Read Karbi EZEKIEL 22 Bible Online

EZEKIEL 22 - Karbi bible

EZEKIEL 22

¹Neliphan HEMPHU pulo.

²“Monit aso,” alangli pulo. “Prankarmut atum pen keplengset arongsopi aphan nangkangsaiji chesik-loma? Bangpi kehijimmeme akam keklem an paklangdaknon.

³Rongsopi aphan Ne, keklem un a-Hemphu-si kepulo pu thannon! Pima nang nangrat aso ke-ongdung atum aphan pran armut-lo, lapen kumlin-heihei karcho pen nangmethang chepasa-urlo, nang apor vangbomlo.

⁴Halahei aprankarmut apot nangdai do, lapen nang keselam akumlin-heihei pen ajok nang chepasa-urlo, lasi nang apor vangbomlo, nang apor juttang-lo! La apotsi nangphan Ne akaprek adet atum nangpang-nekchoi long-lo, lapen kedo-an adet atum nangphan anokan pachebilong-lo.

⁵Nang aron kave apot adung lapen kehelo adet atum anta nangphuthak anokan chebilo.

⁶Israel ajalin atum an amethang ajakong chikilo lapen pran armut-lo.

⁷Rongsopi along baduta apo-apei aphan man pipe. Bang adet aso aphan nangchobeilo, lapen heme-jangre aphuthak nang ale enlo.

⁸Kangthir adim-heihei aphan nang man pipe, lapen kesang arni nang pangthirthe.

⁹Nangrat ajehek atum bang kaprek aphan kepathiji aphan chobei alam ningjelo. Ajehak atum amethang ok aningkehang chepapleng-lo.

¹⁰Ajehak atum ke apo apiso pen irap-rap-lo. Ajehak atum ape kechechok achiklo ahut arloso aphan mek-langno akam klemlo.

¹¹Ajehak atum beisa akam klemlo, lapen ajehak atum amunpi aphan mate angjar-angjir aphan mek-langno akam keklemji aphan moilo.

¹²Ajehak nangrat atum tangka kelongji aphan pran-armut-lo. Ajehak atum akorte Israel hijan keparam aputhak ale hang-lo, lapen latum aphuthak asai cho-ensi chepaplang-lo. Latum nephan tengnebub-lo.” Keklem un a-Hemphu-si keningjelo.

¹³Nang kethiparohum atum lapen pran-karmut atum aphuthak neri-chekipsi tengpo.

¹⁴Nangthin chepatheji dolang putong nang kemathama mate Ne, nangphan nangke-otji ahut nangri kechirungji ajakong dojilangma? Ne HEMPHU-si keningjelo, lapen Ne nelam chebi.

¹⁵Nang rat aso aphan Ne adettin lapen akheitin anat papratseilo, lapen nang kehingno akam-heihei pajutdetpo.

¹⁶Anke akaprek adet atum nangphan man nangpipelo, bonta Ne helo HEMPHU-lo pu nang chini po.

¹⁷Neliphan HEMPHU pulo,

¹⁸“Monit aso, Israel atum nephan thangnatta ale avelo. Latum keningjoino atasam-tam, ting, ingchin, lapen hi tui an rup kepharang aju-heihei asonlo.

¹⁹Lasi non, Ne keklem un a-Hemphu-si latum aphan halahei amar ason keningjoinolo pu kepulo.

²⁰Latum aphan rup, tam, ingchin, hi tui lapen tin-heihei le kedo adim pen vansi me kepharang asonsi Ne Jerusalem along vanpetpo. Ne ningkethi pen lapen ningkepung pen latum aphan me le tasam kedo adim pen kepangjir asonsi pangjirpo.

²¹Kalang, latum aphan Ne Jerusalem along pangrumpo, lapen latum aber me thorpo lapen nening kethi pen latum aphan pangjirpo.

²²Kepharang ame along rup kangjir asonsi latum Jerusalem along ingjirpo, anke latum HEMPHU aningkethi lo pu latum chinipo.”

²³Neliphan puthot HEMPHU nepu-thulo.

²⁴“Monit aso,” alangli pulo, “Israel atum aphan punon latum adet ingthirthetang-lo, lapen nening kethi pen la aduk pilo.

²⁵Jalin atum ke hingho atum ason latum kepathitang api aputhak ingnorlo. Rat aphan latum pathilo, kedo-an atangka lapen akhi latum long an ponlo, latum pran karmut pen ajok ongdung atum paheme nang-lo.

²⁶Kurusar atum Ne aron-heihei ingdilo, lapen kangthir aphan thangnatta aman pipe. Latum kangthir lapen kangthirthe angbong thangnat akaprek bibe. Kangthirjir lapen kesa-ur amar angbong akeprek alam latum thanthe, lapen latum kesang arni langle. Kephola ke Israel amonit atum nephan man nepipe.

²⁷Sorkar a-saihemphu atum mahar ason latum kepathitang api ingsekpo. Keplang-ojisi latum pran-armut-lo.

²⁸Arpong, le saini kehi pen kedipthip ason montri atum monit apap-heihei dip-lo. Latum ahok-he pin asonsi thek-long-lo, lapen ahok-he alam-heihei pumek-lo. Latum keklem un a-HEMPHU alamlo pusi chepulo, bonta Ne, HEMPHU latum aphan thanlongle.

²⁹Keplang abang chobei lapen chonghu, latum keduk abangphan langle lapen bang adet aso aphuthak ale enlo.

³⁰Komatsi arpong kebuipoma Ne cholang-lo, arpong keruhup adim hei hei karjaptherji abang lapen neningkethi pen la kepavirji ahut keraiji abangphan Ne cholang-lo, bonta Ne badu aphanta longledet-lo.

³¹La apotsi neningkethi latum aphuthak lophlotpo, lapen me asonsi latum keklemtang an apot Ne latum aphan pavirdetpo.” Keklem un a-Hemphu-si keningjelo.