Read Karbi EZEKIEL 31 Bible Online

EZEKIEL 31 - Karbi bible

EZEKIEL 31

¹Nelitum ban kedam kre-isi aningkan, kethom achiklo, kecheng arni neliphan HEMPHU nepulo,

²“Monit aso,” Alangli pulo, “Ijip arecho aphan lapen la Arat atum aphan thannon: Nang ko-an manghumeme! Nangphan ne kopipensi nangpangbar poma?

³Nang ke Lebanon along kedo a-Kedar arong-asonlo , Kelangmesen lapen abin kedo kepartuseng aro-heihei, Arong lapu-an kangtui la sining-inghun lekai,

⁴Hadak la kepathe ji aphan lang do, Lapen la kepareng-etji aphan longle arlo aroido. Thengpi kethe adim latum lang pilo, Lapen ingnam athengpi arong an ajo langso palilo.

⁵La lang pi pame apotsi, La akaprek athengpi arong aphan ta keding litsong-lo. La aro-heihei inglum-olo, lapen dinglen-lanlo.

⁶La aro-heihei along asontin avo atar chepatarlo; Ingnam api atum ta asomar la kedo adim chepon; La abin along pirthe adang adet atum sang-lo.

⁷Thengpi ko-an akelangme- Ko-an kangtui, aro akeding pi. La angkur-heihei longle arlo alang toksop.

⁸La pen Arnam aberi arlo kedo a-Kedar arongpen pangbar un-e. Fir arong ta lason aro ave. Plane arong ta lason aro-heihei ave. Lason thot akelangme athengpi arong Arnam amethang aberi arlota ave.

⁹Aro-heihei pachelojam si Ne la palangmesenlo. Arnam aberi, arongtin athengpi laphan langdun-un-elo.”

¹⁰Non lasi, la sining-inghun keleji an keding athengpi kopi plang poma, Ne, Keklem-un a-HEMPHU, nangphan nangthanpo. La ding bomsi cheparoka bomlo;

¹¹lasi laphan Ne dengdedet-lo, lapen laphan bang adet akepangri abang pacheraidetpo. Alangli laso athengpi kehingno keklem a-ot atengsi laphan klempo.

¹²Kesedengkot bang adet kepangri abang laphan chorpetpo, lapen la otekangbub po. La aro-heihei lapen keching-loktang arodon-heihei alongtin anglongpi lapen det arlo a-arloktin along klopo. La abin along kesang kedo-an adet atum dam-etji.

¹³Vo atum vangsi ketirok athengpi arong athak ardonpo, lapen ingnam api atum vangsi la aro-heihei athak teroipo.

¹⁴Non pen apar jonghe lang dung pame seta thengpi avelo, lapen puthot arong ingtui o-elo mate la achelon inghun phophelo, lason akang-tui ledamdelo. Kethi amonit asonsi la kadokave ta thinangpo, kethi apirthe along kedodun atum ason thakthak si thi pen jalangdun nangpo.

¹⁵Keklem-un a-HEMPHU lasonsi pulo: “Kethi atum apirthe arlo thengpi kedam arni, isi ningkeduk angthek ason la aputhak longle arlo alang-heihei padipthipji. Langroi-heihei Ne lang khangthipji lapen langjeng-heihei alang paliledetji. Pima thengpi arong thitang-lo, lapen Lebanon anglongpi-heihei athak ne pangtingthipji, lapen ingnam athengpi kedo-an pathiro ji.

¹⁶La aphan kethi atum apirthe Ne, ketoi ahut, la kekrep arki det atum aphan hijukpo. La kekrep apu-thak Eden athengpi kedo-an lapen kangvai athengpi kedo-an, Lebanon lang kechorpame athengpi pirthe arlo kedam atum an chehokpo.

¹⁷Kekreptang athengpi along kejelang dunjisi kethitang atum apirthe anat latum damrap-rappo. Lapen la abin kedo atum an det atum angbong chehijikjampo.”

¹⁸Thengpi ke Ijip arecholo lapen la arat atum an lo. Eden arlo athengpi-heihei ta lapu-an kangtui lapen anongkedo kali. Bonta non, Eden athengpi-heihei asonsi, la kethitang atum apirthe arlo dampo lapen arnam kave lapen ron along kethitang atum along jalangdunpo. Ne si keningjelo. Keklem-un a-Hemphu-si kepulo.