Read Karbi EZEKIEL 13 Bible Online

EZEKIEL 13 - Karbi bible

EZEKIEL 13

¹Neliphan HEMPHU nepulo.

²“Monit aso,” alangli pulo, “Israel amontri atum amethang pen kemontritap alam hili dunnon. HEMPHU alam karjujile latum aphan thannon.”

³Keklem-un a-HEMPHU lasonsi kepulo: Lahei kelu amontri atum kevirlo! Latum amethangsi aning cheparungbom lapen latum methang akethek-long-heihei cheselambom.

⁴Israel arat atum, nangmontri atum ke kerutang rongsopi ajo kedo asirung atum asonsi amovangvelo.

⁵Latum arpong-heihei keru adim tonte mate arpong-heihei kimthuthe, lasi HEMPHU arni kevang ahut Israel atum cheraidun thekthe.

⁶Latum kethek-long-heihei ahok kali lapen latum kepumek-heihei pachobeichot. Latum ne birtasi keningje lo pu chepu, bonta Ne latum aphan toite. Seta latum alam kechekokji aphan latum aning chethe!

⁷Latum aphan Ne pulo: Nangtum akethek-long-heihei ahok kali, lapen nangtum kepumek alam-heihei chobeilo. Lahei nelamlo pu nangtum pulo, bonta Ne nangtum aphan nangpulongle!

⁸La apotsi keklem un a-HEMPHU latum aphan pulo, “Nangtum alam hei hei ahok kali, lapen nangtum akethek-long-heihei ta chobeichot lo. Ne nangtum abe thurlo.

⁹Nang ahok-he akethek-long lapen kechekok ke kemontri apot montri atum aphan Ne aduk kepiji dokdok-lo. Nerat atum lam kepharji kechingrum ahut nangtum hadak avedetji; Israel asanchom amen angbong nangtum amenta parloponpedetpo; nangtum jonghe seta nangdet chevoidunthu longlelo. Anke Ne helo keklem un a-HEMPHU lo pu nangtum chinipo.”

¹⁰Kadokaveta mesen pu thanbomsi nerat aso aphan montri atum japon tap-lo. Ahokpet pen kadokave mepet kali! Nerat aso angbong angsong arlong-heihei bat si paklorang-lo, lapen montri atum vangsi la aputhak saini hithip-lo.

¹¹Montri atum aphan than non halatum arpong krepdappo. Ne arvepi paklotoipo, la athak herai klopo, lapen la aputhak tomonpi jappo.

¹²Arpong ruhupsi nangtum aphan saini kehichot kopi ale kedolo pu abangphutin ta nang arjuhurpo.

¹³Non Klem-un a-HEMPHU lasonsi pulo, Nening thihaksi tomonpi, arvepi, lapen paisong kepavirjisi herai nangtoipo.

¹⁴Latum saini kehi apaisong Ne keparuji ninghang-lo, la hijikjamji lapen aputah angse padolongji. La ru si nangtum kadokave aphanta pathipo. Anke abangphutin ta Ne helo HEMPHU-lo pu chinipo.

¹⁵Paisong lapen la saini pen kedipthip atum nening kethi akup phopo. Anke Ne nangtum aphan nangthanpo, paisong avelo, lapen la saini kevit atum ta avelo, lapen

¹⁶Jerusalem mesenlang pu aning kepathe amonit atum anta athema kadokave mepetpe! la keklem un a-Hemphu-si kepulo.

¹⁷HEMPHU pulo, “Non, monit aso, nang rat atum angbong kepumek a-arloso atum aphan langtha Latum aphan hilidunnon.

¹⁸Latum aphan keklem un a-HEMPHU kopisi kepuma thannon:” Nang arloso atum kevirlo! Nangtum mekbin ahonjeng abangphutin aphan kok-lo, lapen abangphutin aphan atehang along kepachekok-i mekbin ari-heihei selamlo, anke latum akaprek amonit aphuthak kehaiji ajakong dopo. Nangtum chethe lapen kethi ajakong ne rat aphuthak kechepahemphuji ninghang-lo, lapen lahei nangtum methang ale aphansi klemlo,

¹⁹Asapbak soktipliso lapen ajehak ahim achet kelongji aphan nangtum nerat atum angno Nephan nelangplot-lo. Kethiji a-ot kave abangphan nangtum pathi lapen kerengji a-ot kave atum aphan nangtum pareng-long-lo. La apotsi nangtum nerat aphan pachobeilo, lapen latum nangtum alam kroilo.

²⁰Non keklem un a-HEMPHU lasonsi pulo, “Honjeng kekok Ne hijimlo, la pensi nangtum kethi-kereng kekhangji bor-ilo. Nangtum ari pen Ne lahei pondetji lapen nangtum kekhang arat aphan pajok-phlotji.

²¹Nangtum atehang ari Ne pavedetpo, lapen kaike aphan nangjakong pen ne rat aphan pajokpo. Anke nangtum Ne helo HEMPHU-lo pu chinipo.”

²²Ne aning pa-oi ingtungte bonta nangtum kechobei pen ajok keme arat aning nangtum parunlo. Kehingno amonit atum kehingno akam keche-o pen nangtum khang-lo, lapen latum apran pajok-lo.

²³Lasi non nangtum ahok-he akethek-long-heihei lapen kepasaitap akemontri-heihei juttang-lo. Ne rat aso aphan nangtum arideng pen Ne pajok-lo, anke Ne helo HEMPHU lo pu nangtum chinipo.