kethek-longtap mate kejatap amontri avedetji.

²⁵Ne, HEMPHU si latum aphan ningjepo, lapen Ne kepu alam ateng klempo. La paderdelo. Nangkai arjon nang thurkrap-lo, Ne nangpacheretoi alam kopi plang poma la Ne klempo. Ne si kepulo, pusi klem un a-Hemphu-si kepulo.

²⁶Neliphan HEMPHU pulo,

²⁷“Monit aso, nang kethek-long lapen kemontri-heihei ke helopik lang pusi Israel atum mathalo.

²⁸La apotsi Ne klem un a-Hemphu-si latum aphan kepulo pu thannon: Paderde lo. Ne kepu alam klemvekpo. Ne, HEMPHU-si kepulo!”