Read Karbi EZEKIEL 32 Bible Online

EZEKIEL 32 - Karbi bible

EZEKIEL 32

¹Netum bankedam krehini aningkan, krehini achiklo, kecheng arni, neliphan HEMPHU pulo,

²“Monit aso,” alangli pulo, “Ijip arecho aphan isi kepachere alam pi padik-khrimnon. La aphan Ne pen laso abirtale pinon: Det atum angbong nang ejon ahingho asonsi klemlo, bonta nangke lang roi alang kangvuidut atemong ason. Nangkeng-pen nang inghan temursi lang palutulo, lapen langroi pacheholo.

³Ongdung adet atum kechingprom ahut, Nelan pen Ne nangphan nang nepchekji, lapen nangphan latum ha talo akung nangpachethur pontoiji.

⁴Ne nangphan longle athak nangvarchorji, lapen pirthe adang kedo-an avo lapen api vangsi nangphan nangpachoji.

⁵Nang kethutang abang arpum pen inglongpi-heihei lapen arlok-heihei dipthipji.

⁶Nangvi inglongpi-heihei athak dipthipthe-tik lapen langjeng-heihei along plengsetse-tik Ne palidungbomji.

⁷Ne nangphan kepavir ahut, Ne sining-inghun dipthipji lapen chiklolongso-heihei paphreithipji. Arni-ta inghun adung chepatujoipo, lapen chiklopi-ta atur turtedetpo.

⁸Ne sining akethe-ang kedo-an pavedetji lapen nangpirthe pangtingsangji. Ne, Keklem-un a-Hemphu-si keningjelo.”

⁹Nang karjulongle-pinlang adet-heihei pen nang kevir alam ne kepachethang ahut ke-ongdung adet atum pherepikji.

¹⁰Ne nangphan kopisi keklemloma, la ongdung adet atum thirikjokpo. Ne nokjir keparting ahut, recho atum kepherepen chekop-dop-dap-po. Nang kevir arni halatum amethang apran aphan kephere pen klemhur-harpo.

¹¹Ijip arecho aphan Keklem-un a-HEMPHU pulo, “Nang Bebilon arecho anokjir phopo.

¹²Kesedengkak adet atum aron-aso anok Ne pachesansi latum nang rat atum kedo-an aphan papathitoiji. Nang rat aso lapen nang kechepindak-i amar asontin pavir-etpo.

¹³Nang chainong an lang angkok along ne thu-etji. Lang puthot kepachehoji aphan monit mate chainong avepinji.

¹⁴Ne nanglang pasangji lapen pache-thingji lapen nanglangroi-heihei palijoiji. Ne, Keklem-un a-Hemphu-si keningjelo.

¹⁵Ijip aphan Ne kepa-rongman ahut, lapen hadak kedo-an atum aphan kepavir ahut, Ne helo HEMPHU-lo pu latum chinipo.

¹⁶Laso akepacheredak isi kecharhe alun plangpo. Ijip lapen la arat atum aputhak det-heihei asarpimar atum la lunpo. Ne, Keklem-un a-Hemphu-si keningjelo.”

¹⁷Netum ban kedam krehini aningkan, kecheng achiklo, krepho arni, neliphan HEMPHU nepulo.

¹⁸“Monit aso,” Alangli pulo, “Ke-ongdung Ijip aso atum aphan ningduknon. Jakong kethedung akaprek adet atum penpen kethitang atum apirthe along latum aphan toinon.”

¹⁹Latum aphan punon: “Badu apar nangtong kelangmeneilo pu chemathama? Nang kethitang atum apirthe anat dampo, lapen hadak arnam kave atum penpen tilaipo.”

²⁰Ron along kethi amonit atum penpen Ijip arat atum kreppo. Latum kadokave aphan kepathijisi nokjir epak sikkoilo.

²¹Kethenei anokbe atum lapen Ijip abe kechedandun atum an aphan kethitang apirthe anat kevangji cholang-lo. Latum hangserlo: Arnam kave atum ron along kethitang atum an ladak vangsi latum nangti-lailui lo!

²²Assiria atum-ta hadak, bangpi aron-aso atum athiri penpen dolo. Latum kedo-an ta ron alongsi thi-et-lo,

²³lapen latum athiri ke kethitang atum apirthe karnuknei alongsi do. Bangpi aron-aso an ron alongsi thi-et-lo, lapen halatum athiri-heihei si bangpi atipit kompet-lo. Jat seta latum ephong kerenglang adet paklemhurlo.

²⁴Elam ta hadaksi do, bangpi aron-aso atum atipit penpen. Latum kadokaveta ron along thi-et-lo, lapen latum reng-rot en-epinpen, kethitang atum apirthe lutdamlo. Kereng ahut latum papherejolo, bonta non latum kethisi tilailuilo, lapen aman pavirphak-lo.

²⁵Elam ke ron along kethitang atum angbongsi tilailo, lapen bangpi aphan la aron-aso atum atipit bangpi aphan kompet-lo. Latum kadokaveta reng-rot ke-en-e atum, kadokaveta ron along thi-et-lo. Kerenglang ahut latum kadokave ta papherejolo, bonta non latum kethitangsi tilailo lapen aman vir det-lo, ron along kethitang atum pen isinat akopailo.

²⁶Meshekh lapen Tubal atumta hadaksi, halatum aron-aso kekompet atipit penpen dolo. Latum kadokaveta reng-rot en-e-lang, kadokaveta ron alongsi thi-et-lo. Jat seta latum ephong kerenglang atum aphan pahereduk-lo.

²⁷Latum aphan hako ahut anokbe atum aphan ason anong-pen pippedet-lo, kethitang atum apirthe along risim penpen kelutdam atumlo, latum anokjir-heihei aphu abersi dolo lapen achong-heihei latum abang arpum athak si dolo. Lahei anokbe atum ephong kerenglang atum aphan kepaphereduk ajakong kedo atumlo.

²⁸Lasonsi Ijip aso atum, ron along kethitang areng-kecherot-re atum angbong chebap-dunlerlo.

²⁹Edom ta arecho atum lapen akepangri atum penpen hadaksi dolo. Latum jakongthedung, aron-aso atumlo, bonta non latum kethitang atum apirthe along reng-rot ke-en-e ron along kethi atum penpen tilailo.

³⁰Nirep arechoso kedo-an atum hadak dolo, lapen latum Sidon aso atumlo. Latum ajakong ahut isi papherejolo, bonta non latum ron along kethitang atum penpen aman avedetsi dam nang-lo, lapen kesangjisi tilailo, areng cherot-re pin pen. Latum kethitang atum apirthe along kedam atum aman kavedet akopai cho-endunlo.

³¹Ron along kethitang atum aphan akethek-long ke Ijip arecho aphan lapen aron-armu aphan ningpang-sampo, pusi Keklem-un a-HEMPHU pulo.

³²Kereng atum aphan kepaphere-jojisi ne Ijip arecho aphan pinchong-lo, bonta la lapen la aron-armu kedo-an thilap-po lapen ron along kethi areng kecherot-re atum penpen kedo-an ta kesangjisi tilai lo. Keklem-un a-Hemphu-si keningjelo.