Read Karbi EZEKIEL 47 Bible Online

EZEKIEL 47 - Karbi bible

EZEKIEL 47

¹Bangso amonit neliphan puthot Kardomhemthepi kelutcheng anghap anat nejaponlo. Kelutcheng anghap aber pen lang nangli si nihang anat lilo. Kardomhemthepi kepangno anat. Kardomhem nitur abeng pen langlisi dovan anitur ahin anat lilo.

²Bangso amonit neliphan nirep anghap anat kardomhem adang pen nepondet-lo, lapen nihang anat kepangno anghap komchen nejaponlo. Nitur ahin anghap along lang jengso livoilo.

³Alangli kepun-i apun pen bangso amonit ingrup suri isi nihang anat keli alangjeng punlo lapen neliphan langjeng soding lang pahat-lo. Lang neli kengsak an si inglumchot-lo.

⁴Anke alangli akaprek ingrup suri isi punlo, lapen lang neli kengphu an inglumlo. Puthot ingrup suri isi aber punlo, lang nelivam an inglumlo.

⁵Alangli ingrup suri isi an puthot pun thulo, lapen hadak langjeng lapu-an arnuk-lo, neli hat un-edet-lo. La kevekpet pen apar hat un-e.

⁶Alangli neliphan pulo, “Monit aso, la kedo-an tok pamenon.” Anke bangso amonit neliphan langroi akung neponthudet-lo,

⁷lapen neli hadak le si hadak lang akung kung ke-ongdung athengpi arong-heihei neli thek-long-lo.

⁸Neliphan alangli pulo, “Bangso alang nihang anat lapen Jordan Arlok aber lapen ha Kethi a-Talo an det soding lilo. La Kethi a-Talo along keli ahut, halaso angti alang along lang kereng pang-vuilo.

⁹Langjeng keli aling ajat ajat api lapen lang-a-ok kedo-an ta dolo. Langjeng alang si Kethi a-Talo alang pangthirpo, lapen la keli aling, la chethe vanpo.

¹⁰Engedi alang amek pen Eneglaim alangmek soding, talo akung ok-keri atum dolo, lapen haladak latum kepakrengjisi alan-heihei chetesarpo. Mediterran a-Talo along son ko-an alang-ok kedoma la an sose ongdung alang-ok hadak dopo.

¹¹Bonta inghan ajo alang lapen langbi-heihei akung soding alang pamirak-redetpo. Lahei hadak ingti atiri asonsi dopo.

¹²Langkung lahin lahin ajat-tin athengpi arong-heihei kepacholong jisi arong vangpo. Lahei arvo kaita chingjuijedetpo, lapen lahei athe kepathe kaike seta ingtontedetpo. Lahei chiklo ajontin ta athe kemi patheverpo, pima lahei aphan Kardom-hemthepi pen keli alangjeng si lang piverpo. Thengpi arong-heihei an padorpo, lapen lahei arvo rat atum keso kemeji aphan enpo.”

¹³Keklem-un a-HEMPHU neliphan pulo, “Khei krehini atum penpen Joseph akhei phanni longle keche-thakji ahoi lahei helo.

¹⁴Nangso nangsu aphan ne chechakpamelo, laso alongle ne latum aphan pidetpo; non latum angbong eteng isi thak non.”

¹⁵Nirep ahoi ke nihang anatsi damlo, Mediterran a-Talo pen ha Hethlon arongsopi, ha Hamath atovar, ha Zedad arongsopi anat an,

¹⁶Berothah arongsopi lapen Sibraim arongsopi an (lahei Damaskas lapen Hamath adet adak si kedo), lapen Tikon arongsopi an (Hauran alongri ahoi alongsi kedo.)

¹⁷Lason si Nirep ahoi ke nihang anat Mediterran pen ha Enon arongsopi lake Damaskas lapen Hamath anirep anat alongri ahoi damlo.

¹⁸Nihang ahoi ke nitur anatsi damlo, lake Damaskas lapen Hauran angbong elong adim pen, Jordan Aroi si nichi anat Israel lapen nihang anat Gilead ahoi paplang-lo, la Kethi a-Talo anat Tamar anat anlo.

¹⁹Nitur ahoi ke nitur-nichi anatsi damlo, lake Tamar pen ha Kadesh Meribah alangbi, lapen nirep-nichi soding damsi ha Ijip ahoi Mediterran a-Talo anat an.

²⁰Nichi ahoi ke Mediterran anat soding lapen nirep anat damsi ha nichi Hamath a-Tovar anat elong adim an ledamlo.

²¹Laso alongle nang khei atum ang-bong thaknon;

²²lake nangtum kaike aphan amarlo. La nangtum kethak ahut bang adet aso nangtum angbong nangkedodun atum aphan, lapen ladak amahang kethek atum asomar atum aphan apharman pinangji. Latum aphan Israel aso asonthot si langpon nangji lapen Israel atum penpen longle aphan apharman khadot pathurappet nangji.

²³Bang adet aso abangphutin kopi akhei alongsi kedodunloma halaso akhei arat along apharman longdunpo. Ne Keklem-un a-Hemphu-si kepulo.