Read Karbi EZEKIEL 40 Bible Online

EZEKIEL 40 - Karbi bible

EZEKIEL 40

¹Ningkan kemi, 10 arni, netum aphan ban kepontang ningkan 25 aphi, lapen Jerusalem bang arideng kele ningkan 14 aphi. Halabangso arni HEMPHU kedoklung neli chechinilo, lapen neliphan alangli nepondet lo.

²Mek-rengjeng pen kethek-long ahut Israel adet neliphan Arnam nepondet-lo, lapen neliphan isi kangtui anglongpi athak nebikok-lo. Neli ingno rongsopi ason hemkimtur thek-long-lo,

³Neliphan adung nepon-lo, lapen tam ason kedoi-et amonit inut neli thek-long-lo. Alangli isi kepun-i linen ari athui otdong-lo, lapen ingchin apun ta otdong, lapen inghap ajakan along arjapding.

⁴Neliphan alangli pulo, “Langtha, Monit aso, Ne nangphan nangke paklang asontin aputhak arju pamera lapen no cheden pamenon, pima laso aphan si ladak nangphan nangkevanlo. Nang kethek-long an asontin nang Israel arat aphan than nangpo.”

⁵Neli kethek-long ke Kardomhem-thepi, lapen la komchen paisong do. Bangpo abang la ingchin apun cheponlo, la ingrup throk do keding, lapen paisong punlo. La kangtui ingrup throk lapen karthat ingrup throk.

⁶Anke la nihang anat kepangno anghap atovar anat damlo. La adongkam arludamlo, lapen angsongsi ajakan la punlo; la karnuk ingrup throk.

⁷La apar hadak isi kechehelat atovar do, pu-pu ahintinta keton angdeng kethom do. Angdengtin ta atok-phli, alongtin ta ingrup throk do, latum arpong hini adak ingrup pho karthat do. Keton angdeng-heihei apar hadak isi kechehelat atovar do keding ingrup throk, la Kardomhemthepi anat kepangno kelut angdeng anat si damlo.

⁸Laso angdeng la punlo, lapen la ingrup nerkep dolo karnuk,

⁹Kardomhemthepi adung inghap atovar kejut anat-lo, lapen la kejut paisong anat karthat ingrup hini.

¹⁰(Lahei keton angdeng pupu kechehelat atovar ahintin ta kadokave kethe isinat, lapen la hini apaisong adak karthat ta ateng isinat.)

¹¹Adunthu, bangso amonit inghap kechehelat atovar arpan punlo. La kadokave ingrup krekethom do, lapen kethovang anghap-heihei adak ingrup kep do.

¹²Keton angdeng-heihei athengnotin hadak isi kangdaiplang arpong do, kangtui ingrup isi, lapen karthat ta ingrup isi. (Angdeng-heihei atok-phli pen ingrup throk.)

¹³Anke alangli arpong anung pen akaprek arpong anung ko-an helo ma ingdeng isi la kechehelat atovar punlo, lapen la ingrup ingkoirapho dolo.

¹⁴Angdeng kejut ke ha chetai anat si ledamlo. Alangli halaso angdeng punlo lapen la arpan ingrup ingkoi long-lo.

¹⁵Inghap ingtan arpong pen ha kejut angdeng an inghap atovar ajak keding ingrup phokep.

¹⁶Ingtan arpong-heihei kedo-an angdeng inghapso-heihei do, lapen arlo arpong-heihei la angdeng-heihei angbong a-arpong along ta inghapso do. Kechehelat atovar anat kepangno arlo arpong-heihei athak sotele arong-heihei kehong do.

¹⁷Banso amonit tikup arlosoding inghap atovar anat neliphan nepon det-lo. Ingtan a-arpong anat chingdenchit ingdeng thomkep kekim do, lapen lahei athengno hadak isi arlonghei heipen kebiren kangthaidang adim do.

¹⁸Laso ingtan atikup ke arlo atikup apar ingdeimuchot.

¹⁹Arlo atikup anat kedam isi kangtui aklam inghap atovar do. La hini anghap atovar bangpo punlo, lapen la ingrup pharo dolo.

²⁰Ingtan atikup anat kedam nirep anghap atovar bangso amonit punlo.

²¹Arpong hini adak kechehelat atovar keton angdeng kethom lapen kelut angdeng kedo-an apun isinat lahei nihang anghap atovar ason. Pangrumpet inghap atovar arjon keding ingrup phokep lapen arpan ingrup ingkoirapho.

²²Kelutcheng angdeng, inghapso-heihei, sotele arong-heihei a-arjan kehong lake nihang anghap-heihei ason. Inghap anat kedam adongkam throksi do, lapen kelutcheng angdeng ke tikup kejut si anatsi pangnolo.

²³Tikup soding nirep anghap atovar pen arlo atikup anat kedam inghap atovar do, la nihang ahin anat kedo ason. Bangso amonit la hini inghap atovar angbong ajam punlo, lapen la ingrup pharo isi dolo.

²⁴Adunthu, bangso amonit neliphan nitur ahin anat neponlo, lapen hadak nelitum akaprek anghap atovar thek-long-lo. Alangli la arlo arpong lapen la kelutcheng angdeng punlo, lapen lahei ta akaprek ason ajam isinat.

²⁵Akaprek asonsi laso anghap atovar angdeng arlo inghapso-heihei do. Ing-hap atovar arjonsoding keding ingrup phokep lapen arpan ingrup ingkoira-pho.

