Read Karbi EZEKIEL 27 Bible Online

EZEKIEL 27 - Karbi bible

EZEKIEL 27

¹Neliphan HEMPHU pulo,

²“Monit aso, Tair aphan kecharhe alun lunnon.

³La talo akung karjap arong-sopi, lapen talo lapen talo akung kedo arat atum pen beha klemlo. Bangpi aphan keklem un a-HEMPHU kopisi kepuma thannon:

⁴Talo helo nanghemlo. Nangphan kepinchong abang isi mesen atelongpi ason nangthip-lo;

⁵Latum fir arong Harmon Anglong pen kapat aphan enlo lapen Lebanon pen kedar arong pen archok ke-e-ji aphan enlo.

⁶Telongpi keselamjisi latum Bashan pen oak athengpi enlo; Saipras pen thengjangthu athengpi pen latum kapat selamlo lapen ingnar aso pabondunlo.

⁷Nang tomon ape aphan linen apesi enlo, Ijip pen keroitang alinen ape, akehelo penta pangthekme. Nang sarnung ape, kemenei ape pensi selamlo.

⁸Nang longpi kangvui atum Sidon lapen Arvad arongsopi amonit-lo. Nang akaida kedo amonit atum ke kevek atum lo.

⁹Telongpi akimbang atum ke Biblos pen-pen kethanlongtang amonit-lo. Atalotin pen kevang atelongpi nangkulat along beha klemlo.”

¹⁰Parsia, Lidia, lapen Libia arongso atum nangron-armu aphan ingdukpo. Halatum achong lapen ingchin aphu-tup-heihei nang arpong along vekpo.

¹¹Arvad aron-aso nangpaisong-heihei tonpo, lapen Gamad amonit atum nanghem-chardon-heihei tonpo. Latum achong-heihei nang paisong-heihei along vekpo, lahei atumsi nangphan palangme-muchotpo.

¹²Spein along nang beha klemlo lapen nang ongdung amar alar rup, ingchin, ting, lapen ingchin hithui ponlo.

¹³Grik, Tubal, lapen Meshekh along nang beha klemlo lapen nang ban kejor aphan lapen tam amar aphansi nang beha klemlo.

¹⁴Beth Togarmah pen losei, ron alosei lapen gadha pen nang mar chelarlo.

¹⁵Rhodes arat atum nang pen beha klemlo; talo akung kedo ongdung arat atum nangphan ingnar aso lapen kedengjong akapat nangmar pen chelarlo.

¹⁶Siria arat atum nang beha amar lapen ongdung nang keselam amar namlo. Latum mesen abor-heihei hepi arje arong ape, amang kedo ape, pe kanglit, ke-erring abor lapen chopi ke-ersip abor-heihei pen nang mar chelarlo.

¹⁷Judah lapen Israel atum asoktipli, pijo alang, jit ajangthu, mosola-heihei pen nangmar anam pilo.

¹⁸Damaskas arat atumta nang kejor amar lapen nang keselam amar namlo, lahei alar Helbon ahor lapen Sahar ape-angmi pensi anam pilo.

¹⁹Nangmar-heihei pen latum angchin lapen amosola pen chelarlo.

²⁰Dedan arat atum ape pen nangmar-heihei chelarlo.

²¹Arab atum lapen Kedar adet kepangri atum amelur-heihei abiresak, lapen abi pen nang kejor amar chelarlo.

²²Sheba lapen Raamah abepari atum ser lapen kemenei amosola amar pen nangmar chelarlo.

²³Haran, Kanneh, lapen Eden arongsopi, Sheba abepari atum, Asshur lapen Khilmad arongsopi asor nang pen beha klemlo.

²⁴Latum nangphan adorkeso ape, pe-erring, lapen keroi ape, aklong kelim-i acham ape lapen pharlempame aricherop, ari-heihei nangphan nangjorlo.

²⁵Nangkejor amar telongpi kethenei pen ponlo. Nang ke talo along atelongpi asonlo, mar kardik pensi keplengset.

²⁶Nanglongpi kangvui atum nangphan talo along nangvanlo, lapen nihang atomon nangphan nangjap-railo.

²⁷Nangkejor akhi kedo an, telong arlo kedo telong kevek atum an, nangtelongpi akimbang lapen bepari atum, Telongpi arlo kedo aron-aso abangphutin kadokaveta talo along vir-et-lo telongpi keru ahut.

²⁸Telongkevek langkejang atum akehang ase kora anta ase lelo.

²⁹“Telongpi asitin ta otekang-lo, lapen kevek abangphutinta kora dam-et-lo.

³⁰Latum kadokave nangphan chirulo, latum aphu longle aduk chetailo lapen thek-lo athak kong-long-lo.

³¹Nangphan latum aphu chesoilo lapen pethoila che-umlo. Latum aningdukpiksi chirulo.

³²Latum nangphan kethi alun charhelo:” “Tair pen komatsi pangbar-unjima, Tair anat non talo along ingsamriloma?

³³Nang bepari atum talo akung-kung adet kedam ahut, adettin akenang nang padorlo. Recho atum aphan paplang-lo nangmar akhi pen ajok.

³⁴Non nang talo along rurailo; nang talopi aklong inglimtang-lo. Nangmar lapen nangphan keklem atum an telong along nang pen virtang-lo.”

³⁵Talo akung kedo abangphutin nangkopai kelangno apot thirik-lo. Halatum arecho atum anta phereduk-lo, lapen halatum akephere angthek halatum amahang along klangdak-lo.

³⁶Nang damtang-lo, kaike aphan damtang-lo, lapen pirthe athak kedo-an abepari atum pherephrat-lo, latum nangkopai kelangno ason pholokna pu pherelo.