Read Karbi EZEKIEL 26 Bible Online

EZEKIEL 26 - Karbi bible

EZEKIEL 26

¹Chiklo Kecheng arni, netum bankedam kre-isi aningkan, neliphan HEMPHU pulo,

²“Monit aso,” alangli pulo, “Tair arongsopi arat atum lasonsi chehokphrolo. Latum hang-lo, ‘Jerusalem phuktang-lo! Bangpi beha ajakong damtang-lo! Bangpi ehotur plang un-elo!’”

³Non lasi, Ne, keklem un a-HEMPHU lasonsi pulo: Ne nangtum ahoturlo, Tair arongsopi, Nangphan kepatengkhenjisi Ne ongdung adet atum vanpo, lapen latum talo adihu asonsi vangpak-po.

⁴Latum nangrongsopi apaisong-heihei phangnopo lapen hem-chardon-heihei phripo. Anke nang longri aduk an Ne arkok-lorpo lapen arlong chun ang saidesi otekangpo.

⁵La athak ok-keri atum alan-heihei pakreng po, hadak la talo along arjappo. Ne keklem un a-Hemphu-si keningjelo. Det atum Tair thiponpo,

⁶lapen latum anok pen bangpi arongchitim kedo atum aphan pathipo. Anke Ne helo HEMPHU-lo pu Tair chinipo.

⁷Keklem un a-HEMPHU pulo, “Kadokave angbong kethenei arecho Bebilon arecho Nebukhadnezzar, Tair patengkhengjisi Ne vanpo. Ongdung aron armu pen alangli vangpo.

⁸Rongchitim kedo atum aphan ron along pathipo. Hotur atum kurdong hutpo.

⁹Latum nangpaisong-heihei thengpi kardik pen patongpo lapen ingchin abarlon pen nanghem-chardon-heihei parupo.

¹⁰Latum alosei kangplong aduk nangphuthak inghuthippo. Latum alosei mar kevung arki lapen ronhemkonglong arki nangpaisong-heihei keru arongsopi anghap-heihei anat latum kedam ahut klemhurpo.

¹¹Nangtovarpi-heihei soding latum losei amonit atum aduk pajangphlungsi nangrat aso aphan anokjir hei hei pen pathipo. Nang jakongkethe anujok longle athak pakrepduppo.

¹²Nangkhi pen nanghotur atum beha klem-ipo. Latum nangpaisong hei hei phrisi nanghemkeme pangjepo. Latum arlong lapen, thengpi, lapen longkoiso ensi lahei talo jok-etpo.

¹³Nang lun-heihei Ne pajutdetpo, lapen nangkum-beleng arki Ne padojoipo.

¹⁴Ok-keri atum alan kechete adim a-arlong chun-angsi Ne otekangchotpo. Rongsopi puthot kim thuthelo. Ne, keklem un” a-HEMPHU si kepulo.

¹⁵Tair arongsopi aputhak keklem un a-HEMPHU lason kepuji do: “Nangphan ketengkheng ahut talo akung kedo arat atum kehang ase kethe arjulongsi pherephratpo.

¹⁶Talo akung adet-heihei arecho atum halatum recho anghoi pen nangchesunpo. Latum ape chephloksi longle athak nangkepu aputhak lapu-an pherepo latum kephere a-ok keklem hamhedet po.

¹⁷Nangtum aphan latum laso alun charhepo: Anong kedohu arongsopi virtang-lo! Talo-heihei pen bangpi atelongpi an pondet-lo . Laso arongsopi arat atum talo-heihei pangrilo lapen talo akung kedo-an aphan papherelo.

¹⁸Non, la kekrep arni, lang-lom-heihei klemhurlo, lapen halatum arat atum lason akevir apot thirikjok-lo.”

¹⁹Keklem un a-HEMPHU pulo: “Ne nangphan monit kedodepin kangsamri keru arongsopi pinchongji. Nangphan Ne talopi aklong alang pen nang-dipji.

²⁰Hako amonit atum kedo adim along kepajalangjisi nangphan Ne ha kethitang atum apirthe arlo nangtoipo. Kaike kevirver apirthe angbong, kethitang atum pen padorap-rapjisi nangphan Ne hadak nangpadopo. La ajok nanglong baduta dodelo lapen kerenglang atum alongle along nangdim en abang avelo.

²¹Nangphan Ne isi kepherememe arjan paplang po, lapen lahelo nang kejut-lo. Monit atum nangphan nangri tahai, bonta nangphan nang longledetpo.” Keklem un a-Hemphu-si keningjelo.