Read Karbi DANIEL 10 Bible Online

DANIEL 10 - Karbi bible

DANIEL 10

¹(Sairas, Parsi abang, recho kecho kethom aningkan ethe abirta Daniel mate Belteshazar pu aphan paklang-lo. Birta ke ahok, tebonseta kechiniji sungkrung. Kepathek-long pensi la than pachinilo.)

²Halaso ahut, ne ruithom ningduk-lo.

³Neli kechome ason choche det-lo, drakha alangta junjedet-lo, mate ruithom damdetik nelichuta chingsoksedet-lo.

⁴Kecheng achiklo, 24 arni, neli Taigris langpi akung arjapding lo.

⁵Neli angsong lang-lo lapen inut amonit pe kanglit kechingchoi lapen ajukave ser avamkok kechekok thek-long-lo.

⁶Alangli bang sumpot ason turbong. Alangli mahang sining kebirlak asonsi phlan-o, lapen Alangli mek-heihei me asonsi kar-ang. Alangliphang lapen akeng-heihei tam kepaphlan ason doi-et, lapen Alangli se armu ke-ongpi ase ason.

⁷Neli inutvetsi thek-longchot. Neli-long kedo abang thangta thek-longle, bonta halatum pherelo lapen katsi chepatulo.

⁸Neli inutvetsi hadak donang-lo, lang-mepik la akethek-long, langdingbom lo. Neli jakong avepinlo, lapen nelimahang pu-an prek-lo, neliphan baduta nang chininedet-lo.

⁹Neli Alangli se karjulong ahut neli cheputhekthe pinsi longle along krepbup-lo lapen hadak arum tongdiksi ijoilo.

¹⁰Ansi isi ari neliphan ot-lo, lapen neri-nekeng nelirung-lo; neli ok klemhur bomlang.

¹¹Arnam apherangke neliphan pulo, “Daniel, Arnam nangphan chinghon. Arjapthernon, lapen ne kopima kepu ning nang chebiduntu. Nanglongsi nephan netoilo.” Alangli la putangdet aphi, neli arjaptherlo, seta klemhur bomlang.

¹²Lapen alangli pulo, “Daniel, phereri. Arnam nang kardom-heihei arjulong-lo, kechiniji aphan nang chepabihek arni penlo. Nang kardom kethakjisi vang-lo.

¹³Parsi adet kerai apherangke ni 21 nephan khamkhelo. Seta pherangke akethenei atum angbong Maikel neliphan rap-lo, pima ne inutvetsi Parsi adet dolo.

¹⁴Nang monit atum mo aphi kopi plangjima la kepachinijisi ne vang-lo. Lake mo aphi keplangji akethek-long-lo.”

¹⁵La alangli pudet aphi, nelilamthe avepinsi longle anat lang-lorlo.

¹⁶Ansi kelang monit nangnak apherangke, ari chejotsi neli ingbip-heihei ne-ot-lo. Neli alangliphan pulo, akehai, la bangso akethek-long neliphan pa-aini-si ne-ok keklemhur hamhedet-lo.

¹⁷Ne inut aban ahemphu angno karjapther abang ason, kopusonsi neli nanglipen chingki thekpoma? Neli jakong chethe keche-enji aphan avedet-lo.

¹⁸Ako puthot alangli neliphan ne-ot-thulo, lapen nejakong chelong-muchot-lo.

¹⁹Alangli pulo, “Arnam nangphan chinghon, lasi jatseta nangphan nangning paduk mate paphere longri.” Alangli la putangdet aphi, neli ingtangmuchot-lo, lapen pulo, “Akehai, nangli kopisi neliphan than nangjima nelithan non. Nangli neliphan pamelo.”

²⁰Ansi alangli pulo, ne kopi athesi nanglong vang-loma nang chinima? Ahok aloh athui along ketoktang alam nangphan la kepaklangjilo. Ne non chevoithusi Parsi adet kerai apherangke pen chedan nangji. Laso aphi Grik adet kerai apherangke nang-klangji.

²¹Baduta nephan rapdunji abang avelo, seta Israel aphan kerai Arnam apherangke si nerappo.