Read Karbi EZEKIEL 23 Bible Online

EZEKIEL 23 - Karbi bible

EZEKIEL 23

²“Monit aso,” alangli pulo, “Ihut isi banghini arloso kortete dolo.

³Latum pakorjang ahut, Ijip adet kedo ahut latum ingthir et pen dode lo, lapen beisapi plang-lo.

⁴Akleng amen Oholah (bangpi ke Samarialo), lapen akebi abang ke amen Oholibah (bangpi ke Jerusalem lo). Latum banghini aphan Ne si pangrilo lapen latum nephan osomar mahang nepathekpilo,

⁵Bangpi nepharmanlo seta Oholah beisapi cheplang bomlang lapen Assiria pen bangpi aningkedok atum aphan ok aningkehang pen chepaplengset-lo.

⁶Latum ron aso apindeng hepi arong, arlengkethe amonit atum lapen kethedung asaikhi atum; kedo-anta athok kedo losei kardon ron ariso atum,

⁷Assiria asaikhi atum aphan bangpi abang chepilo, lapen Assiria atum akumlin-heihei karcho dun pen ajok bangpi a-ok-aning kehang amethang chepasa-urlo,

⁸Bangpi ingthir-et pen kedode pen Ijip along inut abeisapi keplang atengsi dobomlo. Bangpi bihek ahut pen pinso atum bangpi pen irap-rap-lo, lapen bangpi aphan inut abeisapi asonsi ot-lo.

⁹La apotsi bangpi aningkedoknei Assiria abangpo atum arideng Ne hodaidet-lo.

¹⁰Latum bangpi aphan areng angse bilo, asopo lapen asopi atum aphan phlungpi-et-lo, anke nokjir bangpi aphan pathilot-lo. Bangpi akopai alam adang bithe bithata chethanseilo.”

¹¹Bangpi akorte Oholibah le thek-long-lo seta, Oholah apar bangpi beisa kecheplang lit muchot-lo.

¹²Assiria arlengkethe lapen a-saihemphu atum aphan keklarbor apindeng aron-aso, lapen losei kardon a-saihemphu atum aphan ok-aninghang muchot-lo, lahei kedo-anta athok kedo arisomar atumlo.

¹³Bangpi akhat avedet-lo, la Ne thek-long-lo, amu abang ke aphrang abang aphan apar hingno muchot-lo.

¹⁴Bonta bangpi akhat-kave palit-bomlo. Bebilon a-saihemphu-kethe atum arpong along kehong arjan-heihei keprung-ang pen kevit aputhak bangpi aningdok-khak-lo,

¹⁵avam-heihei ta aphu athak do.

¹⁶Bangpi lahei thek-long-lok pen bangpi ok aningkehang pen plengset-lo, lapen latum aphan Bebilon amat pherangke toilo.

¹⁷Bangpi pen keche-en longji aphan Bebilon atum vang-lo. Bangpi aphan latum enlo lapen bangpi aphan lapu-an pangthirthelo padu bangpi ta latum pen dosojo lo.

¹⁸Bangpi rat angno cheklangdak-lo, lapen bangpi beisalo pu abangphutinta chinipet-lo. Bangpi akorte pen kedono asonsi labangpi penta Ne dosojolo.

¹⁹Bangpi aphrang apar beisa klem muchot-lo, bangpi Ijip adet beisa keklem ahut asonsi bihek a-arloso ason klemlo.

²⁰Bangpi ke gadha mate losei alo atum ason ok aningkehang apiso aphansi ar-ilo.

²¹(Oholibah, nang Ijip adet bihek a-oso ason akhat kave kecheplang thuvoiphitji nangningkehang adai do, hadak pinso atum nangmok lemlo lapen nang kedo ingthirthedet-lo.)

²²Nonke, Oholibah, Ne keklem un a-HEMPHU nangphan nangkepu alam lahei helo. Nang halahei nangning kedok abangpo atum pen lak-huilo, bonta latum nangphuthak Ne aningpathiji lapen latum aphan vansi nang pakompetji.

²³Bebilon lapen Chaldia an, Pekod, Shoa, lapen Koa pen monit vanji lapen kedo-an Assiria atum Ne van-etji. Kadokave athok kedo arlengkethe arisomar atum aphan lapen saihemphu atum, kadokave anokedo amonit an lapen anghoi kangtui losei kardon a-saihemphu atum an aphan Ne pangrumpo.

²⁴Latum nangphan nirep pen nang tengkhengji lapen ron ahemkonglong pen ongdung aron-armu lapen kecho ahormu kevan-i ahemkonglong-heihei chevanji. Chong lapen ingchin aphutup-heihei pen chepaden-thipsi latum nangphan nang kompetpo. Halatum arideng Ne nangtum aphan nang hodaidetpo, lapen nangtum aphan latum amethang aron hei hei pen nang ingsaipo.

