Read Karbi EZEKIEL 38 Bible Online

EZEKIEL 38 - Karbi bible

EZEKIEL 38

¹Neliphan HEMPHU pulo,

²“Monit aso,” Alangli pulo, “Gog aphan montri daknon, la Magog along Tubal lapen Meshekh akhei-heihei kepangri alindokpo. La aphan montridaknon,

³lapen laphan thannon, Ne, Keklem-un a-HEMPHU ke la ahoturlo.

⁴Laphan Ne pharlepphakji, lapen akecheng along arhi pavurlokji, lapen laphan chethursi la aron-asong an pabephlungji. La aron-armu, la alosei penpen, kardon atum ape-ejatvet, aphai lakha-un-e, lapen abangphutin aron aso chong cheponlo, lapen nokjir dolo.

⁵Parsia, Sudan, lapen Libia pen amonit atum alanglilong dolo, lapen kadokave ta chong lapen nokjir-heihei dolo.

⁶Nirep anat Gomer lapen Beth Togarmah adet ron kechedan amonit atum alanglilong dolo, lapen lason si ke-ongdung akhei amonit atum alanglilong dolo.

⁷La aphan kepachesik jile thannon, lapen la aron aso kedo-an kepachesik jile hukum papi non.

⁸Ongdung aningkan aphi laphan Ne isi adet kepatengkheng ji aphan hukumpipo, laso arat atum ongdung akhei angbong pen si kevanthulo, lapen latum ron akephere avepinpen si kedo. La Israel anglongpi-heihei tengkhengpo, lahei keparongman-tang, lapen ke-o-tang ajirdingklui lo, bonta hadak arat atum non kedo jokvanlang.

⁹La lapen la aron armu lapen la along kedo ke-ongdung akhei atum, tomonpi asonsi tengkhengpo, lapen det inghun asonsi bangthippo.”

¹⁰Gog aphan Keklem-un a-HEMPHU lasonsi pulo: “Halaso apor kevang ahut, nang isi kehingno kemang alam mathapo.

¹¹Nang isi kangjinsomeme adet aphan ketengkhengji chengpo, isi apaisong kavepin lapen arpong kavepin arong-heihei arlo ingsamjinpen lapen jokvanpen kedo arat.

¹²Nang thi phalangnopo lapen rongsopi arat, ehut isi kerutang adim kedo arat aphan thiponpo. Latum ongdung akhei angbong pensi kepangrum, lapen non latum pi ahur dolo lapen amar dolo, lapen pirthe kechetok atovar alongsi latum dolo.

¹³Sheba lapen Dedan arat atum lapen Spein abepari atum nangphan arjupo, ‘Nang ron-armu atum chingrumloma lapen kethiponjile lapen kephangnojile tengkheng loma? Rup, ser, kepangreng api lapen amar ke-en ji nangning hangma, lapen halahei kephangno tang amar chokat ponpema?’ ”

¹⁴Lasi Gog aphan Keklem-un a-HEMPHU kopisi kepuma kepathan jisi Alangli neliphan toilo : “Non Ne rat aso Israel atum jokvan si kedolang, lapen nang

¹⁵kehelo anirep adim pen, isi ke-ongdung, jakong kethedung aron-armu asong ongdung akhei pen jasi nangbar linpo, latum kedo-an ta losei athak ardonpo.

¹⁶Det angbong tomonpi kejap asonsi nang Ne rat Israel aphan tengkhengpo. Aphrang kele ahut, khei atum aphan Ne komatma kepaklangjisi, nangpen ajok Ne kam kangthir-et kepaklangjisi, Ne det kepatengkheng-jisi Ne nangtoiji.

¹⁷Aphrang penta nang lam si Ne kepu bom, Israel adet amontri, Ne ban pen ajok Ne pachethang ahut pulo, arnisi Ne Israel kepatengkhengji aphan mane inutbak vanji.” Keklem-un a-HEMPHU si kepulo.

¹⁸Keklem-un a-HEMPHU pulo, “Israel aphan Gog ketengkheng arni, nening thihakji.

¹⁹Ne ningkethi angtang akeso Ne pachethangji, halaso arni Israel adet chikli inglumkriji.

²⁰Lang a-ok lapen vo ajontin, pi ajontin kethe-kebi, lapen pirthe athak kedo monit abangphutin nephan phere si a-ok klemhurji. Inglongpi-heihei krep po, thepai kong-longpo, paisong asitin klijapji.

²¹Kedo-an ason ason akhim-heiheipen Gog aphan Ne papherephratji. Ne, Keklem-un a-HEMPHU si kepulo. La amonit anokjir lahin lahin chethu seroipo.

²²La aphan Ne keso lapen avi-aphik pen adukpiji. Arve keklothip lapen herai, me me-aplum penpen, la aphuthak, lapen la aron-armu aphuthak, lapen ongdung akhei la abe kedodun aphuthak dungji.

²³Lasonsi khei kedo-an aphan Ne thedung, lapen ingthir-et pu paklangpo. Latum Ne helo HEMPHU lo pu chinipo.”