Read Karbi EZEKIEL 18 Bible Online

EZEKIEL 18 - Karbi bible

EZEKIEL 18

¹Neliphan HEMPHU ningjelo,

²lapen pulo, “Kopisi Israel adet arat atum laso asarlamthe keruilemdet loma?” Po-pei atum drakha kethor cholo, bonta asomar atumsi akethor chomat longrong-lo.

³Chenamsi Ne kereng-et Arnamlo, pusi keklem un a-HEMPHU pulo, laso asarlamthe Israel angbong nangtum puthot rairelo.

⁴Abangphutin akai achethe nelongsi do, apo-apei achethe lapen asomar achethe seta. Pap keklem abangphu si kethi nangji abang-lo.

⁵Mathatha, inut ahokpet mesen, dhoromipet lapen athikpet amonit dolo.

⁶Alangli Israel atum akumlin-heihei archoche mate kehok-he adim kepajir athok-heihei alangli choche. Alangli anut kaprek amonit apiso aphan kehingno keklemji chorung-re mate inut a-arloso ape kechechok ahut mek-langno akam klemkle.

⁷Alangli chobeibe mate bang amar inghu pipe. Kechak-i aphai keparam abang kepi atengthot la chevoilo; kangchir abangphan la pangkrang-lo lapen areng ahu kave abangphan pe pilo.

⁸Ale kelongji aphan la tangka paramre. La kehingno akam keklem aninghanghe lapen kechehilisai alam along alangli athik pen ingsailo.

⁹Lason amonit Ne hukum-heihei kroilo lapen Ne aron-heihei bi pamelo. La dhoromi, lapen alangli rengji, pusi keklem un a-HEMPHU pulo.

¹⁰Mathatha laso amonit asopo dolo, la chonghulo, monitta pathi.

¹¹Apo keklemklepin akam lahei la klemlo, labangso kehok-he adim kepajir athok-heihei cholo, bang apiso aphan kehingno akam klemlo.

¹²Keduk aphan la chobeilo, chonghulo, keparam abang laphan kechak aphai kepi atangka la chebilo. La karchotap adim damlo, kehijimmeme akumlin-heihei ardomlo,

¹³lapen ale kelongji aphan paramlo. La rengjima? Kali, la reng-re. La lahei kehijimmeme akam an klemlo, lapen la thiji; la amethang kethinang, amethangsi adai dolo.

¹⁴Mathatha non la adun amonit abang inut asopo dolo. La apo keseke apap-heihei an thek-long-lo, bonta apo keklem arjan endunde.

¹⁵Israel atum akumlin-heihei la archoche mate kehok-he adim karkli athok la choche. La bang apiso aphan amek-langno akam klemkle,

¹⁶mate badu aphanta chenekne mate badu amarta inghupipe. Alangliphan keparam abang kechak atangka voilo. La kangchir abang phan pacholo lapen areng ahu kave abangphan pe-ri pilo.

¹⁷La kehingno akam keklem aninghanghe lapen ale aphan tangka paramre. La Ne aron-heihei klemlo lapen ne hukum-heihei kroilo. Apo apap hei hei apot la thithelo, bonta la rengvekji.

¹⁸La apo, abangthu ke, chobeilo lapen chonghulo, lapen abangphutin aphan kehingno akam klemlo. La apotsi la thilot-lo, pima la amethang keklem apap-heihei apot-lo.

¹⁹Bonta nangtum arjulo: Kopi athesi apo apap-heihei apot asopo abang kesung phonangnedet-lo? La akethak lahelo, asopo abang ke kopi ma akechok lapen akemesi klemlo. La Ne aron-heihei kroilo, lapen lahei klem pamelo, lapen la apotsi la rengvekji.

²⁰La pap keklem abang thiji. Apo apap-heihei apot asopo kesung pho nangne, kalite asopo apap-heihei apot apo thinangne. Keme akam apot mesen amonit abang phan nong-epiji, lapen kehingno keklem apot kehingno abang kesung chechak nangpo.

²¹Jongsi inut kehingno abang pap klem lote lapen Ne aron-heihei kroilote, kopima akechok lapen akeme la klemlote, la thithelo: La rengvekji.

²²La apap kedo-an diya-etpo, lapen la rengji pima, kopima akechok la klemlo.

²³Kehingno amonit kethi kelangdun Nening arong-o putong nangtum mathama? Pusi keklem un a-HEMPHU arjulo. “Kali, la aning kecheruithu lapen kerengthu kelangjisi Ne kelang kangtung.”

²⁴Bonta inut dhoromi abang keme keklem olo, lapen kehingno akam an klem cheng-lo, kehingno atum keklem ason kehijimmeme klemlo, alangli reng-longbomjima? Kali! La keklem akeme akam anta tengne-etpo. La thipo, pima la akekroi thirklongkle lapen apap-heihei apot.

²⁵Bonta nangtum pulo, “HEMPHU keklem chokche.” Nelam arjutha, nang Israel atum. Ne keklembom akam chokche putong nangtum kematha ma? Lake nangtum keklemji kechokchelo.

²⁶Inut dhoromi abang akeme akam olo lapen kehingno akam keklem cheng lote thiji, la thiji pima la kehingno akam keklem apot.

²⁷Inut kehingno abang pap keklem olo lapen kechok lapen akeme akam klem cheng lote la amethang apran chepajok-lo.

²⁸La kopima keklem chechinilo lapen pap keklem olo, apotsi la thivekvelo, bonta rengbomji.

²⁹Lapen nang Israel atum pulo, “HEMPHU keklem akam chokche,” Ne keklem atovar ke chokche putong nangtum mathama? Lake nangtum keklem atovarsi kechokchelo.

³⁰Non, Ne keklem un a-HEMPHU, Nang Israel atum aphan nangpulang abangphutin kopima keklem Ne nangtum aphan nang ingsaiji. Nang-tum kehingno akam keklembom kedo-an pen chetevarnon, lapen nangpap nangtum aphan nangpavir longri.

³¹Nangtum keklembom kehingno akam an che-onon, lapen nangtum methang aning lapen angthin chepami non. Kopisi Israel atum kethinangpo?

³²Inutbakta kethi nangji nening hanghe, pusi keklem un a-HEMPHU pulo. “Nangpap-heihei pen chetevar-ra rengnon.”