Read Karbi EZEKIEL 4 Bible Online

EZEKIEL 4 - Karbi bible

EZEKIEL 4

¹Arnam pulo, “Monit aso, ita varnon, lapen la nang ingno chebi non lapen la rongsopi arjan kepaplengjile la athak ang-ang isi siri non.

²Anke, la kekomchen a-arjan kepaklangji aphan dong-heihei longle inghan abui, mukam-heihei, lapen la akung soding ketok-rai ajohton-heihei binon.

³Ingchin aphule enra nang lapen rongsopi apaisong adak la archungham non, la rongsopi anat pangnonon. La kompet-lo, lapen nang-si laphan kekompet abang-lo. Lake Israel akhei aphan isi angthek-lo.”

⁴Anke nang arvi anat tilai non, lapen Israel akhei adai Ne nangphuthak nangbatpo.

⁵Pima 390 arni nang hadak donangji, lapen sungji, pima latum adai apot-lo. Nangphan Ne halatum apap aduk ajirkeding lake arnisi ningkan isi paplangji.

⁶La nang pajut-et lote, nangri ar-e anat chetevarnon lapen Judah adai apot niphlikep chechaknon arni isi ke ningkan isi plangsi halatum aduk phoji.

⁷Jerusalem kekompet aputhak nangmek lang-lornon. Rongsopi aphan nangri chekip-ra hijuknon lapen la aphuthak montrinon.

⁸Ne nangphan lapu-an rak pachippo, kekompet tangtetik an nangchin pen ahin kaprek anat chepharlep un-elo.

⁹Non ajehak sok-tipli, tiplimumdo, thepak, but, dali, tamir-heihei him pen lahei pangvuipetnon. Lahei helo nang kecho nangjilo, ni 390, arvi anat ketilai ahut-lo.

¹⁰Nangphan arnisi 230 gram ahim pacholongchotji, lapen la puthot arni an pador nangji.

¹¹Langkejun ji aphanta asap-o anbak si junlongchotji, arnivang harlungso hini vetji.

¹²Monit ahi pen nang me thor nangji, la athak-le him pangdangnon lapen abangphutin nangphan kethek-longdak adimle la chonon.

¹³HEMPHU pulo, “La ke Israel atum an kechonangji arjanlo. Ne latum aphan bidet kephlung ahut lapuson ke aron thothe .”

¹⁴Bonta neli thak-lo, “Kali, Keklem-un a-HEMPHU! Neli methang aphan kaita neli chepasa-ur-e. Bihek ahut penta neli lapu kethipame api a-ok seta mate pi hijan kechepathi a-ok seta chochepinlang. Kangthir a-ok apar ke neli chochepinlang.”

¹⁵La Arnam pulo, “Mesenlo, alar Ne nangphan chainong ahi si pa-enpo, lapen la athak-le nang him pangdangnon.”

¹⁶Lapen alangli puthulo, “Kethi-un abang, Jerusalem aphan kevan ahim Ne khangchekpo. Hadak kedo arat atum him kechoji aphan kelin ahut aning oipo lapen kechiniji aninghangpo, lapen kejunji alang anta khangpo.”

¹⁷Latum him lapen lang dordedetpo; latum aning runhup po lapen latum apap-heihei apot latum phangno-pajoipo.