Read Karbi EZEKIEL 16 Bible Online

EZEKIEL 16 - Karbi bible

EZEKIEL 16

²“Monit aso,” alangli pulo, “Bangpi kopi kehijim meme akam klemloma Jerusalem aphan thannon.

³Bangpi aphan keklem un a-HEMPHU kopisi kepuma thannon:” Nangtum Kanaan adetsi mahangthek-lo. Nangpo ke inut Amor asolo lapen nangpi ke inut Hitti-pi lo.

⁴Nang mahang kethek ahut nang chete kerot abang baduta ave mate cham abang ave, mate ingti nanghi dun abang ave mate pe pen nangtelom abang ave.

⁵Nangphan lahei keklemji aphan baduta nangphan jinso abang ave. Nang mahang kethek ahut, nangphan baduta nang kanghon abang ave. Nangphan hidi tar tar ajo nangvarchorlo.

⁶Anke ne damput-lo, lapen nangphan nangvi aphik pen kechardak thek-long-lo. Vi si nangphan dipthip-lo, bonta ne nangphan pathitoitelo.

⁷Nangphan Ne thengpi kechingjok asonsi pathebomlo. Nang ingtang lo lapen ajonta ding-lo lapen inut animsopi plang-lo. Nangmok thepamelo, lapen nangchu ding-lo, bonta nangreng angselo.

⁸Ne puthot kedamthu aphong, halaso aphong ke nangpen ning keche hangjisi Ne vang-lo. Nangreng angse Ne choi pen nangbang nangdip-lo lapen nangphan ning nangdokpo pu chechak-lo. Kalang-lo, nang pen Ne angbong kechepangri akechejok aloh chetok-lo, lapen nang Nemar plang-lo. Lasonsi keklem un a-HEMPHU kepulo.

⁹Anke Ne lang enlo lapen nangvi cham et-lo. Nangreng jit ajangthu pen hilo.

¹⁰Keroi achoikeding ne nangpachingthang-lo lapen kemenei a-ok-reng akeng-op, chu kechekok ape kanglit isi lapen honki ape epak Ne nangpilo.

¹¹Kechingthang adorson ri-aroi-heihei lapen achethok alek-heihei Ne nangpilo.

¹²Nangnokan ajangsai lapen no jangsai-heihei lapen kemesen arechopi aphutup kechingthangji aphan Ne nangpilo.

¹³Nang ser, rup aroi arnan dolo lapen keroipame ape kanglit lapen pe honki nang kaike chingthang long lo. Nang akemenei asang aduk pen keselam ahim cholong-lo, lapen pijo alang jit ajangthu cholong-lo. Nang kelangme doilorlo, lapen nang inut arechopi nangplang-lo.

¹⁴“Nang kechok-lim akelangme pen apot adettin angbong nangnong chethang phlup-lo, pima Ne si nangphan lapu-an palangmelo.” Lasonsi keklem un a-HEMPHU kepulo.

¹⁵Bonta nang arje kelangme lapen nangnong apot nanglong kevang abangphutin along nang i-dunlo.

¹⁶Nang karcho adim-heihei nangmethang ape ensi alon pilo, lapen inut abang kechojor abangpi asonsi abangphutin aphan nang chepi-et-lo.

¹⁷Ne nangphan nangkepi tang arup lapen aser adorson ponsi la pen pinso akumlin selam-ilo, lapen lahei atum pen beisa klemlo.

¹⁸Ne nangphan nangkepi keroi ape ponsi lahei kumlin-heihei athak pa-umlo, lapen jit ajangthu lapen methek-heihei kumlin aphan pajirlo.

¹⁹Ne nangphan akemenei asang aduk a-an, jit ajangthu lapen pijo alang nangpilo bonta nang kumlin pen kerap kelongjisi la isi athok ason pajirlo. La helo keklem un a-HEMPHU kepulo.

²⁰Anke ne pen kechopathe esomar pinso-arlo nang pondetsi latum aphan kumlin-heihei aphan athok pajirlo. La anta akekroi kave dordelangma!

²¹Nesomar kumlin aphan kumlin aphuthak athok kepajirji dordelangma? Nang kehijimmeme akai beisa pi ason kedo esek nang nang-oso ako akai alam chematha damtha! Nangreng angse, nangvi nangphik pen kechinglukung ahut alam.

