Read Karbi EZEKIEL 34 Bible Online

EZEKIEL 34 - Karbi bible

EZEKIEL 34

¹Neliphan HEMPHU pulo.

²“Monit aso,” Alangli pulo, “Israel kepangri atum aphan thandaknon. Latum aphuthak montrinon, latum aphan Ne, Keklem-un a-HEMPHU kopisi kepuma thannon: Nangtum kevirlo, nang Israel Kevi atum! Nangtum nangmethang si chelangchot-lo, bonta biresak langle.

³Nangtum chulang jun, angmi pen kethak ape che-um, kemenei abiresak pathilo, lapen cholo. Bonta nangtum kaike seta langle.

⁴Ke-aini abang phan nangtum kai seta lanane, keso atum aphan pameme, areng keso atum pe phanphe, kehelo kedamtap atum aphan vanthuthe, mate kangbotang atum aphan rire. Lalesi latum aphan nangtum chenek-lo.

⁵Pima biresak atum kevi abang avedet apotsi, latum pratseilo, lapen latum aphan ingnam api atum pathi si cholo.

⁶Lasi ne biresak inglong kangtui-heihei lapen inglongpi-heihei athak chopantap-lo. Latum pirthe athak pratseilo, lapen latum aphan baduta ridundedet-lo mate keriji bor-i abang avedet-lo.”

⁷Non, nang biresak kevi atum, nangtum aphan ne, Keklem-un a-HEMPHU kopisi kepuma arjutha.

⁸Ne chenamsi kereng-et Arnam-lo, nangtum nelam arjupamelo. Kepathi lapen kecho angnam api atum ne biresak atum aphan tengkhengtang-lo, pima kevi abang avedet-lo. Biresak aphan ne kevi abang keriji bor-i-elo. Latum amethangsi chelangchot-lo, biresak aphan langle.

⁹Lasi Nelam arjutha, nang kevi atum.

¹⁰Ne, Keklem-un a-HEMPHU nang thandak-lo, ne nangtum ahoturlo. Nangtum arideng pen Ne biresak pondetpo, lapen mononphi seta nangtum latum aphan vivelo; nangtum methang aphan pachelang chot longlelo. Nangtum pen Ne biresak aphan pajokpo, lapen nangtum latum aphan pacholongle.

¹¹Ne, Keklem-un a-HEMPHU si nangphan nang kepulo, Ne biresak aphan Ne methang si chiriji, lapen latum aphan langji,

¹²kevi abang le abiresak chelang lapen kedamtap abang aphan puthot vanthurap-pet asonthakthak klempo. Halaso kangting, kevir arni latum keprat-sei adim-heihei pen Ne latum aphan vanthuji.

¹³Latum aphan bang adet pen Ne nangvandetji, latum aphan pangrumpetji, lapen latum aphan amethang alongle along vanthudetji. Latum aphan Ne ha inglongpi-heihei lapen Israel alangjeng-heihei along japonthuji lapen kangsamdop kechopan adim pachoji.

¹⁴Inglongpi abap kejokvan ajo lapen arlok ajo lapen Israel alongle kelirtir ajo an latum aphan Ne pachopan longji.

¹⁵Ne si Nerat aso aphan vipo, lapen latum aphan elong kesang adim Ne ripiji. Ne, Keklem-un a-HEMPHU si keningjelo.

¹⁶Kangbotang atum aphan Ne ridunji, kehelo kedamtap atum aphan vanthuji, areng keso atum aphan pe phanji, lapen keso atum aphan pameji; bonta kangtulim lapen kangtangrak atum aphan Ne pavirji, pima Ne ke kopima akechok keklem akevi abang.

¹⁷Non lasi, Ne pi ahur, Ne, Keklem-un a-HEMPHU si nangtum aphan nangkepulo, nangtum abangphutin aphan Ne ingsaiji lapen keme pen kehingno thakdakji, biresak pen bi.

¹⁸Nangtum angbong ajehak atum ke kemenei abap kecholong apot ta ning ingsamse; nangtum kechoche abap ta dong-et! Kechething alang nangtum junlo, lapen kejunje alang an pacheholo!

¹⁹Nangtum kedong abap lapen kepacheho alang Ne biresak kaprek atum ta cho nangji, jun nangji ke.

²⁰Non lasi, Ne, Keklem-un a-HEMPHU si nangtum aphan kepulo, nangtum kangtangrak lapen ke-aini abiresak atum aphan Ne ingsaiji.

²¹Nangtum keso abangphan doirok lapen latum aphan ahut pen ton pahelolo.

²²Bonta ne nebiresak atum aphan pajokpo lapen latum aphan baduta palangrop-longle. Ne biresak ajontin aphan Ne ingsaiji lapen keme pen kehingno thakdakji.

²³Neban David recho asonsi latum aphan kevi abang inut arecho Ne piji, lapen alangli si latum aphan lanapo.

²⁴Ne, HEMPHU-si halatum arecho plangpo, lapen neban David recho ason inut latum aphan kepangri abang plangpo. Ne si kepulo.

²⁵Halatum akejokvan aphan Ne latum pen kechejok aloh chepathikji. Det arlo kedo kephereme-me nampi api kedo-an Ne pavedetji, anke Ne biresak atum hidi ajo jokvanpen dolongpo, lapen ingnam ajo seta amekjang longpo.

²⁶Latum aphan Ne pahirjumepo, lapen latum aphan Ne inglong kangthir along pado longpo. Hadak latum kenangji a-arvepen Ne latum aphan pahirjumepo.

²⁷Thengpi arong athe pathepo, hidi sok pathepo, abangphutin ta alongle methang along jokvan pen do longpo. Nerat aso atum angchin ari ne kephri ahut, lapen latum aphan ban ke-en arideng pen kepajok ahut, Ne helo HEMPHU lo pu latum chinipo.

²⁸Kekroikre akhei atum kai seta latum aphan thi-phangno-nelo, lapen nampi api atum latum aphan pathithelo lapen chochelo. Latum jokvansi dolongpo, lapen latum aphan baduta paphere abang avelo.

²⁹Ne latum aphan aho-or kedo ahidi piji, lapen det along kangchir pajutkokpo. Akaprek akhei atum latum aphan kai seta anokan chebibelo.

³⁰Israel atum aphan Ne si railo, lapen latum nerat aso lo pu abangphutin ta chinipo. Ne, Keklem-un a-Hemphu-si kepulo.

³¹Nang, Ne biresak atum, Ne kepangkrang bom Nerat ahur atum, Ne, nangtum a-Arnamlo, pusi Keklem-un a-HEMPHU pulo.