Read Karbi EZEKIEL 37 Bible Online

EZEKIEL 37 - Karbi bible

EZEKIEL 37

¹HEMPHU kedolor angthek neli long-lo, lapen Alangli karjong neliphan nepondet-lo, lapen repi-heihei longle kedipthip a-arlok ajo nepangnilunlo.

²Neliphan alangli arlok komchen nejaponlo, lapen ke-ongdung arrepi lapen lahei kekrengtai neli thek-long-lo.

³Neliphan Alangli pulo, “Monit aso, lahei arrepi rengthu-unjima?” Neli thak-lo, “Keklem-un a-HEMPHU, nangli si la thakthekji!”

⁴Alangli pulo, “Repi-heihei aputhak montrinon. Lahei arrepi HEMPHU alam karjuji aphanle thannon.

⁵Ne, Keklem-un a-Hemphu-si latum aphan kepulo pu thannon: Ne nangtum arlo chethe nangbipo, lapen nangtum rengthu-etpo.

⁶Ne nangtum aphan artho lapen angsi hei hei nangpipo, lapen areng pen dippo. Nangtum arlo chethe nangbipo, lapen nangtum rengthu-akpo. Anke nangtum Ne helo HEMPHU lo pu chinipo.”

⁷Lasi neliphan nekepu atengthot neli montrilo. Neli kening je bom-un ahut, kechardeng arki neli arjulong-lo, lapen arrepi-heihei chingthun pangcheng-lo.

⁸Neli kelangding-un ahut, arrepi-heihei artho lapen a-ok angsi pen chebang-lo, lapen areng pen chedip-lo. Bonta abang-heihei arlo achethe avelang.

⁹Neliphan Arnam nepulo, “Monit aso, tomon aphan montrinon. Tomon aphan thannon, Keklem-un a-Hemphu-si atok-anotin pen kevang-ra, lahei kethitang abang arpum-heihei arlo kevutjile lapen latum aphan kepareng-etjisi hukumpilo.”

¹⁰Lasi neliphan kepu ateng montrilo, Bang arpum arlo chethe lut-lo, lapen latum rengthu-et-lo, lapen arjapdingdang-lo. Ron-armu kesengji aphan latum dorphlup.

¹¹Neliphan Arnam pulo, “Monit aso, Israel arat aso ke lahei arrepi asonlo. Latum pulo, latum krengtailo, latum aningkechethe lapen mononphi akai avepinlo-pu.

¹²Lasi nerat aso Israel aphan montrinon, lapen thannon, Ne Keklem-un a-HEMPHU latum atipit ingpupo. Ne latum aphan pondetpo lapen Israel adet latum aphan vanthudetpo.

¹³Ne rat aso kepip athiri-heihei ne kangpu, lapen latum aphan nangkepabar ahut latum ne helo HEMPHU-lo pu chinipo.

¹⁴Latum aphan Ne, chethe pavangphunpo, lapen latum cherengthupo, lapen latum aphan amethang adet padolongpo. Anke Ne helo HEMPHU lo pu latum chinipo Ne la klempo pu Ne chechak-lo, lapen Ne klemji. Ne, HEMPHU si kepulo.”

¹⁵Neliphan HEMPHU puthot neputhulo.

¹⁶“Monit aso,” Alangli pulo. “Thengpi ebeng en-ra la along, ‘Judah Arecho-arat’ pu toknon. Anke akaprek atheng abeng en-ra la along ‘Israel Arecho-arat’ pu toknon.

¹⁷Anke nangri hongnipen pupu angchun ot-loknon lapen pachechulok non anke latum ebengnat ason thek-longpo.

¹⁸Nang monit atum laso athe kopilo pu nang arjulote,

¹⁹latum aphan thannon, Ne, Keklem-un a-Hemphu-si Israel kecheparje athengpi ensi Judah pu ke-cheparje athengpi pen pacherap-lokpo. La hini pen Ne ehongnat athengpi pinchongsi neripenla otdongpo.”

²⁰Nangri hongni athengpi abeng otdingnon lapen rat atum la palang-lonang.

²¹Anke latum aphan thannon, Ne, Keklem-un a-HEMPHU, nerat aso kedo-an aphan khei atum angbong pen latum kedam adim pen pondetpo, latum aphan pangrum-rappetpo, lapen latum aphan det amethang adet along vanthudetpo.

²²Israel anglong athak, Ne latum aphan det along isinat akhei pachingrumpetpo. Latum aphan kepangriji abang inut arechosi dochotpo, lapen latum khei hini chethakdak-dedetpo, mate recho arat hini phlakdak-delo.

²³Latum kehijimmeme akumlin-heihei pen amethang chepasa-ur-elo mate pap pen chepahingnone lo. Latum nephan kechopap an lapen nekechobei atovar-heihei anpen Ne pajokji. Ne latum aphan pangthirji; latum nerat aso plangpo, lapen Ne latum a-Arnam plangpo.

²⁴Neban David ason latum arecho plangpo. Inut kepangri abang aber latum chingrumpet po, lapen kroithip pen latum Ne aron-heihei kroipo.

²⁵Latum aphusar atum kedo alongle, Ne, ban Jakob aphan kepi alongle along latum dolongpo. Latum hadak kaike aphan dolongverpo, lapen lasonsi latum asomar atum lapen aso-asu atum anta dolongpo. Kaike ta Neban David asonsi inut kepangri abang latum aphan pangriverpo.

²⁶Latum kaike kejokvanji akechejok alo Ne latumpen chetok ji. Ne latum aphan pathirpo, lapen latum aphai pachanpo, lapen Ne Kardomhemthepi latum adet along padopo, hadaksi la kaike aphan doverpo.

²⁷Ne latumpen hadak dorappetpo, Ne latum a-Arnam plangpo, lapen latum Nerat aso plangpo.

²⁸Kaike aphan Ne Kardomhemthepi halatum angbong kepadoverji aphan Ne kebi ahut, anke khei atum, Ne helo HEMPHU-lo pu chinipo, lapen Israel aphan Nemethang arat kepaplangji aphan ingvaitang-lo.