Read Karbi EZEKIEL 8 Bible Online

EZEKIEL 8 - Karbi bible

EZEKIEL 8

¹Etum ban kedam throk aningkan, throk achiklo, pho arni, Judah pen ban kedam ajalin atum nehem along neli pen ingnikurlo. Menmen Klem-un a-HEMPHU ajakong neliphuthak vang-lo.

²Neli angsong lang-lo lapen me arje amonit ason thek-long-lo. Avam pen aber an abang me ason lapen avam pen athak an la kangthitang atam kedoi-et ason.

³Ari ason thak thak la chirung-lo lapen neliphan chu pen kompet-lo. Anke laso akethek-long Arnam akarjong neliphan sining-inghun angsong nerungtang-lo lapen neliphan Jerusalem nepondet-lo. Alangli neliphan kardomhemthepi nirep anghap arlo nepondet-lo, hadak Arnam aphan aning kepaso akumlin isi dolo.

⁴Hadak Israel Arnam dolo pu angthek keturbong atur neli thek-long-lo, Keba Aroi along ne kethek-long ahut asonthot.

⁵Neliphan Arnam pulo, “Monit aso, nirep anat langtha.” Neli lang-lo, lapen hadak inghap atovar kelutdam adung dovan akung neli Arnam aphan ningkepaso akumlin thek-long-lo.

⁶Neliphan HEMPHU pulo, “Monit aso, keplangbom alam nang kopisi kethek-long-loma? Israel arat keklembom kehijimmeme amar langtha, nephan netoi pahelobomlo ha nehem kangthir pen. La apar man kedamphak amar nang thek-longji.”

⁷Neliphan alangli ingtan atikup amangho along nephan nepondet si paisong angkok nepaklang-lo.

⁸Alangli pulo, “Monit aso, ladak paisong etnon.” Neli etsi inghap isi long-lo.

⁹Neliphan Alangli pulo, “Arlo lutdamra latum kehingno lapen kehijimmeme akam hadak keklem langdamtha.”

¹⁰Lasi neli arlo damlo lapen lang-lo. Paisong along pherui-heihei lapen kangthirthe api arjan-heihei si plengset lapen akaprek Israel atum karcho ason-heihei do.

¹¹Bang throksi kep Israel ajalin atum dolo, latum angbong Shaphan asopo Jaazaniah ta dolo. Abangphutinta methek aharlung otdongsi methek pen amehi thur lo.

¹²Neliphan Arnam arjulo, “Monit aso, Israel ajalin atum keklemjoi akam thek-long-loma? Latum arjan kedothip angdeng arlosi archo bomlang. Latum kepathedam ke; HEMPHU netum aphan nelangle! Alangli det obub-lo.”

¹³Anke HEMPHU neliphan pulo, “La apar kehijimmeme akam latum keklem nang thek-longji.”

¹⁴Lasi alangli neliphan kardomhemthepi nirep anghap anat nepondet-lo, lapen Tammuz arnam kethi aputhak arloso atum kechiru nepaklang-lo.

¹⁵Alangli arjulo, “Monit aso, nang hala thek-long-loma? La apar kehijimmeme amar nang thek-longji.”

¹⁶Lasi alangli neliphan kardom hemthepi arlo akut nepondet-lo. Hadak kangthir-et angdeng ajakan adung dovan lapen kedam adim angbong bang ingkoirapho pinso amonit do. Latum kangthir-et adim panungkuk-lo, lapen angphun patongkisi nihang anat keklang arni aphan ardomlo.

¹⁷HEMPHU neliphan pulo, “Monit aso, nang hala thek-long-loma? Lahei Judah arat atum ladak nang kethek-long kehijimmeme akam an keklem chot ke aning rengmemelang. Kali, latum vangsi ladak kardomhemthepi along amat klemnangji lapen nephan nening pathimuchot. Langtha, latum un-an nephan ko-an patherak-lo!

¹⁸Latum nening kethi arsem an phopo. Ne latum aphan raire mate ingjinsose. Latum un an nenat kardom-heihei ase patheji, bonta Ne latum aphan arjuje.”