Read Karbi EZEKIEL 30 Bible Online

EZEKIEL 30 - Karbi bible

EZEKIEL 30

¹HEMPHU puthot ningjethulo,

²“Monit aso,” alangli pulo, “Montrinon lapen Ne, Keklem-un a-HEMPHU kopisi kepuma pachethangnon. Lahei alamthe nang kehang ase pathe nangji: Isi kephere-meme arni nang vangbomlo!

³Arni nangtebok-het-lo, HEMPHU keklemji arni, Inghunke-op-lu lapen det atum aphan kesung arni.

⁴Ijip along ron dopo lapen Sudan along thedung akesung dopo. Ijip along ongdung atum aphan pathipo; det amar thipon-etpo, lapen parutekangsi o-po.”

⁵Sudan, Lydia, Libia, Arabia, Kub, lapen nerat atum angbongpen kerong aron-aso an halaso aron along thi-etji.

⁶HEMPHU pulo, “Nirep Migdol pen ha nitur Aswan an, ron along Ijip kecherai atum an thi-etji. Ijip aning kechethe aron-aso kedo-anta vir-etji. Ne, Keklem-un a-Hemphu-si kepulo.

⁷Pirthe adang angbong pen kesamphri-dangnei alongle plangpo, lapen la arongsopi-heihei ruhupsi dokokpo.

⁸Ne Ijip me kekai ahut lapen la kerai atum an kethiet ahut, latum ne helo HEMPHU lo pu chinipo.”

⁹Halaso arni nangkele ahut, lapen Ijip kevir ahut, telongpi-heihei pen ne pherangke atum toiji, lapen Sudan arat, honthethepin arat atum aphan keparungji aphan lo, lapen latum pherephratpo. Halaso arni vangtang-lo!

¹⁰Keklem-un a-HEMPHU pulo, “Ijip akhi an kepajutkokjisi ne Bebilon arecho Nebukadnezzar aphan chotoipo.

¹¹Alangli lapen la kesangkok aron-aso atum longle paningjoino dakpo. Latum Ijip aphan nokjir pen tengkhengpo, lapen det kethi arpum saide si plengsetpo.

¹²Nil aroi Ne pakreng-hak po lapen Ijip adet kehingno amonit arideng si hodaidetpo. Det adang bidet aso atum si pasamphri-dangpo. Ne, HEMPHU si kepulo.”

¹³Keklem-un a-HEMPHU pulo, “Memphis along akumlin-heihei lapen ahok-he arnam-heihei ne pavirdetpo. Ijip aputhak kepangriji abang baduta avedetpo, lapen kedo-an arat aphan ne papherephrat po.

¹⁴Ijip arlo anitur anat Ne pasamphri-dangpo, lapen nirep nat arongsopi Zoan mekeidutpo. Thebes lake det arongsopi aphan Ne aduk pipo.

¹⁵Ijip akethenei apairaikom, Pelusium arongsopi, Nening kethi chiniji. Thebes akhi Ne pavirdetji.

¹⁶Ne Ijip me keidutji, lapen Pelusium kedono hangjopo. Thebes apaisong-heihei phridakpo, lapen rongsopi langthepi inglumpo.

¹⁷Rong along Heliopolis lapen Bubastis arongsopi arisomar atum thi-etji, lapen akaprek atum aphan beng pondetpo.

¹⁸Ijip ajakong Ne kangdi ahut lapen latum kecheparoka-i ajakong Ne kepajutkok ahut Tahpanhes aputhak kangting inghupo. Ijip aphan isi anghun dip-thippo, lapen labangpi arongsopi arat atum kedo-an aphan beng pon etpo.

¹⁹Lason Ijip aphan Ne aduk kepi ahut, Ne helo HEMPHU lo pu latum chinipo.”

²⁰Ban kedam ningkan kre-isi, kecheng achiklo, throksi arni, neliphan HEMPHU nepulo.

²¹“Monit aso,” Alangli pulo, “Ijip arecho ari ne ing-lok-et lo. Baduta la perpe, mate la keme ra puthot nok ke-ot unji aphan baduta aripen vek-lok-le.

²²Non lasi Ne, keklem-un a-Hemphu-si kepulo: Ne Ijip recho ahoturlo. La ari hongnita Ne palokji, akeme lapen keloktang anatthuta ari pen nok cheklobubji.

²³Pirthe adang bithe Ijip aso atum aphan Ne hijikjam ji.

²⁴Anke Ne Bebilon arecho ari pangtangrakpo, lapen Ne nokjir alangli ri along bipo. Bonta Ijip arecho ari Ne palokji, lapen la hangser si ahotur atum angno thilotpo.

²⁵Kalang-lo, laphan Ne pa-ainilaiji, lapen Bebilon arecho aphan pangtangji. Ne nokjir alangliphan kepi ahut lapen la Ijip anat kejongker ahut, abangphutin ta Ne helo HEMPHU lo pu chinipo.

²⁶Ijip aso atum aphan Ne pirthe adang bithe hijikjamji. Anke latum Ne helo HEMPHU lo pu chinipo.”