Read Karbi EZEKIEL 3 Bible Online

EZEKIEL 3 - Karbi bible

EZEKIEL 3

¹Arnam pulo, “Monit aso, laso alohthui chodetnon; anke damra Israel arat aphan ningje damnon.”

²Lasi neli ingkohamlo, lapen kepa-chojisi alangli neliphan lohthui nepilo.

³Alangli pulo, “Kethi-un abang, Ne nangkepi laso alohthui chodetnon; la penle nangpok chepangkrang lingnon.” La neli cholo, lapen la pijo alang ason dokpik.

⁴Anke Arnam pulo, “Kethi-un abang, Israel arat along damnon lapen nangkepathantoi alam latum aphan thannon.

⁵Ne nangphan kesung bidet alam keningje adet along-le nang kepi kali, bonta Israel aso anat.

⁶Kesung alam keningje thedung adet anat-le Ne nangtoi lote nang chininedetji, latumta nangphan nang arjujedetji.

⁷Bonta Israel arat atum inut bakta karjuji aning hang abang avedetji; latum Nephanta arjuje. Latum kedo-anta ningkluijui lapen kroi-ingtungte.

⁸Non ne nangphan halatum ason paningklui-juipo.

⁹Arlong asonsi kedothip abang paplangpo, bor a-arlong ason pangtangrakpo, la kethurkhrap atum aphan phereri.”

¹⁰Arnam ningjebomlo, “Kethi-un abang, nangno cheden pamenon, lapen Ne nangkepu asontin nangning chebinon.

¹¹Tangte ban kedam nangdet aso atum along damra latum Ne Keklem-un a-HEMPHU, nangkethan alam thandamnon, nangphan latum arjunon-arjujenon Ne si latum aphan kepulo pu thannon.”

¹²Anke Arnam akarjong neliphan angsong nerungtang-lo, lapen nelinung anat asekethe pen kehang arjulong-lo, lapen pulo. “Sining angsong HEMPHU adak-atur aphan ronon!”

¹³Angsong Pi atum arveng kecharphlup ase angdi isi arjulong-lo, lapen kongtelong ase chikli kevang ason arki kethe arjulong-lo.

¹⁴Jasemet ajakong pen HEMPHU ajakong nelilong vangtang-lo, lapen neliphan alangli karjong pen nepondet ahut, nelining hodaksi ningthilo.

¹⁵Lasonsi Tel Abib pu Kebar Aroi akung neli vang-lo, hadak ban kedam atum dolo, lapen ni throksi neli hadak dolo, neli kethek-longtang lapen karjulongtang pen ajoksi nelining ardik-hup-lo.

¹⁶Ni throksi damdet aphi, neliphan HEMPHU pulo,

¹⁷“Kethi-un abang,” Alangli pulo, “Israel adet aphan kehon abang nang paplang-lo. Ne nangkepi latum aphan kepacheretoi alam nang than nangpo.

¹⁸Jongsi inut kehingno amonit thiji pu Ne pulo, bonta achethe kejokjira atovar kechelarji aphan nang pacheretoite pulote, la thivekji, inut apapilo, lapen la kethinang ke nangsi adai lo.

¹⁹Inut kehingno amonit aphan nang pacherelote lapen la pap keklem ingtonte pulote, la inut apapi apot thipo, bonta nangchethe ke jokphlotpo.”

²⁰Inut amonit kehingno akam keklem pangcheng-lo lapen laphan Ne isi pherememe ahut pachetong lote, nang jongsi la aphan pachere toite pulote la thiji. La apap-heihei apot thiji la akeme akam keklem an Ne chematha dundelo lapen la kethinang adai Ne nangphan si adai enpo.

²¹Pap kepaklemklejisi keme amonit aphan nang pacherelo lapen la nanglam arjusi pap klemkle lote la rengpo, lapen nangchetheta jokpo.

²²HEMPHU pulo pu neli chechinilong-lo lapen neliphan Alangli pulo, “Thurnon lapen arlok ajo lutdamnon. Hadak Ne nangphan nangthanpo.”

²³Lasi ne arlok ajo lutdamlo, lapen hadak ne HEMPHU adak-atur thek-long-lo. Keba Aroi akung neli kethek-long asonthot. Neli longle athak domkhrup-lo,

²⁴bonta Arnam akarjong nelutsi neliphan ne-ingthurlo. Neliphan HEMPHU pulo, “hem chedamra hem chingkirthip ra dojoinon.

²⁵Nangphan ari pen nangkokpo, kethi-un abang, lapen nang arat atum along dam un-elo.

²⁶Nangde Ne pathiklakpo anke lahei kethurkhrap arat atum aphan nang pachere un-elo.

²⁷Anke Ne puthot nangphan nangkethan ahut, Ne keklem-un a-HEMPHU latum aphan nangkepathan-toi ahut nangphan lam keningje ji ajakong nangpithupo. Latum ajehak ke arjuji, bonta ajehak atum ke arjujelo, pima latum kethurkhrap akheilo.”