Read Karbi EZEKIEL 7 Bible Online

EZEKIEL 7 - Karbi bible

EZEKIEL 7

¹Neliphan HEMPHU pulo.

²“Monit asopo,” alangli pulo, “Keklem un a-HEMPHU lasonsi pulo, Ne Israel adet aphansi kepulo: Det kangthim aphan kejut lahelo!”

³Israel akejut nangletang-lo; Neningkethi nang chinipo, pima nang keklemtap apot Ne nang-ingsailo. Nang kehijim-meme a-ot kedo-an apot nangphan Ne alar huilo.

⁴Nangphan Ne nangraire mate nang ingjinsose. Nang kehijim-meme akam-heihei keklem apot Ne nangphan Ne aduk nangpipo, anke Ne si HEMPHU-lo pu nang chinipo.

⁵Keklem un a-HEMPHU lasonsi pulo, “Nangphuthek isi pen isi akevir vangbomji.

⁶La ke bithe-bithalo. Lahelo kejut-lo. Nang jutkok lo.

⁷Det along kedo rat atum nangtum aphan kejut vangbomlo Inglongpi kangthir adim-heihei along ketalon kavedetji lason apor nangletang-lo, kemanghu-lokpo.”

⁸Neningkethi arsem an nang non pho dapprangpo. Nang keklemtang apotsi Ne nangphan nang kangsailo, lapen nang kehijim-meme apot Ne nangphan alarhuilo.

⁹Ne nangphan nangraire mate nang ingjinsose Nang kehijim meme akam keklemtang apotsi nangphan Ne aduk nangpilo anke Ne helo HEMPHU-lo pu nang chinipo lapen nangphan Nesi aduk kepi abang-lo pu chinipo.

¹⁰Israel aphan kevir arni vangbomlo. Kephangno nahokta do. Kecheparoka la ingtuipik-lo.

¹¹Kephangnosi kehingno pa-ong muchot lo. Latum akhi ahir-asang, mate adak-atur, thangnatta avedet-lo.

¹²Apor vangbomlo. Kenam kejor ajor kavedetji arni tebok-het-lo, pima abangphutin aputhakta Arnam aduk kepi ateng isinat-lo.

¹³Badu abeparita alang ko-an ma alekepangbo kechelongthuji aphan dorphlup apor rung-longlelo, pima Arnam aningkethi abangphutin aphuthak-lo. Kehingno atum reng-longlelo.

¹⁴Pong-ut but-lo, lapen abangphutin chesikkoilo. Bonta baduta ron aphan barbe, athema Arnam aningkethi abangphutin aphuthakta isinat.

¹⁵Tovarpi-heihei along kechebohong dolo, lapen lahei along keso lapen kangchir dolo. Badutame det pen ingtan damlote kechebohong pensi thinangpo, lapen rongsopi arlo kedo atum keso lapen kangchir pensi thipo.

¹⁶Vothung atumle pheresi arlok-heihei kekat asonsi ajehak atum ke inglongthepi anat katpo. Latum kadokaveta apap-heihei apot chirupo.

¹⁷Abangphutin ari ainihakpo lapen akengphu klemhurpo.

¹⁸Latum pethoila che-umsi latum aputhak kepherememe si dippo, lapen abangphutin aphuthak ketherak vangpo, lapen aphu chunkoikaipo.

¹⁹Kedengmo asonsi latum aser arup tovarpi-heihei varpreji, pima HEMPHU aningthilote ser, rup latum aphan pajok un-e. Latum aningkehang kepaplengji aphan lahei latum en un-elo, mate apok chepangkrang un-elo. Ser rup si latum aphan pachopap-lo.

²⁰Ihut isi kechingthang adorson keme apot cheparokalo, bonta latum lahei kehijimmeme akumlin-heiheisi selam ilo. La apotsi latum akhi HEMPHU latum pahijimlo.

²¹Latum aphan bidet aso atum panghutoiji, pu HEMPHU pulo, “Lapen aron kangdi atum latum akhi pon-etji, lapen la pasa-urpo.

²²Ne kardomhemthepi pasa-ur seta, kanghu atum la phangno lapen la pasa-ur seta Ne langdundingji.”

²³Asontinta manghumeme det prankarmut atumsi plengset lapen rongsopi-heihei kephangnosi plengset.

²⁴Ladak Ne kehingnonei adet vanji lapen latum nanghem-heihei pacheraidetpo. Latum aphan nangtum karcho adim-heihei kepasa-ur ahut nangriso kangtang atum aning kechethe avedetpo.

²⁵Ning kerun vangbomlo. Nang ningkangsam cheripo lapen la kaita longledetpo.

²⁶Isi kevir pen isi vangbompo, lapen isi chingthunlen kehingno abirta vangbompo. Montri atum kopisi paklangthek jima pu nang choningripo. Kurusar atum rat aphan kethanji ason thangnatta avedetpo, lapen arleng kesar atum than paremovedetpo.

²⁷Recho chiru po, rechoso atumta ning chethethelo, lapen rat atum pheresi klemhur po. Nang keklemtang an apot Ne nangphan aduk nangpipo, lapen nang bang aphan kangsai asonthotsi nangphanta ingsaipo. La pen ajok, Ne HEMPHU lo pu nangphan paklang-lo.