Read Karbi EZEKIEL 25 Bible Online

EZEKIEL 25 - Karbi bible

EZEKIEL 25

¹Neliphan HEMPHU pulo,

²“Monit aso,” alangli pulo, “Ammon adet aphan pu-aknon.

³Ne, keklem un a-HEMPHU halatum aphan kopisi kepuma keparjuji aphan thannon. Nangtum Ne Kardomhemthepi kesa-ur kethek-longji aphan nangning hangpik, Israel adet kevirdetji aphan kelangji nangning hangpik.

⁴Pima ning chehok-lo, apotsi nihang kejejang-tang pen det atum Ne nangphuthak chedansi nangphan paremdetpo. Latum nangdet arlo halatum amukam-heihei chekimpo, lapen hadak dopinpo. Latum nangtum kecho-kejun longji athesere chopo lapen achulang junpo.

⁵Rabbah arongsopi Ne isi ka-ut api kebiji adim pinchongpo, lapen Ammon adet adang bithe biresak kebiji adim pinchongpo, anke Ne helo HEMPHU-lo pu nangtum chinipo.”

⁶Keklem un a-HEMPHU lasonsi pulo: Nangtum nangri chardeptang-lo lapen nangning arongsi chonlo. Nangtum Israel adet aphan pinremlo.

⁷Pima nangtum klem tang-lo apotsi nangtum aphan kethiponji lapen kephangnoji adet atum aridengsi Ne nangtum aphan nanghodaidetpo. Nangtum aphan Ne lapu-an nang-pavirpameji, nangtum isi akhei mate nangmethang isi adet pu mo nonphi chepu longledetpo. Anke nangtum Ne helo HEMPHU-lo pu chinipo.

⁸Keklem un a-HEMPHU pulo, “Pima Moab pulo, Judah ta akaprek akhei atum ason,

⁹Moab aphan kerai ahoi arongsopi-heihei aputhak Ne pateng-khengji, kemenei arongsopi-heihei Beth Jeshimoth, Baal Meon lapen Kiriathaim anta tengkhendetpo.

¹⁰Moab aphan Ammon penpen nihang akejejangtang akhei atum Ne patengkhengji, anke Moab isi adet kalidetpo.

¹¹Moab aphan Ne adukpiji, lapen Ne helo HEMPHU-lo pu latum chinipo.”

¹²Keklem un a-HEMPHU pulo, “Edom arat atum Judah aputhak alarhui ot-lo, lapen halaso alarkehui Edom aputhak ajirkeding adai vanlo.

¹³Nonke Ne pachethang-lo, Ne Edom aphan aduk pipo, lapen hadak abangphutin amonit lapen api pathi-etpo. La Ne parongmandetpo, Teman arongsopi pen Dedan arongsopi an, lapen rat atum ron along thipo.

¹⁴Ne pen apot Israel arat atum Edom aputhak alarhuipo lapen latum neningkethi Edom aputhak pachinipo. Ne alarkehui amar aputhak athe kopima pu Edom atum chinipo.” Keklem un a-HEMPHU-si keningjelo.

¹⁵Keklem un a-HEMPHU pulo, “Philistia atum latum hako pen ahotur aphan chenek-ot pen alarhuilo, lapen latum hijimsi pavir det-lo.

¹⁶Lapen lasi Ne pachethang-lo, Philistia aphan Ne tengkheng ji. Philistia athoi along kedo abangphutin aphan Ne pavir-etji.

¹⁷Latum aphan Ne untik adukpiji lapen latum aputhak untik Ne alarhuiji. Latum neningkethi akup phopo. Anke Ne helo HEMPHU-lo pu latum chinipo.”