Read Karbi EZEKIEL 39 Bible Online

EZEKIEL 39 - Karbi bible

EZEKIEL 39

¹Keklem-un a-HEMPHU pulo, “Monit aso, Gog aphan montri-daknon, Meshekh lapen Tubal akhei kepangri alindokpo aphan, lapen Ne la ahoturlo pu thannon.

²Ne la aphan akemi ahin anat pasuiji lapen la Israel anglongpi-heihei along nangleletik, nirep kehelo anat Ne la aphan japonji.

³Anke la ari arvi athai lapen ari ar-e athai aso Ne tengphitpo.

⁴Israel anglongpi-heihei athak Gog lapen la aron-armu lapen la along kechelangdun an thiklipji, lapen latum abang arpum vo lapen nampi api a-an paplangji.

⁵Latum hidi koidang ajo kethi tipreji. Ne, Keklem-un a-Hemphu-si kepulo.

⁶Magog lapen talo akung adet-heihei kedo arat kedosojoje pin adet Ne me kei pangchengji, anke abangphutinta chini po Ne helo HEMPHU-lo pu.

⁷Ne men kangthir Ne rat aso Israel aphan pachinivekji, lapen Ne men puthot papinrem longledetji. Anke khei atum Ne, helo HEMPHU, Israel a-Kangthir-et Arnamlo pu chinipo.”

⁸Keklem-un a-HEMPHU pulo, “Ne kepu arni ke nanglevekpo.

⁹Israel arongsopi-hei-hei along kedo arat atum damsi kevartang arisim me kethorji aphan pangrum dampo. Chong, thai, thai-aso, chir, lapen chir apak-heiheipen me abui thorpo, lapen la ningkan throksi aphan dorphlup po.

¹⁰Hidi-heihei along latum theng pangrum nangne lo mate ingnam ajo thengpi teng nangne lo, pima latum kethorji aphan kevartang arisim do. Latum aphan kethipon lapen kephangno atum aphan latum thiponpo lapen phangnopo.” Keklem-un a-HEMPHU si kepulo.

¹¹HEMPHU pulo, “Lahei plang-lote, Israel along Gog aphan isi kechepip adim piji. ‘Kehelat’ Arlok, Kethitang Atalo anihang anat. Gog lapen la aron-armu hadak si pip po, lapen halaso arlok amen ke ‘Gog aron-armu Arlok’ pusi irpo.

¹²Kethi-arpum kepip Israel aphan lapen det kepangthirji aphan chiklo jon throksi nangji.

¹³Det abangphutin ta latum aphan kepipjisi cherap dunpo, lapen Ne, kehai arni latum aphan aman piji. Ne, Keklem-un a-Hemphu-si kepulo.

¹⁴Chiklo jonphli jutdet aphi, longle athak kepip-pe lang abang arpum keparijisi monit ingvaisi det adang-bithe palang dampo, ansi latum det pangthir-unpo.

¹⁵Latum det adang kehir-karlu ahut, aphongtin ta latum monit arrepi si thek-longpo, la along latum angthek sompo, anke thiri ketuk atum thek-longpo lapen la Gog Aron-armu Arlok along pipdam-unpo.

¹⁶(Ron-armu aphi amen ke-ir arongso adung dopo.) Lasonsi det pangthir-thudetpo.”

¹⁷Keklem-un a-HEMPHU neliphan pulo, “Monit aso, vo lapen pi atum aphan Ne kesikpitang athok kepachoji aphan kedo-an atok pen hangpetnon. Israel anglongpi-heihei along la thedung akecho pi amei plangpo, hadak latum ok cholongpo, lapen vi junlongpo.

¹⁸Latum ron-aso abang arpum cholongpo, lapen pirthe pangri atum avi junlongpo, latum kadokave aphan ta biresak aloso mate, biresak aso, mate bi, mate chainong alo asonsi pathilotpo.

¹⁹Karkli ason lahei amonit atum aphan Ne kepathi ahut, vo, pi atum si latum a-ok athu kedo-an chopo lapen aning jangrem-retik latum avi junpo.

²⁰Ne tebul along latum ke-un-an losei lapen kardon atum, lapen ron-aso lapen ron-kechedan amonit atum chopo. Ne, Keklem-un a-Hemphu-si kepulo.”

²¹HEMPHU pulo, “Det atum Ne dak-netur pathek-longji, lapen Ne kangthir-et akephar akam kepa-plengjisi Ne kosonsi jakong kerim loma paklangji.

²²Halabangso pen Israel aso atum Ne, HEMPHU latum a-Arnamlo pu chinipo.

²³Lapen Israel aso atum nephan langplot pen pap keklem apot si latum ban dam nang-lo pu det atum chinipo. Ne latum aphan panungkuk-lo, lapen ron along latum aphan latum ahotur paremsi pathitoilo.

²⁴Latum akangthirthe lapen kehingno apot kepho nangji ason Ne pilo, lapen Ne latum aphan panungkuk-lo.”

²⁵Keklem-un a-HEMPHU pulo, “Bonta non Ne Jakob asumar Israel arat aphan jinsoji, lapen latum aphan puthot pachingthurthuji. Ne men kangthir aphan Ne cheraiji.

²⁶Latum amethang adet kedo jokvan lote, lapen latum aphan badu ta kether abang ave lote, Nephan latum ne-kechongthui apot si latum aphan pinremlo pu latum tengne unpo.

²⁷Ondung adet atum aphan Ne ingthir-et pu kepa-klangjisi, halatum ahotur atum kedo adet kedo-an pen Nerat aso aphan Ne vanthudetji.

²⁸Anke Ne HEMPHU halatum a-Arnamlo pu Nerat aso atum chinipo. Latum la chinipo pima latum aphan Ne ban toilo, lapen non Ne latum aphan pangrumlo, lapen latum amethang adet along vanthulo, latum inutbak aphanta otekangke detji.

²⁹Israel arat aphuthak Ne karjong dungji lapen latumpen chetevarvelo. Ne, Keklem-un a-Hemphu-si kepulo.”