²²Lapen nang kedo-an akesa-ur lapen akhat-kave alam nang okkengjang ahut chemathadamdelo, nangreng angse, thangta kavedet ahut, nangvi nangphik pensi chingluthip-lo.

²³Keklem un a-HEMPHU pulo, “Nang kevirlo! Kevirlo! Nang kehingno akam an klemlo, lapen

²⁴tovar akrongtin kumlin-heihei aphan kardomjisi kimlo lapen beisa akam chesekelo.

²⁵Nang akelangme inghan ajo chethurlo. Kevang aling abangphutin aphan nang chepi lo, lapen nang arnivangta nangbang chejorbomlo.

²⁶Nangdung kemekphrok an Ijip aso, nang pen hongplang athak irap-rap-lo, lapen nang nephan nening kepathijisi nangbang chejorlo.”

²⁷Non lasi nangphan nangduk nang kepijisi lapen nangpharman ahirjume keponjisi neri chirung-lo. Nangphan kehijim abang Philistia aso, nang ot kave kehijim abang arideng Ne nanghodai detpo.

²⁸Pima nang bang kaprek pen ta nangning ingsamselang, nang Assiria atum aphi phi hungdunlang, nangta halatum abeisapilo, bonta latum ta nangphan nangning pangsam un-elang.

²⁹Nang ke Bebilon aso aphan ta nangbang chejorlo, lake isi bepari adet-lo, bonta latum anta nangphan nangning pangsam un-edet-lo.

³⁰Keklem un a-HEMPHU lasonsi pulo, “Nang lahei kedo-an ketherak-repin abeisapi asonsi klemlo,

³¹kumlin kardomjisi lapen beisa akam kesekejisi tovarpi alongtin nang kimlo. Bonta bang kechojorbom jung jung abeisapi atum asonle nang tangka aphan ingtan kebar kali.

³²Nang ke inut a-arloso le apenan aphan chinghonhesi kechininepin abang pen beisa akam keklem abangpi asonlo.

³³Inut abang kechejor aphan ke anam pi, bonta nangke nangning kedok atum aphan dan chepilo lapen halatum nohok-le do setame vangsi nang pen ke-irap rap latum aphan nang tangka pen namlo.

³⁴Nang ke inut keprekvi abeisapilo. Nangphan baduta lason inut keplangji aphan nangpupe. Nang anam longle; halatum aphansi nang anam pinang-lo! Kalang, nang prekvi abangpilo.”

³⁵Non, Jerusalem, nang beisapilo! HEMPHU kopisi kepuma.

³⁶Keklem un a-HEMPHU lasonsi kepulo: “Nang nangpe chephlok-lo, lapen inut abeisapi asonsi nangning kedok atum an aphan lapen kehijimmeme akumlin an aphan athok kepijisi nang nangsomar atum aphan pathilo.

³⁷Pima laso apotsi nang aphrang nangning kedok an atum aphan vanpetsi nangphan ning kedok abang lapen nangphan kehijim abang aphanta hangpetpo. Latum aphan Ne vansi nangpakomsarpo lapen nangpe Ne phlok-etpo lapen latum nangreng angse kedo thek-longpo.

³⁸Nang beisa keklem apot lapen prankarmut apot nangphan Ne pinrempo lapen ne ningkethi pen nangphan kethipin an aduk Ne nangpipo.

³⁹Nangphan Ne halatum ajakong arideng nang hodaidetpo, lapen latum nangbang kechojor adim lapen kumlin kardom adim hei hei ingsek-ipo. Latum nangpe lapen nang dorson pondetpo lapen nangphan reng angse bitekangkokpo.”

⁴⁰Latum armu asong aphan chorungsi nangphan arlong pen nangpa varpo, lapen latum nangphan anokjir pen nang ingthan i-po.

⁴¹Latum nanghem-heihei me keidutpo, lapen so arlo armu nangduk kepho nangpalang dunpo. Nangphan Ne beisa akam pangtonpo, lapen nangning kedok abangpo atum aphan dan-heihei kepi pangtonkokpo.

⁴²Ansi nening kethi hampo, lapen Ne ingsampo. Nening thithelo, mate lang selet-lelo.

