Read Karbi EZEKIEL 17 Bible Online

EZEKIEL 17 - Karbi bible

EZEKIEL 17

¹Neliphan HEMPHU pulo,

²“Monit aso,” alangli pulo, “Israel atum aphan tomo thannon,

³latum aphan Ne, Keklem un a-HEMPHU kopisi kepu ma latum chinipo; Ejon thedung avomu dolo, arveng langmepik lapen avengkong thepik, arveng kechepur adang the-o. La Lebanon Anglong-heihei anat ingjarlo lapen kedar athengpi achelun ingdilo,

⁴la ha beha keklem adet ingjar pondet-lo, lapen beha keklem atum arongsopi bi damlo.

⁵Anke la Israel adet pen arongso ponlo lapen aho-or kedo ahidi ajo la elo, hadak la aphan kepatheji alang dover.

⁶Arong chingjok-lo, lapen thihek-lo, drakharikang jirthip-lo. Aro angsong avomu anat chingjokbomlo, lapen kechesak arnuk olo. Drakharikang aro-heihei, arvo penpen dipthip-lo.”

⁷Hadak thedung avengkong kedo ejon avomu dolo, lapen arveng ing-chimpik. Non drakharikang angkor la anat chelosi lapen la arvo-heihei ta la anat chetevarlo, la kedobom aberi along lang kelong apar la nangpijimene pu aning chethelo.

⁸Bonta drakharikang ke aho-or kedo alongsi ke-elo, lang kedo ahidi apot arvo-heihei chingjokpo lapen athe-heihei pathepo lapen kelangme adrakharikang plang po.

⁹La apotsi Ne keklem un a-HEMPHU arjulo: Laso adrakharikang rengjima lapen thejima? Aphrang avomu la angkur phurjokje detjima, athe an lik et-e detjima lapen aro-heihei ing-lok pen lahei pathikhrai-kre detjima? La kepharji aphan jakong the-o mate kangtangrak adet teng-ai nangne.

¹⁰Kalang, la-elo, bonta la rengjima lapen thejima? La aphan nihang atomon kejap ahut chekedude jima? La kethebom ahut hadak la chekedude jima?

¹¹Neliphan HEMPHU pulo,

¹²“Lahei kethurkhrap atum laso atomo athe chinima arjutha. Latum aphan thannon, Bebilon arecho Jerusalem vangtang-lo lapen recho lapen la asaikhi atum aphan Bebilon pondet-lo.

¹³Alangli recho ahem asor pen inut pondet lo, lapen halabangso amonit pen loh chetoksi aber kepadojisi semepatang-lo. Alangliphan keparu-pathaijisi kethek kere arleng aphan la ponlo,

¹⁴laso akhei kethur un-edetji aphan lapen kechetok aloh ateng kedo thekji aphan la klemlo.

¹⁵Bonta Judah arecho thurkhrap-lo lapen Ijip anat kechingki atum aphan toilo, hadak pen losei lapen ke-ongdung aron-aso kelongji aphanlo. Alangli la pachun unjima? Hala pen la chepajok unjima? La kechetok aloh ingdi un-e lapen aduk phophe pin pen damlongle!”

¹⁶Chenamsi Ne kereng-et Arnamlo, keklem un a-HEMPHU pulo, “Laso arecho Bebilonsi thinangji, pima la aseme lapen la aphan recho anghoi kepangni abang Bebilon arecho pen kechechak aloh ingdilo.

¹⁷Ongdung arat aphan kepathijisi Bebilon aso atum longle kebui lapen dong-heihei kehut ahut Ijip arecho kangtangrak aron armu pen seta laphan kechedanji rap un-e.

¹⁸La aseme ingdilo lapen kechechak aloh phrilo. La kedo-an la klemlo, lasi non la chepajok un elo.”

¹⁹Keklem un a-HEMPHU pulo, “Ne, chenamsi kereng-et Arnamlo, la Ne men pen seme ketangtang lapen kechechak aloh kephri apot la aphan aduk pivekji.

²⁰Ne, kenep abang alam varsi la aphan la pen nepchekji. La aphan Ne ha Bebilon pondetji lapen hadak aduk piji, pima la nephan kroithipthelo.

²¹Ron along la akemenei aron-aso atum thiji, lapen kerenglang atum bithe bitha pratseipo. Anke latum Ne, helo HEMPHU lo pu chinipo.”

²²Keklem un a-HEMPHU lasonsi pulo: “Ne kedar athengpi arong achelon ponpo, lapen angjok ingdi ponpo; inglong kangtui athak Ne la epo,

²³Israel kangtuinei anglong athak. La aro-heihei chelopo lapen pathepo, lapen kemenei a-Kedar plangpo. Vo ajattin hadak inghupo lapen la abin chepachongji.

²⁴Det along kedo-an athengpi Ne HEMPHU lo pu chinipo. Kangtui athengpi Ne pipet lapen kangdai athengpi pangtuipo. Kelirseng athengpi Ne pachekedu lapen kethikhrai athengpi palirseng-lo.” Ne HEMPHU si ningjelo. Ne keklemji pu ason Ne klemvekpo.