²⁶La along angsong karluji aphan adongkam throksi do, lapen la kelut-cheng angdeng ke kejut si, tikup anat si kepangno. Kechehelat atovar anat kepangno arlo arpong-heihei athak sotele arong arjan kehong do.

²⁷Ladak ta isi arlo atikup anat keledam anghap atovar do. Adun anghap atovar anat an bangso amonit ajam punlo, lapen la ingrup pharo dolo.

²⁸Bangso amonit neliphan nitur anghap soding neponsi arlo atikup an neponlo. Alangli inghap-heihei atovar punlo, lapen la ingtan arpong anghap atovar pen ajamkethe isinat.

²⁹La keton angdeng-heihei, la kelutcheng angdeng-heihei, lapen la arlo arpong-heihei ajamkethe akaprek anghap atovar-heihei ason ajam isinat.

³⁰Laso anghap atovar angdeng arlo inghapso-heihei ta do. Arjon keding ingrup phokep lapen arpan ingrup ingkoira-pho.

³¹La kelutcheng angdeng, ingtan atikup anat si pangnolo, lapen kechehelat atovarsoding arpong bithe sotele arong arjan hong-lo. Laso anghap keledamji aphan dongkam nerkep do.

³²Arlo atikup nekeponjisi bangso amonit neliphan nihang anghap atovar soding neponlo. Inghap atovar alangli punlo, lapen la akaprek asonthakthak si ajam isinat.

³³La keton angdeng-heihei, la kelutcheng angdeng, lapen la arlo arpong-heihei ajam apun akaprek anghap atovar apun pen isinat. Kadokave komchen anghapso-heihei do, lapen kelutcheng angdeng arlota do. Pangrumpet arjon keding ingrup phokep, lapen arpan ingrup ingkoira-pho.

³⁴Kelutcheng angdeng abang ke ingtan atikup anat si kepangno. Kechehelat atovar soding sotele arong arjan kehong do. Laso anghap anat karluji aphan dongkam nerkep do.

³⁵Nirep anghap atovar anat bangso amonit neliphan nepondet-lo. Alangli la punlo, lapen la akaprek ason ajam isinat.

³⁶Halahei asonsi la ta keton angdeng-heihei do, arlo arpong alir acham kepi do, isi kelutcheng angdeng, lapen komchen anghapso-heihei do. La pangrumpet keding arjon ingrup phokep lapen la arpan keding ingrup ingkoira-pho.

³⁷Kelutcheng angdeng ke ingtan atikup anat si kepangno. Sotele arong-heihei kechehelat ahong-soding arpong-heihei along arjan kehongdo. Laso anghap anat karluji adongkam nerkep do.

³⁸Ingtan atikup anat hadak isi arlo anghap atovar pen kechehoilok nirep ahin anat do. Tikup an kepangno kelutcheng angdeng la thovang-lo, lapen arpum kangthim athok kepiji api-heihei arpum hadak chamlo.

³⁹Laso kelutcheng angdeng arlo tebul phli, chepang-nophrong angdeng arlo do. Lahei atebul alongsi athok kepiji api-heihei pathi lo, arpum kangthim kephrinji aphan seta, mate pap-heihei aphan athok setame, mate kechetu athok aphan setame.

⁴⁰Ingtan angdeng alongta lasonthot tebul phli, nirep anghap kelutdam lahin lahin anatta-do.

⁴¹Kadokave pangrumpet tebul nerkep pi kethokji aphan kepathi aphan dolo; phli ke ingdeng arlo, lapen phli ke tikup angtan si do.

⁴²Kechehoilok atebul phli abang ke akangthim kephrin athok kesik aphan, lahei kehongtang a-arlong. Lahei kangtui ingrup isira-ebeng lapen angsong angdeng ingrup hini. Lahei atebul along si pi kethu-i arisim an bat-lo.

⁴³Tebul akung chemunphli ajam ano do. Kedo-an kepiji athok tebul-heihei athak si bilo.

⁴⁴Anke alangli neliphan arlo atikup anat nepondet-lo. Arlo atikup kelutdamji aphan hadak ingdeng hini do, isi abang nirep anghap adung nitur anat si pangno, lapen akaprek abang ke nitur anghap adung nirep anat si kepangno.

⁴⁵Nitur anat kepangno angdeng ke Kardomhemthepi along kangduk akurusar atum aphanlo pusi bangso amonit nethanlo,

⁴⁶lapen nirep anat kepangno angdeng dovan along kangduk akurusar atum aphan. Kadokave akurusar atum an ta Zadok aro pensi kevang: Levi akhei angbong latum si HEMPHU angno lutdam longchotji lapen alangliphan ingduk unchotji.

⁴⁷Bangso amonit arlo atikup punlo, lapen komchen ingrup pharo isi long-lo. Kardomhemthepi ke nichi anat, lapen laso athengno isi adovan do.

⁴⁸Anke alangli neliphan Kardomhemthepi kelutcheng angdeng arlo neponlo. Kelutcheng ajakan alangli punlo: Karnuk ingrup pho lapen ajamkethe ingrup krephli, arpong karthat ingrup kethom pu pu ta.

⁴⁹Kelutcheng angdeng anat karlu kedam adongkam, lake ajamkethe ingrup ingkoi lapen karnuk ingrup krehini. Hadak hini archok do, kelutcheng angdeng tin along isi si.