Read Karbi DANIEL 1 Bible Online

DANIEL 1 - Karbi bible

DANIEL 1

¹Judah arecho Jehoiakim Recho kecho kethom aningkan, Bebilon arecho Nebukadnejar Jerusalem lapen komjir arongsopi an tengkheng lo.

²HEMPHU alangliphan recho Jehoiakim lapen Kardomhemthepi ajehak akhi-heihei paponlong-lo. Alangli, Bebilon adet amethang a-arnam-heihei anat alanglilong ajehak amonit nepsi chevoilo, lapen Kardom ahem khipuru-heihei along kevanlong akhi-heihei thap-lo.

³Recho, alangli asaikhi atum angbong akethenei Ashpenaz abang aphan Israel pen kevan recho ahem lapen arlengkethe ahemtun pen risomar pangvaitoilo.

⁴Halatum athok kedo abang, reset, kam kethan long-tang, kecharli keprap, lapen abang apun kechok lake angthek avepin nangji, la lote halatum recho ahem kam keklemji aphan unpo Ashpenaz ke halatum aphan Bebilon alam ketok-kelang pathantoilo.

⁵Recho ahem asor kecho a-an lapen ahor arnivang halatum aphan recho papitoilo. Lason ningkan kethom kam kethan tangdet aphi, halatum recho angno cheklangnangpo.

⁶Kangvaitang atum angbong Daniel, Hananiah, Mishael lapen Azariah helo, latum do-anta Judah akhei penlo.

⁷Saikhi atum angbong akethenei abang halatum aphan Belteshazar, Shadrak, Meshak lapen Abednego pusi akemi amen irlo.

⁸Daniel, recho ahem a-an kecho lapen ahor kejun-i pen ajok alangli methang aphan chepasa-ur-e detpo pusi chesik-lo, lasi alangli Ashpenaz aphan kerap chohang-lo,

⁹lapen Arnam, Daniel aphan Ashpenaz pen kangjinso palong-lo.

¹⁰Ashpenaz, tebonseta recho aphan pherelo, lasi alangli Daniel aphan pulo, “Nangkopisi chonangjima, jun nangjima la recho pathiktang-lo, lapen nang jongsi bang kaprek ariso atum ason kelang apun kali pulote recho neliphan pathilot tahai.”

¹¹Lasi Daniel lapen alangli ri asangho bangkethom aphan Ashpenaz kepahontoi keton abangphu along damlo.

¹²“Nikep nelitum aphan asat nelangtha,” pusi alangli pulo. “Netum aphan arvo ahan-heiheile pichotnon lapen lang le pajunchotnon.

¹³Anle recho ahem a-an kecho arisomar atum pen nepangbar non, lapen netum aphan kethek-long a-arje aphuthak paklangra nangli kepharnangji alam pharnon.”

¹⁴Keton abangphu halatum aphan nikep asat kelangji alam kroidun lo.

¹⁵Nikep jutdet aphi recho ahem a-an kecho atum aphan mute latum kelang lengmuchot lapen ingtangmuchot.

¹⁶Lasi recho kepathiktang a-an pipesi keton abangphu atum aphan halabangso arni pen arvo ahan-heihei si pacholongbomlo.

¹⁷Arnam la bangphli ariso aphan kethek-kere, lamet lapen kechini keri anat asai kethek pilo. La aparta Daniel aphan kethek-long lapen mang alam-heihei kechini asai pilo.

¹⁸Recho kepathiktang ningkan kethom jutdet aphi, Ashpenaz risomar kedo-an aphan Nebukadnejar angno ponlo.

¹⁹Recho halatum abangphutin pen chingkilo, seta Daniel, Hananiah, Mishael, lapen Azariah aphansi alangli ningdok muchot. Lasonsi halatum recho akangsaihem abangphu manlo.

²⁰Jat ason recho arju seta, mate kaprek akesung recho pho seta la bangphli arisomar atum det angbong kaprek sangkelang mate thek-kere atum aphan phankep kechini lit-lang.

²¹Sairas, Parsi arechokethe Bebilon endetdetik an Daniel recho ahem alongsi dobomlo.