Read Karbi EZEKIEL 14 Bible Online

EZEKIEL 14 - Karbi bible

EZEKIEL 14

¹Ajehak Israel ajalin atum nelong vangsi HEMPHU aningkehang alam ne arjulo.

²Anke neliphan HEMPHU nepulo.

³“Monit aso,” alangli pulo, “Lahei amonit atum kumlin-heihei aphan aning chepidet-lo, lapen kumlin latum aphan kumlin pen pap anat japonlo. Latum matha loma Ne latum aphan thakpo pu?”

⁴Non latum aphan thannon lapen latum aphan Ne keklem un a-HEMPHU kopisi kepuma thannon: Kumlin-heihei aphan aning kechepi a-Israel aso abangphutin lapen la aphan pap kejapon atum lapen montri inut along vangpen karju abangphutin Ne pen kethak longji, putong mathama lake la ke-ongdung akumlin kethak kelongji a-ot.

⁵Lahei akumlin an Ne pen Israel aso aphan pasuilo, bonta Ne akethak pen ajok latum akekroi Ne kelongthuji ning kethe do.

⁶Non lasi, Ne keklem un a-HEMPHU Israel atum aphan kopisi kepuma than non: Nang chevoira nangtum kehijimmeme akumlin-heihei che-o non.

⁷Inut a-Israel mate Israel asong arlo kedo inutbak bang adet aso jongsi Ne pen suisi kumlin-heihei ardom lote lapen monit inut bak aphan arjudamlote, la aphan Ne, HEMPHU-si thakpo!

⁸La aphan Ne hilipo. La abang isi a-arjan paplangpo. Ne rat asong pen la aphan Ne batdetpo, anke nangtum Ne helo HEMPHU-lo pu chinipo.

⁹Ahok-he akethak pen ajok inut amontri jongsi pachobei lote pima lake Ne HEMPHU-si pachobeitoilo. Israel arat pen Ne la aphan bad detji.

¹⁰Montri lapen la aphan karju abang aphan penpen isivet aduk kepho longrappetpo.

¹¹Lake Israel atum nephan neke-oji pen lapen halatum apap pen ajok kepasa-ur pen kekhangji aphan Ne klempo. Latum Ne rat plangpo, lapen Ne latum a-Arnam plangpo. Keklem un a-Hemphu-si kepulo.

¹²Neliphan HEMPHU pulo,

¹³“Monit aso,” alangli pulo, “Isi adet pap klemlote lapen nephan kroithipthe lote, nerijardingsi la a-an kelong pavirklungpo. Akhim Ne toisi rat lapen marat api aphan anta pathi etpo.

¹⁴Latum bangkethom Noah, Daniel lapen Job atumle hadak do seta, latum adhoromipet a-ot amethang aphansi chepajok thekchotpo. Keklem un a-Hemphu-si kepulo.”

¹⁵Mate rat aphan kepathijisi Ne marat api toi tahai, det adang lapu-an pherememeji baduta laso adak helat abang avedetji,

¹⁶lapen jongsi hala bangkethom amonit atum hadak do setame, Ne Keklem un a-HEMPHU, Kereng-et a-Arnam, ahoksi kepulo, latum amethang asomar aphan anta chepajok un-e. Latum amethang achethesi chepajok thekchotji, lapen det isi kangthaidang adim plangpo.

¹⁷Mate laso adet aputhak Ne ron van tahai lapen monit lapen pi atum aphan kepavedetjisi kevirklung arisim nangtoi tahai,

¹⁸lapen jongsi hala bangkethom amonit atum hadak do setame, Ne, keklem un a-HEMPHU, Kereng-et a-Arnam ahoksi kepulo, latum amethang asomar aphan anta chepajok un-e, bonta halatum amethang akai aphan si chepajok un chotji.

¹⁹Halaso adet aputhak Ne avur toilote Nening kethi apot ke-ongdung apran pondetpo, monit lapen marat api antalo,

²⁰jongsi Noah, Daniel, lapen Job atumle hadak do setame, Ne, keklem un a-HEMPHU, Kereng-et a-Arnam ahoksi kepulo-latum amethang asomar aphan anta chepajok un-e. Latum adhoromipet a-ot amethang aphansi chepajok unchotji.

²¹Keklem un a-HEMPHU lasonsi kepulo, “Jerusalem aputhak Ne, kehingnonei sonphli aduk kepi ason, ron, akhim, marat api atum, lapen keso-rat atum lapen pi atum aphan kepavirjisi nangtoipo.

²²Badutame jongsi inutbak renglang pulote, lapen asomar aphan pajok-lo pulote, latum nangtum along kevang ahut latum aphan langnon. Langnon latum ko-an kehingnoma, Ne latum Jerusalem aputhak aduk kepi ke chelonchit-lo pusi chinipo;

²³anke nangtum chinipo Ne keklem asontinta athe mesen do.” Keklem un a-Hemphu-si ningjelo.