Read Karbi EZEKIEL 33 Bible Online

EZEKIEL 33 - Karbi bible

EZEKIEL 33

¹Neliphan HEMPHU nepulo,

²“Monit aso,” Alangli pulo, “Isi adet aputhak Ne ron pavang lote kopi plangma nang rat aso aphan than non. Halaso adet arat atum halatum angbongpen inutbak aphan Kehon abang ingvaipo.

³Alangli hotur kevang thek-long-lote, abangphutin aphan kepacherejisi la arki padopo.

⁴Mane jongsi la arjulongpen ano chedende pulote hotur vangsi laphan pathilotpo, anke la kethi apot amethang si adaipo.

⁵La kethilong ke amethang kechokche apot, pima kepacheretoi alam la ano chedende det-lo. La jongsi ano cheden lo pulote, la jokphlot tahai.

⁶Jongsi, kehon abang hotur kevang thek-long, lapen kepachere toi arki padodedet-lo pulote, hotur atum vangsi halahei apapi atum aphan pathilotpo, bonta halatum kethinang apot kehon abang aphuthak Ne adai enji.”

⁷Non, monit aso, Israel akhei aphu-thak nangphansi ne kehon abang bat-lo. Ne nangphan nang kepi akepacheretoi halatum aphan nang pacherebom nangji.

⁸Jongsi inut kehingno amonit thiji pu Ne pachethang lote, bonta la atovar kechelarji aphan la apran chepajok unji aphan laphan nang pacherere, anke la thipo, papi dosi, lapen la kethinang apot adai Ne nangpensi enpo.

⁹Inut kehingno amonit aphan jongsi nang pachere lo, lapen la pap keklem ingtonte pulote, la pap dosi la thipo, bonta nang pran ke pajokpo.

¹⁰Neliphan HEMPHU nepulo, “Monit aso,” Alangli pulo, “Israel aso atum aphan latum kopisi kepuma pu-thuvoi-phit non: ‘Elitum apap-heihei lapen keklem kechokche pen ajok anghor ardikpik lo. Etum phangnotap-lo. Eli kosonsi kerengpo?’

¹¹Latum aphan than non, Ne, Keklem-un a-HEMPHU, kereng-et Arnam, papi atum kethi Nening arong dunde. La pap keklem ingtonkok-ra kereng-longsi nening kehang. Israel nang keklembom kehingno akam ingtonkok non. Kopisi nangtum kethiji ninghang loma?”

¹²Non, monit aso, Israel aso atum aphan thannon, inut kemesen amonit pap klemlote, alangli keme keklem akam laphan pajokje. Jongsi inut kehingno amonit kehingno akam keklem ington lote, laphan aduk pi-un-e, lapen inut keme amonit pap keklem cheng lote, la apran pajokjelo.

¹³Inut mesen amonit aphan Ne, chethe chechak tahai, bonta la aphrang keme keklem anat chokpo pu chematha lote lapen pap keklem cheng-lote, la keklemtang akeme akam ne chemathadamdelo. La apap ajok thinangpo.

¹⁴Inut kethinangji kehingno amonit aphan Ne pacheretoiji, bonta la pap keklem ington lote lapen kopima kechok lapen keme klemlote thithe,

¹⁵bisar-alam, alangli jongsi keparam aphan kekhang-i amar voithudet mate la kechonghu amar chevoithuphak-lote la pap keklem ington lo, lapen chethe kepi aron-heihei kroilote la thithelo, bonta rengji.

¹⁶La kechoklem tang apap Ne diyaji, lapen la rengji pima kopisi akechok lapen akeme la klemlo.

¹⁷Lapen nangmonit atum pulo, ne keklem ason an ke chokche! Kalilo, kechokche ke latum atovarlo.

¹⁸Inut dhoromi abang keme akam keklem ingtonlote lapen kehingno akam keklem cheng-lote la pen apot la thiji.

¹⁹Inut kehingno amonit pap keklem che-o lote lapen kechok lapen akeme akam klemlote, la apran chepajok-lo.

²⁰Bonta Israel, nangtum nepulo, ne keklem kechokche. Nangtum kopima keklem atengpen Ne nangtum aphan nang-ingsaipo.

²¹Netum bankedam, krehini aning-kan, kep achiklo, pho arni, Jerusalem pen kejok amonit inut vangsi rongsopi kreptang-lo pu nethanlo.

²²La kevang arnikangsam aphrang, HEMPHU kedolor angthek ne long-lo. Halabangso amonit nangkele ahut puthot adap, keningjeji ajakong neliphan HEMPHU nepilo.

²³Neliphan HEMPHU pulo,

²⁴“Monit aso,” Alangli pulo, “Israel adet kerutang arongsopi-heihei along kedo arat atum pulo: ‘Abraham ke inutvet amonit, lapen alangliphan kadokave alongle pidet-lo. Netum ke do-o, lasi longle ke netumlo.’”

²⁵Ne, Keklem-un a-HEMPHU kopisi kepuma thannon: Avita kedolang a-ok si nangtum kecho. Nangtum kumlin-heihei si karcho. Nangtum pran armut. Kopisi nangtum alongle pu kechepulo?

²⁶Nangtum nokjir aputhak si chiki. Nangtum akam-heihei hijim-meme. Abangphutinta beisa klem. Longle ke nangtumlo pu kopusi kechepuhailo?

²⁷Halatum aphan Ne, Keklem-un a-HEMPHU si pacheretoilo pu thannon, Ne kereng-et a-Arnam chenamsi pulo, keru arongsopihei hei along kedo arat atum an thi-etji. Rongkedo arat atum aphan ke nampi api si cho-etpo. Inglongpi-heihei lapen longku-heihei along kechepatu atum an ke kesopen thi-etpo.

²⁸Det isi arongman Ne paplangji, lapen latum ajakong pen apot kechepindak ason pajutkokpo. Israel anglongpi atum lapu-an pherememeji baduta halahei angbong damput-hai abang avedetji.

²⁹Halatum apap-heihei apot halatum aphan Ne aduk kepi ahut lapen det keparongman ahut, Ne helo HEMPHU lo pu latum chinipo.

³⁰HEMPHU pulo, “Monit aso, rongsopi apaisong-heihei mate halatum ahem anghap atovar-heihei along nangmonit atum kechetong ahut latum nanglam-heiheisi chethanprelo. Latum lahin lahin chethanlo, ‘Etum damra HEMPHU pen kopi alam si kevang-loma arjudun lo-nang non,’

³¹Lasi nerat aso atum nang kepuji alam karjujisi chepangsom-pleng lo, bonta nang latum aphan kopima kepaklemji latum klemkle. Lamdok ke latum ade angchunlo, bonta latum kaita amethang aningkehang atovar si chemathachot-lo.

³²Latum aphan ke nang inut ove alun kelunpi abang mate kumbeleng kerotpi abang apar thangnat ta kalidet-lo. Nang keningje alam an latum arjulo, lapen latum ethenat ta kroikrelo.

³³Bonta nang keningje alam an chekok lote lapen latum ahok chinipo anke latum angbong inut montri dotang-lo pu latum chinipo.”