Read Karbi EZEKIEL 46 Bible Online

EZEKIEL 46 - Karbi bible

EZEKIEL 46

¹Keklem-un a-HEMPHU pulo, “Kesangse ni throk arni arlo atikup adang nihang anghap atovar abang ingkirchek nangji, bonta la Kesang arni lapen Chiklo kemi arong-aje ahut ingpu nangji.

²Ingtan atikup adang pen kepangribom arechoso abang inghap atovar pen ajok kelut angdeng lutdampo lapen kurusar atum alangli akangthim athok lapen kejelang athok-heihei kephrinpi ahut alangli inghappi anujok adung arjap-dingpo. Inghappi along alangli archovek nangji lapen an si puthot ingtan damthupo. Arni ingsamsetik an inghappi ingkirkedet nangji.

³Aphongtin a-Kesang arni lapen Chiklo kemi a-Rong-aje ahut rat atum HEMPHU aphan inghap-pi athengno ardom si archo nangji.”

⁴Kesang arni HEMPHU angno rechoso abang akangthim kephrin athok aphan jon throk abiresak aloso, ejon abiresak alo, akemesen pen van-nangji.

⁵Ajontin abiresak alo along lin 17 ra powa hini asok lapen ajontin abiresak aloso along alangli aning kehang aling kepiji ason van nangji. Lasonsi sok-sang adan athok aphong tin alangli jit ajangthu lin thom van nangji.

⁶Chiklo kemi a-Rong-aje ahut chainong aloso ejon, biresak aloso jonthrok, lapen biresak alo ejon, kedo-an ta akemesen pen alangli van nangji.

⁷Ajontin achainong alo lapen abiresak alo athok kepi ahut lin 17 ra powa hini asok, lapen ajontin abiresak aloso athok kepi ahut rechoso kepiji aning kehang aling van nangji. Lason sok-sang athok kepi aphongtin along lin thom ajit ajangthu van-nangji.

⁸Rechoso abang kelutcheng angdeng anghap atovar ovek nangji lapen nangkelut atovar thot ingtan chedamthu nangji.

⁹Arong-aje ahut rat atum HEMPHU aphan karchoji kevang ahut nirep an anghap pen nangkelut atum an nitur anghap anatthu pen bar nangji lapen nitur anghap anat pen nangkelut atum an latum archo tangdet aphi nirep anghap anat pen ingtan bar nangji. Kelut atovarthot abangphutin ta pachevoi thuthedetnang, bonta akaprek anghappi pen pabarlonang.

¹⁰Rat atum kevang ahut Rechoso ta pavangnangji, lapen latum ke-o ahut pa-onang.

¹¹Kecho-kejun amei arni lapen rong-aje-heihei arni chainong lapen biresak alo ajontin along sok-sang lin 17 ra powa hini pi dunnangji lapen biresak aloso ajontin along karcho atum aning kehang aling pi dun nangji. Sok-sang athok aphongtin jit ajangthu lin thom pi nangji.

¹²HEMPHU aphan kepangribom arechoso ningkangsam athok kepiji ninghang pulote, arpum kangthim kephrin athok setame mate isi kejelang athok setame, alangliphan nihang anghappi arlo atikup ingpu pidang nangji. Kesang-arni athok kepi ahut asonthot si alangli athok pinangpo, lapen alangli puthot damjui aphi inghappi ingkirthip nangpo.

¹³HEMPHU pulo, “Adapvang ningkan isi abiresak aloso akemesen HEMPHU aphan akangthim kephrin athok pinangji. Laso athok lake arnivang si pi nangji.

¹⁴Lapen arnivang ta lin ni athengthe aduk athok thengthe aduk pen kepangvuiji aphan elin ajit ajangthu pi nangji. HEMPHU aphan kepajir laso athok ke kaike doverpo.

¹⁵Biresak aloso, thengthe aduk, lapen jit ajangthu-heihei HEMPHU aphan kaike ta adapvang pinangji.”

¹⁶Keklem-un a-HEMPHU hukum-heihei pilo: “Jongsi kepangribom arechoso kecherai alongle asopo atum angbongpen inutbak aphan dan piji pulote, ahemtun akhi asonsi halabangso asopo chepahemphu longpo.

¹⁷Bonta kepangribom arechoso jongsi alongle kam keklembom atum angbong inutbak aphan kepiji pulote la Kangthur a-Ningkan nanglelote la rechoso akhi plang thudetpo. La alangli chepahemphu longpo, lapen alangli lapen alangli sopo si kaike aphan chepahemphu longpo.

¹⁸Kepangribom arecho abang rat atum alongle thi longle. Alangli sopo aphan kepiji alongle jokta alangphan kepi alongle angbong pen nangji, la lote alangli nerat aso alongle kethi pen ajok latum aphan chenekne detpo.”

¹⁹Anke bangso amonit neliphan arlo atikup adang nitur anghap adung nirep anat kepangno kelutcheng angdeng-heihei anat neponlo. Lahei ke kurusar atum aphan kangthir angdeng-lo. Alangli nichi kedo angdeng-heihei anat elong adim jong-lo lapen pulo.

²⁰“Laso adim ke pap athok mate kechetu athok-heihei kepitang a-ok kurusar atum ke-up, lapen thengthe-aduk ahim keselam adimlo, anke kangthir amar ingtan atikup ponsi rat aphan phangno jok-phlotpo.”

²¹Anke alangli neliphan ingtan atikup anat nepondet-lo,

²²lapen neliphan atok-phli atok-anotin nelipa-klang-lo, hadak isi bimuchot atikup do, ingrup 40 keding lapen arpan ingrup 30 do.

²³Asitin ta isi komchen arlong arpong do, lapen me kethor adim-heihei arpong athengno do.

²⁴Bangso amonit neliphan pulo, “Lahei ke rat atum kepi athok-heihei kardomhem aban atum ke-up atundang-heihei ahemlo.”