⁴³Nang bihek ahut Ne nangphan kosonsi nangkelana loma nang chetengne et-lo, lapen nang la kedo-an akam keklem pen ajok nephan nening papung-lo. La apotsi Ne nangphan la kedo-an anam nangpatulo. Nang kehijimmeme akam keklem apar kopisi nang ot-kave akam kebat dunthujilang? Keklem un a-Hemphu-si kepulo.

⁴⁴HEMPHU pulo, “Nangphuthak rat atum lason asarlamthe puhurji, Jerusalem: ‘Apei kosonma asopita lasonlo.’

⁴⁵Nang ke ahokpet pen nangpei asopilo. Bangpi apenan lapen asomar aphan kechehijim nangmu atum asonlo. Nang ke nang ingjir arongsopi-heihei le apei ke Hittipi lapen apo ke Amorpo asonlo.”

⁴⁶Nangtum ke Samaria, ha nirep anat bangpi arong-heihei pensi kedo. Nangmu akebi abang ke Sodom, ha nitur anat.

⁴⁷Halatum akengkam kechejor dunji lapen halatum kehijimmeme akam kecharli dunji nangning hangbom langma? Kali, malomso aphrangchot nang halahei keklem apar kehingnoneisi klempet-lo.

⁴⁸Ne kereng-et Arnam binong lasonsi keklem un a-HEMPHU pulo, “Nang ingjir Sodom lapen bangpi arong-heihei nang lapen nang rong an keklem kehingno akam klemklelang.

⁴⁹Bangpi lapen asopimar atum chepindak-lo, pima latum kechoji aphan dorphlup lapen ingsamjin pen lapen dojoi pensi kedo, bonta latum keduk aphan lapen avarsai kelongle atum aphan langlelo.

⁵⁰Latum chepindak lapen arjubui lapen Ne kehijim akam si latum klemlo, la apotsi latum aphan Ne pavirdet-lo, laso alam nang chini pamelo.”

⁵¹Samaria ke nang keklem ari achitim anta pap klemklelang. Bangpi keklem apar nang keklem kehijimmeme akam klemtang-lo. Nang kechopap pen pangbar lote nangmu ke adai kavelo.

⁵²Non ke nangphan kepinrem nang chechak nangkok-lo. Nang pap-heihei lapu-an kehingno nangmu atum nangdung dolote latum adai avedet nangnak. Nonke nangning thi ra nang ketherak chechaknon, pima nang ingjir atum aphan kangthir paplang-lo.

⁵³Jerusalem aphan HEMPHU pulo, “Sodom lapen bangpi arong-heihei lapen Samaria lapen bangpi arong-heihei aphan Ne pachingthurthuji. Kalang, Ne nangphanta nangpachingthurji.

⁵⁴Nangmethang apot nang chetherakji, lapen nangphan kepinrem lake nang ingjir atum kopu-an kechingthur loma la paklangpo.

⁵⁵Latum puthot chingthurthuji, nang lapen nangrong-heihei aphanta pachingthurpo.

⁵⁶Halabangso arni nang Sodom aputhak chongthuithema nang kechepindak ahut,

⁵⁷lapen kehingno akam nang keklemtang paklangdakde aphrang nang chepindakde langma? Non nang bangpi asonthot-lo-Edom aso, Philistia atum lapen nangkehijim adung atum aphan isi akechongthui ason nang plang-lo.

⁵⁸Nang kematha kangthirthe lapen kehijimmeme akam nang keklem apot nang kesung chechak nangpo.” HEMPHU-si kepulo.

⁵⁹Keklem un a-HEMPHU pulo, “Nang ot ateng Ne nangphan nanglang po, pima nang kechechak alam ning chebibetang-lo, lapen kechejok aloh nang phridak-lo.

⁶⁰Bonta kechejok aloh aphan Ne amanpiji, nangbihek ahut Ne pen kechejok aloh apot, lapen Ne nangpen isi kaike kedover akechejok aloh chetokji.

⁶¹Nang kopisi keklemloma nang chemathathupo lapen nangte lapen nang ingjir kechelang ahut nang chetherakpikpo. Latum nangsopimar ason plangpo, laso alam pen Ne akechejok angbong kalidet seta

⁶²nangpen Ne kechejok aloh chepamithupo, lapen nang chinipo Ne helo HEMPHU lo pu.

⁶³Nang kechokche akam keklem an Ne nang diya etji, bonta lahei nang chemathadamji, lapen nang ingho kechingpuji therakdukpo.” Keklem un a-HEMPHU si kepulo.