Read Karbi EZEKIEL 9 Bible Online

EZEKIEL 9 - Karbi bible

EZEKIEL 9

¹Anke Arnam kehang neli arjulong-lo, “Ladak vangnon, nang rongsopi aphan aduk kepiji atum an. Nangrideng risim-heihei chevannon.”

²Menmen kardomhemthepi nirep anghap angtan pen bang throk amonit vang-lo, abangphutinta arisim che-otrep-lo. Latum along inut abang pe kanglit chepindeng-lo lapen pine ketokjisi otdong-lo. Latum do-an vangsi tam adovan akung arjaptherlo.

³Anke Israel a-Arnam kedo angthek keturbong atur avengkong kedo api atum pen nangturdang-lo, la kedo adim ha kardomhemthepi ajakan anat damvoilo. Pe kanglit kechepindeng abangphan HEMPHU hang-lo,

⁴“Jerusalem arongsopi adang bithe damra rongsopi along kehijimmeme akam an keklem apot aning keduk lapen kesung atum abangphutin atehang along isi angthek binon.”

⁵Anut kaprek abangphan Arnam kehang neli arjulong-lo, “rongsopi soding, la along dunnon, lapen pathinon. Badu aphanta pajok longri, badu aphanta ingjinsori.

⁶Arleng kesar aphan, risomar aphan, okarjang atum aphan, pei atum aphan, lapen osomar an aphan pathilapnon. Bonta atehang athak angthek kedo atum aphan paphori. Ladak Ne kardomhemthepi along karjap phrong ajalin atum aphan pen cheng-lok.”

⁷Latum aphan Arnam pulo, “Kardom-hemthepi pasa-urnon. La atikup-heihei kethi arpumle paplengsetnon. Kam chengnon!” Lasi latum rongsopi arat aphan kepathi pangcheng-lo.

⁸Kepathibom ahut, hadak neli nutvet. Longle athak neli domkhrupsi hang-lo, “Keklem-un a-HEMPHU, nangli Jerusalem aputhak lapu-an ningthiloma, la Israel angbong ahin arat abangphutin aphan kepathi etji?”

⁹Arnam thak-lo, “Israel lapen Judah arat atum apap kethe dung apot adai do. Det adang bithe latum pran armut-lo, lapen Jerusalem vi kepabu akam pensi plengset-lo. Latum pulo, Ne HEMPHU-si latum adet obub-lo, lapen latum aphan Ne langlelo.

¹⁰Bonta Ne latum aphan jinsoselo; latum bang kaprek aphan kosonsi keklemma lasonsi Ne latum aphan klempo.”

¹¹Anke pe kanglit kechepindeng abang nangchevoisi HEMPHU aphan kelang atum thanlo, “Nangli hukum-heihei neli klem patang-lo.”