Read Karbi EZEKIEL 24 Bible Online

EZEKIEL 24 - Karbi bible

EZEKIEL 24

¹Nikep arni, kep achiklo, banke-dam sirkep aningkan, neliphan HEMPHU pulo,

²“Monit aso,” alangli pulo, “Pini arni phai tokdet non, pima pini arni helo Bebilon arecho Jerusalem kekompet arnilo.

³Laso atomo kethurkhrap nerat aso aphan Ne, Keklem un a-HEMPHU latum aphan kethanji dolang pu thannon: Phule me dangnon lapen la lang paplengsetnon.

⁴Kemenei ok athan joknon avengkong lapen akeng-heihei kangvai areppita la paplengsetnon.

⁵Biresak akemenei a-ok ennon, phule aber theng theknon. Lang parklok lonang; areppi lapen ok ta pache-up nang.”

⁶Keklem un a-HEMPHU lasonsi kepulo: “Pran-heihei karmut arongsopi virtang-lo! La ke an kecho kaita kangthithe aphule asonlo. Athan enbomlo, lapen ethan natta bibe det-lo.

⁷Rongsopi pran-karmut dolo, bonta longle aduk kedip unji alongle athak vi pakloklesi kangthaidang arlong athak si la klolo.

⁸Hadaksi vi Ne otekang-lo, hadak dip un-e, hadak la aningkethi pen alar kehuiji hangpo.”

⁹Keklem un a-HEMPHU lason kepulo: “Prankarmut arongsopi kevirlo! Ne methangsi theng thekpo.

¹⁰Ongmuchot atheng vannon! Me ade japnon! Ok tunnon! Ke-up areppi pachekaknon ! Areppi-heihei me thor-etnon!

¹¹Me akri athak tam aphule kejoi dangnon lapen la keso paprung dopnon. Anke la angru keter aphu-ik angkleng me cho-et aphi la puthot phule ingthir-etsi enmepo,

¹²la aphu-ik angkleng me kepachora klo-et-edet seta.

¹³Jerusalem, nangkhat kave akamsi nangphan nangpasa-urlo. Nangphan Ne kepangthirji borlo, seta, nang ingthirthebom. Nening kethi akup nangphuthak nangklo kletik nang puthot ingthirthelo.

¹⁴Ne, keklem un a-Hemphu-si ningjelo. Ne keklem apor nangketang-lo. Nangtum apap-heihei Ne langdingde mate ingjinsose mate kediya paklangkle. Nang keklemtang apot nang duk phonangpo.” Keklem un a-Hemphu-si kepulo.

¹⁵Neliphan HEMPHU pulo.

¹⁶“Monit aso,” alangli pulo, “Ephong aketeng pen nangning kedoknei amonit aphan Ne pathilotpo. Nang pasimu longle mate chiru longle mate mekri jang longle.

¹⁷Nang kechiru sud-sud ase arju longledet nangji. Nangphu angse mate nangkeng angse isi ningke-oi angthek ason damri. Nang mahang chedip si mate kechiru atum kecho a-an chori.”

¹⁸Adapprang rat atum pen ne chingkilo. Halaso aningve nepiso thilot-lo, lapen puthot arni nephan nekethan asonthotsi ne klemlo.

¹⁹Neliphan rat atum ne arjulo, “Nangli kopi athesi lason keklem loma?”

²⁰La apotsi halatum aphan neli pulo, “HEMPHU neliphan pulo, lapen

²¹Israel aso aphan laso abirta kepijisi nethanlo: Nangtum Kardomhemthepi ajakong apot cheparokalo. La ke-langji aphan lapen la along kedamji aphan nangtum ninghang-lo, bonta HEMPHU la pasa-urpo lapen nanghemtun akebi Jerusalem ke-o abang ron along thinangpo.

²²Anke neli keklem asonthot nanglitumta kelempo. Nanglitum nangli mahang chedipdelo mate kechiru atum kecho a-an chochelo.

²³Nangtum nangphu angse mate keng angse damdelo mate ningrire mate chirurelo. Nangtum aphan nanglipap apot nang pasamphri-dangpo, lapen nanglitum lahin lahin chiru seroipo.

²⁴Anke nangtum aphan neli isi angthek plangpo; neli keklemtang asonthotsi nanglitumta klempo. HEMPHU pulo, lason plang-lote, alangli keklem un a-HEMPHU lo pu nanglitum chinipo.”

²⁵HEMPHU pulo, “Non, monit aso, latum pen Ne kangtangnei a-Kar-domhemthepi ponpidetpo, la ke latum anong lapen aning arong atheng lo, la aphan latum kelangji lapen kedamji aning hang-lo. Latum asopomar lapen asopimar Ne ponpidetpo.

²⁶Ne laso akam keklem arni mane kevir pen kejok abang vangsi nangphan nangthanpo.

²⁷Halabangso arni amat nanglam kavedet apot nang keningje ji ajakong chelongthu lapen halabangso amonit pen nang chingkilongpo. Lasonsi rat atum aphan nang isi angthek plangpo, lapen latum Ne helo HEMPHU-lo pu chinipo.”