Read Karbi EZEKIEL 45 Bible Online

EZEKIEL 45 - Karbi bible

EZEKIEL 45

¹Akheitin aphan apharman alongle kethak ahut, ephan ke HEMPHU aphan panong nangji. La arjon kilomitar 12 ra ebeng lapen arpan kilomitar 10 donangji. La angkang an ke ingthir-et nangji.

²Laso angkang angbong Kardomhemthepi ahem aphan pangkangchen atok-phli alongle do nangji, atoktin ta ingrup pharopho donangji, lapen ingrup phokep arpan kekomchen aklam donangji.

³Laso angkang achitim ke, lake kilomitar 12 ra ebeng arjon lapen arpan kilomitar 5 punchen nang ji; Ladaksi Kardom-hemthepi dopo, kangthirnei adim.

⁴La ke det angbong kangthir adimlo, Kardomhemthepi along HEMPHU aphan kangduk akurusar atum apharmanlo. Ladaksi latum ahem-heihei lapen Kardomhemthepi ahem aphan dorpo.

⁵Akaprek ebeng alongle abang ke ingrup suri ingkoirapho arjon lapen ingrup surikep avarkethe adang Kardomhemthepi along kam keklem a-Levi atum pachehemphuji aphan bipivet nangji. Hadak latum kedoji aphan rongso dopo .

⁶Laso adung-arei ingrup suripho avar lapen ingrup suri ingkoirapho arjon ke kangthir arongsopi alongri lake Israel arat aso aphanlo.

⁷Kepangribom arechoso aphan longle bi pivet nangji. Kangthir angkang nichi ahoi pen la Mediterran a-Talo anichi an le dampo; lapen nihang anat ahoi pen la ha det ahoi anihang anat an le dampo, lasi la adang kethe lake Israel akhei angbong kepi adang asonthot si longpo.

⁸Laso adang bithe ke Israel adet arechoso kelong nangji apharman alonglelo, anke labangso abang rat atum aphan mo-ta cheneknelo, bonta det ahin alongle an ke Israel akhei atum aphan si pacherailong po.

⁹Keklem a-HEMPHU pulo, “Nang Israel kepangri atum, nangtum pap keklem ajirding-ong-lo! Nangtum kephangno lapen kechenek ingtonnon. Kopisi akeme lapen ahokpet ma la klemnon. Nangtum Nerat aso aphan halatum alongle pen kai seta phlungri. Ne, Keklem-un a-Hemphu-si, laso alam kepulo.”

¹⁰Abangphutin ta ahokpet alin lapen athuli si en nangji:

¹¹Ephah ke akekreng alin aphan lapen Bath ke alang alin aphanlo. Keteng isi ke Homer helo. Alin athe lason helo: 1 a-Homer = 10 ephah = 10 a-Bath

¹²Nangtum alin lapuson nangpo: 20 a-gerah = 1 shekel 60 shekel = 1 mina

¹³Lasonsi nangtum dan pi nangji: a-Homer tin asoktipli along pen ephah phanthrok pen ephan, lapen a-homer tin asoktipliso along pen ephah phan throk pen ephan,

¹⁴lapen jangthu keteng kepathik lahelo, a-kortin along pen phan kep pen ephan a-both (Kor ta homer ason, bath kep do);

¹⁵lapen jon pharohini abiresak angbong pen ejon, Israel ahemtun an angbong pen. Soksang athok, kephrin athok, lapen ningkangsam athok lapen latum apharman ketu athok-heihei la helo, HEMPHU Arnam si kepulo.

¹⁶Det arat atum an laso athok Israel arechoso aphan pi nangpo.

¹⁷Chiklo Kemi Arong-aje-heihei, Kesang arni-heihei, lapen akaprek arong-aje-heihei along Israel akhei kedo-an aphan arpum kangthim kephrin api-heihei, sok-sang athok-heihei, drakha-ahorlang athok-heihei kepador nangji alangli kamlo. Pap athok-heihei, sok-sang athok-heihei, arpum kephrin athok-heihei, lapen kejelang athok-heihei, Israel arat apap-heihei kechamji aphan alangli si pador nangpo.

¹⁸Keklem-un a-HEMPHU pulo, “Ke-chengsi achiklo kecheng arni nang, aju kavepin kemesen achainong alo ejon athok pinangji lapen Kardomhemthepi pangthir nangji.

¹⁹Laso pap athok ajehak avi kurusar abang ponpo lapen Kardomhemthepi inghap anujok along, dovan anu-heihei along, lapen arlo atikup anat kedam inghap atovar anujok-heihei along hi nangpo.

²⁰Chiklo, throksi arni lason thot nang mane jongsi kechenam kalipin pen pap keklem mate chinine pinpen keklem apap apharman klem nangpo. Lasonsi nang Kardomhem pangthirverpo.”

²¹Kecheng achiklo krephli arni nangtum Kejok Arong-aje talonpo. Ni throksi an abangphutin ta thap kave ahim si chopo.

²²Rong-aje kecheng arni, kepangribom arechoso chainong alo ejon isi alangli lapen arat atum apap-heihei athok papinang.

²³Ni throksi arni aphongtin arong-aje HEMPHU aphan alangli jon throksi achainong alo lapen jon throksi akehingno kavepin abiresak alo athok pinangji lapen lahei arpum pen phrin-et nangji. Alangli arnivang ta ejon abi alo pap athok pi nangji.

²⁴Karkli ajontin achainong lapen abiresak aloso along lin 17.5 asok lapen jit ajangthu lin thom pidun nangji.

²⁵Kechepachong-heihei Arong-aje aphan, la throksi achiklo krepho arni si kecheng, rechoso abang ni throksi arni aphongtin aphrang asonthot si pap athok lapen arpum kephrin athok-heihei, lapen sok-sang lapen jit ajangthu athok aphrang asonthot pinangpo.