Read Karbi EZEKIEL 36 Bible Online

EZEKIEL 36 - Karbi bible

EZEKIEL 36

¹HEMPHU pulo, “Monit aso, Israel anglongpi-heihei aphan ningjenon lapen latum aphan

²ne, Keklem-un a-HEMPHU, kepuji abirta do pu keparjuji aphan thannon: Israel ahotur atum chehoksi pulo, ‘Non hala hako anglong-heihei ke etumlo!’ ”

³Montrinon, anke ne, Keklem-un a-HEMPHU kopisi kepuma thandak non. Adung arei adet atum Israel anglongpi-heihei kecheraidet lapen kethipon-et ahut, latum kadokaveta Israel aphan ingtonlo.

⁴Lasi non ne, Keklem-un a-HEMPHU nang inglongpi-heihei lapen inglong-heihei aphan, nang langjeng lapen arlok-heihei aphan kepu alam arju tha, lapen nang kerutang adim-heihei, lapen nang kethipon ke-otekang, lapen adung-arei adet atum kehiringjotang arongsopi-heihei an arjutha.

⁵Adung-arei adet atum aphan lapen jasemet ke Edom adet aphan nening jangjepikpen, ne Keklem-un a-HEMPHU si keningjelo. Latum aning arongpen lapen aningjangrem pen ne det cherailo lapen la kechopan-heihei adim chepahemphu-et-lo.

⁶Lasi Israel adet aphuthak mon-trinon; inglongpi-heihei, inglong-heihei, langjeng-heihei, lapen arlok-heihei aphan ne, Keklem-un a-HEMPHU kopisi aningkethi akelang selet pen kepuma thannon, pima latum aphan det atum kangton lapen kepinrem apot.

⁷Ne, Keklem-un a-HEMPHU si adung-arei adet atum aphan patherakpo pusi semetang-lo.

⁸Bonta Israel anglongpi-heihei athak athengpi arong arvo puthot chingjokji, lapen nangtum aphan athe patheji, ne rat Israel aphan. Nangtum nanghem chevang dapprangpo.

⁹Ne nangtum abelo, nangtum alongle along puthot haipabai longji lapen hadak chili rik longji.

¹⁰Nangtum aphai Ne pachanji. Nangtum rongsopi-heihei along dolongji lapen kerutang adim-heihei asontin kimthumiji.

¹¹Monit lapen chainong aphai Ne pachanji. Nangtum aphrang an sosechotji lapen nangtum asomar ongdungji. Nangtum hadak kedo asonthot nangpadolongji, lapen aphrang an sosechot nangpachingthurji. Anke nangtum Ne helo HEMPHU lo pu chinipo.

¹²Det along puthot kedothu longji aphan Ne rat aso Israel aphan puthot vanthudetji. La ke nangtum methang alongle plangpo, lapen la nangtum asomar atum aphan puthot pangchirchelo.

¹³Ne, Keklem-un a-Hemphu-si kepulo; la ke ahok-lo, monit atum longle aphan monit-kecho abang pusi irlo, lapen rat atum pulo, la det asomar atum aphan inghudet.

¹⁴Bonta la ke non pen apar nangsomar atum aphan kanghupon-ra monit kecho abang kalidetpo. Ne, Keklem un-a-Hemphu si kepulo.

¹⁵Det-heihei atum laso adet aphan kepinrem-heihei arju jokphlotpo, mate rat atum laphan anokan kechibi thek-long jokphlotpo. Khei asomar atum aphan det mononphi seta inghuhe detpo. Keklem-un a-Hemphu-si kepulo.

¹⁶Neliphan HEMPHU nepulo,

¹⁷“Monit aso,” alangli pulo, “Israel aso atum det arlo kedo ahut, latum akedo-kethak lapen akeklem akechodam pen ajok longle pangthirthelo. Latum a-ot-adur lake inut a-arloso achiklo kechok ahut ape kechecham kangthirthe pusi ne lakhalo.

¹⁸Ne latum aphan nening kethi angtong pachiniji pima det arlo latum pran karmutdet apot lapen latum kepangthirthe akumlin pen ajok.

¹⁹Latum akedo-kethak lapen akechoklem-kechodam Ne khindelo, lapen latum aphan Ne bang adet-heihei angbong papratseilo.

