Read Karbi EZEKIEL 5 Bible Online

EZEKIEL 5 - Karbi bible

EZEKIEL 5

¹HEMPHU pulo, “Monit aso, kereset anokjir epak enon lapen la nang ingmum lapen nangchu kechesoi-ijile ennon. Anke thuli along chu lin non, lapen la thak-thom pinchong non.

²Kekompet tang-et lote la rongsopi along thakthom pen ethak abang me pachodetnon. Nang rongsopi angtan kedampo pu ahut ethak abang nokjir pen ingthan-i non. Ahin athak abang ke tomon ajo pangjar-etnon, lapen la aphi phi ne nokjir pen Ne hungdunpo.

³Asap-o achu chebinon lapen lahei nangpe ade along thitchoknon.

⁴Anke phrira ajehak en thu non lapen lahei me phrindutnon, lapen lahei me pachodet lonang. Lahei pen Israel adet adang bithe me chesangpo.”

⁵Keklem un a-HEMPHU pulo, “Jerusalem aphan pirthe angbong chitim Ne bilo, akaprek adet kedo-an bangpi aphan pakompet-lo.

⁶Bonta nehukum abe Jerusalem thurlo, lapen bangpi akaprek adet hei hei apar hingnomuchot chepaklang-lo, akaprek bangpi aphan kekompet adet-heihei apar kroikremuchot-lo. Jerusalem Ne hukum-heihei dengmolo lapen Ne aron-heihei kroimolo.

⁷Non arjutha, Jerusalem, Ne keklem-un a-HEMPHU kopisi kepuma. Ne aron-heihei kekroikre pen ajok mate Nehukum-heihei kekroikre pen ajok, nangdung arei adet atum apar nang pasungmuchot-lo. Nang akaprek adet atum nim-rokom si endun rong-lo.

⁸La apotsi, Ne klem-un a-HEMPHU, nangtum aphan nangpulang, Ne nang hoturlo. Kadokave adet atum kethek-longphrong adim Ne nangphan ingsaipo.

⁹Pima nang keklem kadokave akam Ne hijimlo, Ne Jerusalem aphan aphrang penta keklemkle pinlang aduk Ne piji lapen puthot kaita klemklelo.

¹⁰Kephola lahelo, Jerusalem along po pei atum asomar aphan chechopo, lapen asomar atum apo apei atum aphan chechopo. Nangphan Ne adukpiji lapen ahin kedo-an aphan bithe-bitha papratseiji.”

¹¹La apotsi, Ne kereng-et Arnam keklem un a-HEMPHU alam lahelo-kehingno an pen lapen kehijim meme akam nang keklem pen nang Ne kardomhemthepi pasa-urlo. Ingjinsose pinpen nangphan nangpipetpo.

¹²Phanthom pen ephan nangmonit atum keso pen lapen rongsopi along kangchir pen thiji; phanthom pen ephan ke rongsopi angtan nokjir pen thipo; lapen ahin ephan abang ke tomon pajap-etsi hijikjamji lapen nokjir pen hungdunpo.

¹³Neningkethi atir an nang phopo lapen Nening ingsamsetik hamhelo. Lahei plang et-lote, nang chinipo, Ne HEMPHU-si nangphan nangkepulo, pima nang akekroithip thekthe Nening pasulo.

¹⁴Nangdung nangrei kedo adet pen kevang kehatput abangphutin nangphan anokan chebi po lapen la kedo pahelopo.

¹⁵Nening kethi ahut, lapen nangpu-thak ning kethipik ahut, lapen nangphan aduk kepi ahut nangdung nangrei kedo-an adet atum pheredukpo.

¹⁶Nangphan nangkelo kecho amar Ne khangpo lapen nangphan pangchirpo. Nangphan nangkepavirji nangke-ap kereset athai aso asonsi kangchir akeso nang longpo.

¹⁷Nangsomar kepathijisi kangchir lapen marat api aphan Ne nangtoiji; lapen nangphan kepathijisi keso kephangno lapen ron nangtoiji, Ne, HEMPHU-si keningjelo.