Read Karbi EZEKIEL 28 Bible Online

EZEKIEL 28 - Karbi bible

EZEKIEL 28

¹Neliphan HEMPHU pulo,

²“Monit aso,” Alangli pulo, “Tair kepangri abangphan Ne keklem-un a-HEMPHU kepu alam, laphan than non: Kecheparoka pensi keplengset, nang inut a-arnam lo pusi chekrong-lo. Nang chepu lo, inut a-arnam asonsi nang ingno ingnilo, talosi pakompet-lo. Nang inut arnam ason chekrong tahailo, bonta nang akethi do, akethithepin ave.

³Nang Daniel apar remu pu chemathalo, nangpen thangnat ta patu un-e-pu.

⁴Nang bidi lapen kam keklem asai kethekpen ajok ongdung aser lapen arup akhi chepaplang-lo.

⁵Nang chepareset si beha klemlo, lapen ale chepado-olo. Nang akhi pen ajok nang ko-an cheparoka loma!”

⁶Non lasi, Ne, keklem-un a-HEMPHU pulo: Nang arnam ason reset pu nang kechematha apotsi,

⁷nangphan kepatengkheng jisi ne kesedeng kot ahotur nangtoipo. Nang bidi lapen nang kam keklem asai kethekpen nang kepangrum kelangmeme amar an latum pavirdetpo.

⁸Latum nangphan pathilotpo, lapen langbung athiri along nangvarchorpo.

⁹Latum nangphan kepathiji kevang ahut, nang arnamlo pu chepubom jilangma? Nangpran karmut abang nang kechetong ahut nang kethi nangji abang, thithepin abang kali.

¹⁰Arnam kave bidet amonit atum arideng nang methan asonsi thinangji. Ne keklem-un a-Hemphu-si hukum pitang-lo.

¹¹Puthot HEMPHU neliphan nepu-thulo,

¹²“Monit aso,” alangli pulo “Tair arecho aphan kevangji akopai apot ningduknon. Ne keklem-un a-HEMPHU kopisi kepuma laphan thannon: Ehut isi nang kechok-lim abang arjan plang-lo. Nang ko-an kere lapen ko-an athok kedo abang-loma!

¹³Nang Eden along si dolo, Arnam aberi, lapen kedo-an adorkeso a-arlong chingthang-lo: Rubi a-arlong-heihei, lapen bor a-arlong-heihei; topaz, beryl, carnelian, jasper; saphire-heihei, emerald-heihei, lapen garnet a-arlong-heihei. Nang ser adorson-heihei do. Nangphan kepin-chong arni si lahei nangphan selam pilo.

¹⁴Hadak nangphan kepahonjisi ne inut kephere-meme apherangke bilo. Ne inglong kangthir along nang dolo lapen keturbongbang arlong-heihei angbong nang helat-lo.

¹⁵Nang kehingno keklem kecheng arni an nangphan kepinchong arni pen nang chok-limlo.

¹⁶Nang ke kenam lapen akam loksi keklem, lapen la si nang-phan kephangno lapen pap anat nangjalo. Lasi ne nangphan ne inglong kangthir nangphan pa-o bor-ilo, lapen nangphan nangkehon apherangke si nangphan keturbong a-arlong pen nangphlungjuilo.

¹⁷Nang ke nang arje apot si chepindak-lo, lapen nangnong nangphan kelu ason nangpa klemtoilo. Pima la apot ne nangphan longle athak an nang vungphak-lo lapen nang akaprek arecho atum aphan isi kepachere angthek ason plang-lo.

¹⁸Nang lapu-an kenam lapen kejor ahut hingnolo, nang karcho adim-heihei ingthirthelo. Lasi rongsopi aphan me keilo, lapen me pacho-et-lo. Nangphan kethek-long an atum non nangphan mekpun saide si nangthek-long-lo.

¹⁹Nang damtang-lo, kaike aphan, lapen nang phan nangkechini adet atum an pherephrat-lo, nangkopai halatum aphan rodet na pu pherelo.”

²⁰HEMPHU neliphan pulo,

²¹“Monit asopo, Sidon arongsopi pudaknon.

²²Latum aphan ne, keklem-un a-HEMPHU kopisi kepuma, thannon. Ne nangtum ahoturlo, Sidon; ne nangphan keklem akam apot rat atum nephan rohurji. Nanglong kedo amonit atum aphan aduk kepipen ajok ne ingthir-et-lo pu paklang-lo, latum ne helo HEMPHU-lo pu chinipo.

²³Nangputhak ne kevir nangtoipo lapen nang tovarpi-heihei along vi palidungpo. Atok-anotin pen nangphan tengkhengpo, lapen nangrat aso atum thipo. Anke ne helo HEMPHU-lo pu nang chinipo.”

²⁴HEMPHU pulo, “Kekompet adet atum Israel aphan kangton kangthipen keklem atum puthot kaiketa Israel aphan kephangnoji angsu lapen abapsudo-heihei ason plangji. Lapen latum ne helo Keklem-un a-HEMPHU lo pu chinipo.”

²⁵Keklem un a-HEMPHU pulo, “Israel arat atum aphan ne kepapratsei adim-heihei pen ne vanthudetji, lapen kadokave adet atum ta ne ingthir et pu chinipo. Israel arat atum amethang adet si chedopo, neban Jakob aphan ne kepi alongle along.

²⁶Haladak latum jokvan pen dopo. Latum hem-heihei kimpo, lapen drakha aberi-heihei archepo. Latum aphan kangton kang-thi adung-arei atum aphan ne aduk piji, lapen Israel atum ke jokvanpo. Anke latum ne helo halatum a-Arnam HEMPHU-lo pu chechinipo.”