Read Karbi EZEKIEL 44 Bible Online

EZEKIEL 44 - Karbi bible

EZEKIEL 44

¹Kardomhem angtan angkang anat bangso amonit neliphan nepondet lo. Inghap ingkirchek,

²lapen neliphan HEMPHU pulo, “Laso anghap ke kaiketa ingkirhetverpo, lapen kaita ingpupelo. Monit ajat badu aphan ta la pa-ot longle, pima Ne, Israel a-Arnam si la pen lut-tang-lo. La ke ingkirhet-verpo.

³Kepangribom arechoso ke, tebonseta, ne ingno kangthir a-an chodamlongji. Adu si kelut angdeng ajakan pensi la lutpo lapen barpo.”

⁴Anke bangso amonit neliphan nirep anghap anat Kardomhemthepi athengno neponlo. Neli thek-long-lo, HEMPHU a-Kardomhemthepi alangli kedo keturbong atur keplengset thek-long-lo. Neli longle ardomkhrup lo,

⁵lapen neliphan HEMPHU nepulo, “Monit aso, nang kethek-long lapen karjulong asontin nangning chebinon. Kardomhemthepi aron-atang-heihei ne nangphan nangthan po. Komatma amonit aphansi palut-longji ma lapen kelut longlema tokpamenon.”

⁶Lahei kethurkrap Israel aso atum aphan thannon, Ne, Keklem un a-HEMPHU latum kehijim meme akam keklem apot chepaningding un-elo.

⁷Nephan athu lapen avi athok-heihei nekepi ahut reng kecherot-re bang adet amonit atum aphan, nephan kechinine arat atum aphan kepalut pen ajok latum ne Kardomhemthepi pasa-urlo. Lasonsi ne rat aso atum latum kehijim meme akam-heihei keklem pan ajok ne kechetok aloh phrilo.

⁸Latum Ne Kardomhemthepi kangthir aron-heihei keputang alam ano chevarvedet-lo, bonta kalile bang adet amonit atum aphan si pachehemphu-toilo.

⁹Ne, Keklem-un a-HEMPHU si pache-thang-lo, reng-kecherot-re abang adet aso atum, Nephan kekroikre atum, Ne Kardomhemthepi lut-longle, Israel angbong kedo bang adet aso inutbak ta lut longle.

¹⁰Neliphan HEMPHU pulo, “Nephan ne-obub si kumlin-heihei karcho rap-rap a-Israel arat atum aphan penpen Levi atum aphan Ne adukpilo.

¹¹Inghap kehonpen lapen Kardom-hemthepi along kam keklem pen ajok latum nephan ingduk tahai. Rat atum kephrin athok aphan kevan api pathi tahai, lapen rat atum aphan kangdukjisi latum adeng cheklem tahai.

¹²Bonta Israel arat aphan kumlin keparcho akam keklem apot lapen lasonsi rat aphan pap kejapon apot, Ne, Keklem-un a-HEMPHU, latum aduk phonangji pusi seme tang-lo.

¹³Latum nephan kurusar pu ingduk longlelo, mate Kangthirnei Adim lut-longlelo. Lahelo latum kehijim meme akam keklem apot kephonangji aduk-lo.

¹⁴Kardomhemthepi along keklemnangji kamso si Ne latum aphan paklemtoilo.”

¹⁵Keklem-un a-HEMPHU pulo, Zadok aropen kevang Levi akhei atum Israel arat kedo-an Nepen kesui ahut seta latum abang ke Kardomhemthepi along kekroi-thirklong pen Nephan ingdukbompo. Non lasi latum si nephan ingdukpo, lapen Ne ingno athu lapen vi athok-heihei nephan nepipo.

¹⁶Ne Kardomhemthepi arlo latum si lut-longchotji, lapen dovan along ingduk longchotji, lapen kardomhem karcho pajalongji.

¹⁷Kardomhemthepi arlo atikup anat inghap atovar pen latum kelutdam ahut, latum pe kanglit chingthang nangji. Latum arlo atikup kam keklembom un ahut mate Kardomhemthepi arlo akaprek ul ahon pen keselam ape chingchoi nangnelo,

¹⁸Anke latum ang-i vangvelo, latum pe-kanglit apoho chephung nangji lapen pe-kanglit arikong inangji, bonta vamkok kali.

¹⁹Ingtan atikup damde aphrang latum, monit kedo adim latum aphrangsi Kardomhemthepi along pe-ri chephlok si lapen lahei kangthir angdeng chebitekang nangji. Rat atum pen kangthir ape kesa-ur-e-detji aphan latum akaprek ape chingthang-pon nangji.

²⁰Kurusar atum chu chesoilongledet nangji lapen ke achu ta chepading-o longledet nangji. Latum isi chelonchit si chebi nangji.

²¹Arlo atikup kelut aphrang kurusar atum hor junjedet nangji.

²²Badu akurusar ta bang ketitang a-arloso aphan en-edet nangji; la Israel angbong a-okarjang si pangrinangji mate akaprek akurusar ahemepi aphansi pangri nangji.

²³Kurusar atum nerat atum aphan kopisi kangthir ma lapen kopisi kangthirthe ma thannangji, lapen kopisi aron ateng kangthir ma lapen kangthirthema.

²⁴Kechehilisei alam dolo pulote, kurusar atum ne aron-heihei atengpen ingsainangji. Ne kebi aron-atang ateng pen dhorom arong-aje bi nangji, lapen latum Kesang arni Pangthir-etnang.

²⁵Kethi arpum ke-ot pen ajok, kurusar inut aron-ateng ingthir-et-edet nangne, jongsi la apo-apei apok, asomar apok mate akor apok mate penan kedode angjir apok kalite.

²⁶Alangli ingthirthu-et aphi alangli ni throksi inghong nangji,

²⁷lapen Kardomhemthepi arlo atikup damsi alangli kangthirji aphan athok pidamlote, alangli puthot Kardom-hemthepi ingduk unpo. Ne, Keklem-un a-Hemphu-si kepulo.

²⁸A-ove ove ta kurusar atum kelong nangji kurusar apharman Ne Israel atum aphan kepitang ateng longpo. Latum Israel along akhi chebi longle; latum kenangji an ta Ne helo.

²⁹Soksang adan-heihei, pap athok-heihei lapen kechetu adan-heihei ke kurusar atum a-anlo, lapen Israel along Nepharman Ne kebipi amar asontin latum deng nangji.

³⁰Kerot-kerimcheng angbongpen akemenei lapen Nephan nekepi asontin kurusar atum si cho-enpo. Aphongtin ta rat atum him selampo, keselamcheng ahim kurusar atum aphan si latum dan pura pinangji, lapen nehirjume latum ahem aputhak dopo.

³¹Kurusar atum amethang kethi avo mate api mate pi hijan kechepathi api chonangne.