Read Karbi EZEKIEL 43 Bible Online

EZEKIEL 43 - Karbi bible

EZEKIEL 43

¹Bangso amonit neliphan nihang anat kepangno anghap anat nepon lo,

²lapen nihang anat pen Israel a-Arnam kedo keturbong atur kevang neli thek-long-lo. Arnam ase talo arki asonsi ase nangdolo, lapen pirthe keturbong atur-pen the-angdang-lo.

³Laso akethek-long lake ephong Arnam Jerusalem kepavirji ahut kevang lapen ephong ke Keba Aroi along neli kethek-long ason. Anke neli longle tidup lo.

⁴Keturbong atur nihang anghapsoding damsi Kardomhemthepi arlo lutdamlo.

⁵HEMPHU Akarjong neliphan ingthurlo lapen arlo atikup anat nepondet-lo, hadak Kardomhemthepi arlo HEMPHU adak-atur keplengset neli thek-long-lo.

⁶Hadak halabangso amonit nelidung si ingnilunlo, lapen HEMPHU neliphan kardomhemthepi arlo keningje neli arjulong-lo:

⁷“Monit aso, ladak si ne inghoilo. Ladaksi ne Israel arat angbong sopo lapen latum aphan kaike aphan pangripo. Akaprek a-arnam-heihei aphan karcho mate laso adim halatum arecho atum abang arpum kepip pen ajok latum nemen kai seta puthot pinremrelo.

⁸Ne Kardomhemthepi ahongthu lapen inghap anujok-heihei angdenchit recho atum ahem ahongthu lapen inghap anujok-heihei chekimlo, anke netum angbong isinat arpong si dochotpo. Latum kangthirthe keklemtap akam an pen ajok latum Nemen kangthir pinremlo, lapen lason si nening thisi Ne latum aphan pavirklung-lo.

⁹Non lasi latum akaprek a-arnam-heihei karcho ington nangpo lapen halatum arecho kethi abang arpum terek nangpo. Jongsi latum la klemlote Ne latum along kaike aphan dodunverji.”

¹⁰HEMPHU ningjebomlang, “Monit aso, Kardomhemthepi alam Israel arat aphan thannon, lapen la akemang latum pamunthi nang. Latum apap apot pachetherak nang.

¹¹Latum keklemtang apot jongsi chetherak lote, latum aphan Kardomhemthepi akemang alam than pajirmi non: la arlo-a-arje, la kelut anghap-heihei, lapen kebar anghap-heihei, la ahem arje la along kedo kesik asontin alam, lapen la aron, atang ason an. Latum aphan lahei tokpi-etnon, anke lahei asontin kopusonsi kebi loma latum thek-longpo, lapen aron, atang ateng pen klemthekpo.

¹²Kardomhemthepi aron la helo: Inglong aphuchong lapen la adung arei an kepangthirtang lapen ingthir-et.”

¹³Dovan apun lahei helo, Kardom-hemthepi kepun-i apun pen isinat. Dovan aklong bithe isi ri angrup apun ingrup isi-ra chimunphli, lapen arpan ingrup isi, lapen la akung soding echak dolo. Lapen dovan kangtui lahelo:

¹⁴longle athak aber pen angchun an ingrup hini, arpan ingrup isi lapen akebimuchot pen themuchot ingrup phli kangtui lapen arpan ingrup isi dolo. Laso aphi adunthu abang ke,

¹⁵Dovan angsong kephrin athok-heihei laso along si kepi, kangtui ingrup phli. Atok-phli anu-heihei ke akaprek athak aren apar ingtuimuchot-lo.

¹⁶Dovan athaksi ke atok-phli, ahintin ta ingrup krehini do.

¹⁷Angbong ta atok-phli, ahintin ta ingrup krephli do, lapen la akung ingrup ebeng dolo. (La aber arpan ingrup isi do.) Dovan karlu adongkam ke nihang anatsi kedo.

¹⁸Keklem-un a-HEMPHU neliphan pulo, “Monit aso, ne nangphan kopima nangkepu nangning chebinon. Dovan kimtang lote, la thak athok kephrinpen ajon lapen athok kepitang api avi la aputhak karsi pen ajok nangsi hodai nangji.

¹⁹Zadok aropen kevang a-Levi akhei atum si nephan ne kangdukji aphan ne ingno vang un-chotji. Ne, Keklem-un a-Hemphu-si la hukum kepilo. Pap athok kepiji aphan nangsi latum aphan chainong aloso ejon pinangji.

²⁰La avi ajehak nang pon-ra dovan athak si atok-heihei anu along, lapen angbong angdeng atok alongtin along ta lapen la akung-kung hi nangji. Lason si nang dovan pangthirpo lapen la hodaipo.

²¹Pap athok kepajir ji aphan achainong alo nang si pon nangji lapen kardomhemthepi angtan kethiktang adim si la phrin nangji. Puthot arni nang si aju kavepin abi alo pon si la pap athok pi nangji. Chainong alo pen nang keklem asonthotsi dovan vi pen pangthir nangji.

²²Puthot arni nang aju-kavepin abi alo ponra nephan pap athok la nepi nangpo, chainong alo athok nang kepi asonthot la avi pen dovan pangthir-i-non.

²³Nang la keklem patangdet aphi, chainong aloso ejon lapen biresak aloso ejon aju kavepin ponra

²⁴lahei nelong vannon. Lahei aputhak kurusar atum ingti arsipo, lapen lahei nephan athok pisi phrinpo.

²⁵Arnivang hithi erui nang bi ejon lapen chainong alo ejon, lapen biresak pap alar athok pinangji. Kadokaveta aju avepin nangji.

²⁶Ni throksi kurusar atum dovan pangthir nangji lapen la ke-en me ji aphan sik-koi nangji.

²⁷Hithi erui jutdet-lote, kurusar atum rat aphan dovan athak kephrin athok lapen kejelang athok-hei hei pinangji. Anke nangtum kadokave aphan ta nening ingsamjinpo. Ne, Keklem-un a-HEMPHU si kepulo.”