Read Karbi EZEKIEL 29 Bible Online

EZEKIEL 29 - Karbi bible

EZEKIEL 29

¹Ban kedam kep aningkan, kep achiklo, krehini arni, neliphan HEMPHU pulo.

²“Monit aso,” alangli pulo, Ijip arecho aphuthak montridaknon. La lapen Ijip adet adang kedo-an atum aphan kosonsi aduk kepipoma laso alam thannon.

³Thannon lake Ijip arecho aphan Keklem-un a-Hemphu-si kepulo: Ne ke nang hoturlo, nang temongpi, langroi along kedomplak abang. Nil aroi ke nangmar lapen nangsi la keselamlo pu nang chepulo.

⁴Ne nangkecheng along arhi pavurlokji lapen nanglangroi alang-ok atum nangphan nangchophangpo.

⁵Nangphan lapen lang-ok kedo-an aphan ne kejejangtang ajo nangvar-chorji. Longle athak nangbang arpum varchorpo lapen pip-pe lo. La Ne, vo lapen ingnam api atum a-an paplangdetpo.

⁶Anke Ijip adet arat atum an ne helo HEMPHU lo pu chinipo. HEMPHU pulo, “Ijip aso atum pen kerap kelongjisi Israel atum chiki, bonta nangke isi kangduk achin apar thangnat ta kali.

⁷Latum nangphan chelungbai lote, nang palokpo, latum avengkong tok-lut-po, lapen latum anung hevengbuppo.

⁸Non lasi, ne Keklem-un a-HEMPHU si nangphan pulo, nokjirpen nangphan kepatengkheng jisi ne monit ripo, lapen latum nang rat aso lapen nangpi kedo-an aphan pathilap po.

⁹Ijip ke isi kesamphri dang keningjoino adet plangpo. Anke ne helo HEMPHU-lo pu nang chinipo.” Nil ke nangmar lapen nangsi keselam pu kechepu apot,

¹⁰ne ke nang hoturlo lapen nang a-Nil aroi ahoturlo. Ijip adang bithe an isi keningjoino kesamphridang adim paplangpo, Nirep anat Migdol arongsopi pen ha nitur ahin anat Aswan arongsopi an, Sudan asor ahoi soding.

¹¹La along badu amonit mate pi atum helat-le detji. Hadak ningkan phlikep baduta dode detji.

¹²Ijip aphan ne pirthe angbong kangsamrinei adet paplangji. Nangkan phlikep Ijip arongsopi-heihei ruhupsi dokurpo, akaprek arongsopi kehingnotang apar hingno muchotpo. Ijip aso atum aphan ne kebe atum paplangpo. Latum adet tin along dampo lapen akaprek kaprek arat atum angbong dodun nangpo.

¹³Keklem-un a-HEMPHU pulo, “Ijip aso atum aphan ne kepapratsei adet-heiheipen ningkan phlikep aphi ne vanthuji,

¹⁴lapen ne latum aphan Ijip angbong anitur ahin anat padolongpo, la halatum arong barimlo. Hadak latum isi kangtangte arecho arat dopo,

¹⁵recho arat angbong ajakong kavenei abang, lapen latum akaprek adet aphuthak kaita pangri longlelo. Latum aphan ne lapu-an amo pavangve detpo, latum aning kehang aling akaprek adet atum aphan latum angphun ingdi un-edetpo.

¹⁶Israel atum latumpen kerap kelongji aphan puthot chikithuthe detpo. Ijip akopai alam Israel atum Ijip aphan kechini kopu-an kehingno akam loma pu chechinipo. Anke Israel atum ta ne helo Keklem-un a-Hemphu-lo pu chinipo.”

¹⁷Ban kedam ningkan ingkoira-throksi, kecheng achiklo, kecheng arni, neliphan HEMPHU neputhulo.

¹⁸“Monit aso,” Alangli pulo, “Bebilon arecho Nebukadnezzar, Tair aputhak isi aketengkheng asong toilo. Alangli amethang aron-aso atum aphan lapu-an akardik amar paponlo, latum aphu achu prit-thang-lo, lapen aphang sihamlo, bonta recho tame lapen aron-aso atum tame kechepaduk alar anam longle det-lo.

¹⁹Lasi non, ne Keklem-un a-HEMPHU si kepulo; Nebukadnezzar recho aphan Ijip adet ne pidetpo. La thiparohumpo, lapen phangnopo, lapen Ijip akhi an alangli ron-aso atum anam asonsi pondetpo.

²⁰Alangli phan ne Ijip adet nephan kam keklem anam pidetpo, pima la aron-aso nephan kam neklem pilo. Ne, Keklem-un a-Hemphu-si kepulo.”

²¹La plang-lote, Israel arat atum aphan ne pangtangpo, lapen nang Ezekiel aphan, nangphan kadokaveta karjulongpet adim paningje toipo, anke ne helo, HEMPHU-lo pu latum chinipo.