²⁰Latum kedam alongtin Ne men kangthir aputhak anong pajunolo, pima monit atum pupo, ‘Latum ke HEMPHU arat lo, bonta latum adet che-onangkok-lo.’

²¹La pen apot Ne men kangthir aputhak Ne chematha nangkok, Israel aso atum la aputhak latum kedam aling anong kepajuno apot.”

²²Non lasi, Ne, Keklem-un a-HEMPHU Israel atum aphan kepunangji alam thannon: Ne kopima keklemji lake nang Israel aso atum aphanchot lapu kali, bonta Ne men kangthir apot, nangtum kedam aling anong kepajuno amen.

²³La nangtum Nemen kangthir latum angno Ne menkethe chepaklangji, pima det atum angbong Nemen aputhak latum pinremlo, Ne men kangthir akethenei alam kepaklang ahut Ne helo, HEMPHU-lo pu latum chinipo. Ne Keklem-un a-Hemphu-si kepulo. Det atum angbong Ne ingthir-et kepaklangji aphan Ne nangtum aphan nangrimpo.

²⁴Akheitin lapen adettin pen Ne nangtum aphan ponsi nang methang alongle along nangvanthuji.

²⁵Nangtum aphuthak lang kangthir Ne nang arsiji lapen nangtum kedo-an akumlin-heihei pen lapen nangtum aphan nangkepasa-ur asontin pen nangpangthirpo.

²⁶Nang tum aphan Ne isi ning kemi lapen angthin kemi nangpipo. Ne nangtum aphan nangning kangtang a-arlong pondetpo lapen isi kekroithek aning nangpipo.

²⁷Nangtum aning arlo nekarjong nangpipo, lapen Ne nangkepitang aron-heihei kekroithekji aphan lapen Ne hukum-heihei ketalonthekji aphansi Ne la langpo.

²⁸Anke nangtum aphusar atum aphan kepi det-arlo dolong po. Nangtum Ne rat aso plangpo, lapen Ne nangtum a-Arnam plangpo.

²⁹Nangtum aphan kepasa-ur asontin amar pen Ne nangpajokpo. Sok athe kepa-ong-oji aphan Ne hukumpipo, anke nangtum akhim phophelo.

³⁰Nangtum athengpi athe lapen ahidi-heihei athe pa-ongji, anke khei-heihei angbong nangtum aphan kepatherakji akhim avedetpo.

³¹Nangtum kehingno a-ot lapen nangtum keklem kechokche-heihei nangning chemathapo, lapen nangtum apap-heihei lapen kechopap akam-heihei apot nangning donodakji.

³²Israel, lahei Ne nangphan si keklem kali pu nangpachini ingtung. Ne nangphan nang keklemtap apot ketherak lapen kepinrem alam pachematha ingtung. Ne Keklem-un a-HEMPHU si keningjelo.

³³Keklem-un a-HEMPHU pulo, “Ne nangpap-heihei pen nangkepangthir-et ahut, Ne nangrongsopi-heihei along puthot nangpadolongji, lapen kerutang-heihei pachekithu longji.

³⁴Nanghidi kedamput abangphutin la kejirthip lapen lahei tukong kedothip thek-longpo, bonta Ne nangtum aphan lahei aputhak patikithulongji.

³⁵La ehut isi ke kejejangtang ajo le non ke Eden aberi ason cheplang-loma lapen kangsek-i-tang, kethipontang, keparutang arongsopile nonke monit dolo lapen paisong komchenlo pusi kethek-long abangphutin pupo.

³⁶Anke adung arei kerenglang akhei atum Ne helo HEMPHU lo pu chinipo lapen kerutang arongsopi-heihei kimthulo lapen kesamphridang ahidi-heihei ethulo. Ne, HEMPHU si la klempo pu chechak lo, lapen Ne klemji.”

³⁷Keklem-un a-HEMPHU pulo, “Ne Israel aso atum aphan puthot nepen kerap pachohangji, lapen latum aphan biresak ahur ason ne pachan-pikji.

³⁸Rong-aje along karkli-i athok abiresak Jerusalem along ehut isi keplengset ason thak-thaksi non kerutang arongsopi-heihei along monit plengsetpo. Anke latum ne helo HEMPHU-lo pu chinipo.”