²⁵Pima Ne nangphuthak neningkethi apot halatum kesedeng pen nangphan otpo. Latum nangnokan lapen nangno hini chorpetpo, lapen nangsomar pathilotpo. Kalang, nang pen latum nangsopinso lapen so-arlo atum aphan pondetpo, lapen akereng me phrindutpo.

²⁶Latum nangpe oisi nang kechingthang adorson hei hei pondetpo.

²⁷Nang ok aningkehang Ne pangtonkokpo, lapen Ijip along kedo ahut pen nang kechoklembom kang-thirthe akam an pajut kokpo. Nang kumlin-heihei aphan mate Ijip aphan puthot langlelo, lapen mathathelo.

²⁸Keklem un a-HEMPHU lason pulo: “Nang kehijim lapen kedosojo arat atum arideng Ne nangphan nanghodaidetji.

²⁹Pima latum nangphan hijimlo. Nang kechoklem asontin pondetpo lapen nang reng angse nang-o tekangpo, beisapi asonsi paklangdakpo. Nang ok aningkehang lapen nang beisa akamsi

³⁰nangphuthak la kevanlo. Det atum aphan nang beisapilo lapen halatum akumlin-heihei pen nang chepasa-urlo.

³¹Nangte arjansi edunlo, la apotsi Ne nangphan isinat aduk kepi aharlung nangpajunpo.”

³²Keklem un a-HEMPHU pulo, “Nang nangte aharlung pen junpo la thedung lapen arnuk-krung. Abangphutin nangphan ingtonjo ingtonjo lapen hiringjopo; harlung ke plengchenpo.

³³La nangphan pajinsomeme po lapen pangrithampo, la kephere lapen keru aharlung, nangte Samaria aharlung.

³⁴Nang la junpo lapen jun pathep-po, lapen la achet-abet pen nangning cherotdutpo. Ne Keklem un a-Hemphu-si keningjelo.”

³⁵Non Klem un a-HEMPHU lasonsi kepulo: “Pima nang nephan tengnebub apot lapen nephan pangnungkuk apot, nang ok aning kehang apot lapen nang beisa akam apot nang kesung chechak.”

³⁶Neliphan HEMPHU pulo, “Monit aso, Oholah lapen Oholibah aphan nang kangsaiji chesik-loma? Latum kehijimmeme akam keklem apot din non.

³⁷Latum beisa klemlo, lapen prankarmut akam klemlo kumlin-heihei pen beisa klemlo lapen nephan mahang kepathekpi a-osomar aphan pran armut-lo. Halatum akumlin-heihei aphan nesomar pajirlo.

³⁸Latum keklem la anchot kalilang. Latum Ne Kardomhemthepi pangthirthelo lapen Ne kepangthirtang Kesang-arni ingdilo.

³⁹Hala-so arni latum nesomar pathisi kumlin-heihei aphan athok pilo, latum Ne Kardomhemthepi vang-lo lapen la pasa-urlo!”

⁴⁰Abatai batai latum pherangke atum toisi kehelopik adet pen monit pahang-lo, lapen latum vang-lo. Banghini angjir langchinglupo, lapen amekkung chehilo lapen kechingthang adorson chepindeng-lo.

⁴¹Kemenei angdeng latum chongnipo lapen latum angno isi tebul dopo akelangme amar pen, mephik lapen latum aphan kepitang jit ajangthu pen.

⁴²Kematha jokphlot armu ase arjulong-lo, kejejangtang ajo pen esong amonit atum vanlo. Latum arloso ari aroi esang pa-ilo, lapen aphu-heihei athak phutup kup-lo.

⁴³Ne methang chepulo, latum beisa akam keklem pen inut a-arloso aphan patep-ilo.

⁴⁴Latum lahei abeisapi along abatai batai damthubomlo. Latum akhat-kave a-arloso Oholah lapen Oholibah along damthubomlo.

⁴⁵Beisa lapen prankarmut akam keklem apot dho-romi atum latum aphan hingno hokpo, pima latum beisa akam chesekelo lapen latum ari vi aphik chinglukunglang.

⁴⁶Keklem un a-HEMPHU lasonsi kepulo: “Latum aphan kepachenekji le kephangno asong vannon lapen latum amar paponpi-et-lonang.

⁴⁷Latum aphan kephangno asong atum arlong pavarnang lapen nokjir-heihei pen patengkheng lonang, latum asomar aphan pathipinang, lapen ahem me pakeilonang.

⁴⁸Det adang bithe akhat-kave Ne pangtonpo, latum kechoklem ason beisa keklemkle-detjisi abangphutin a-arloso aphan isi kepacherelo.

⁴⁹Lapen nangtum banghini kortete nangtum akhat-kave lapen kumlin-heihei karcho apap apot Ne nangtum aphan aduk-pipo. Anke Ne helo Keklem un a-Hemphu-lo pu nangtum chinipo.”