Read Karbi DANIEL 11 Bible Online

DANIEL 11 - Karbi bible

DANIEL 11

¹Alangli nephan kerapnangji lapen kerainangji avi.

²Lapen non kopisi ne nangthanloma la ke ahok-lo. Arnam apherangke pulo, “Bang-kethom arecho Parsi adet aputhak pangridet aphi phli abang ke do-an angbong pen keplangnei abangpolo. Alangli jakong lapen akhi ingtuibomsi Grik adet aphan chedanpo.”

³Ansi inut haithor arecho nang-klangpo. Alangli adangthedung adet pangripo, lapen aningkehang alingsi klempo.

⁴Bonta ajakong kethurtik ahut alangli det chephridakpo lapen chetphli chethakpo. La adim alangli pen kevangbon kali abangsi det pangripo, bonta halatum alangli son jakong avedetpo.

⁵Ijip arecho ingtangpikji. Alangli nokbe atum angbong inut abang ingtangpiksi adangthepi adet pangripo.

⁶Penang an aningkan aphi Ijip arecho, Siria arecho pen chepamesi asopi alangliphan penan chopipo. Bonta laso kecheme ajir ding-o-edetji, lapen sopi, la apenan, la aso lapen la along kedun an aban atum aphan pathi-etpo.

⁷Laso aphi, sopi inut adon si recho chopo. La Siria recho aron amuluk aphan tengkhengsi rai-paisong lutchokpo, lapen halatum aphan paremdetpo.

⁸La halatum a-arnam atum akumlin Ijip adet ponpo lapen halaso a-arnam atum aphan kehodaitang aser, arup ajohton-heiheita pon-etpo. Penang aningkan ingsamjin pen kedo aphi.

⁹Siria arecho, Ijip tengkhengpo bonta la aphan methang adet pachevoijuipo.

¹⁰Siria recho asopo atum ron kechedanjisi chesikpo lapen ron aso ongdung pangrumpo. Halatum angbong inut abang ke langthepi kevang asonsi pondetpo lapen hotur apaisong tengkhengpo.

¹¹Aning thihaksi Ijip arecho ron kechedanji aphan Siria arecho abethursi dampo lapen la ongdung aron aso neppo.

¹²Alangli haidetsi ron aso pathilong-o apotsi chepindakpo bonta la kai aphan haiverve.

¹³Siria arecho chevoithusi aphrang an sose ron aso pangrumdampo. Apor keme kevang ahut la ongdung lapen arisim dopet aron aso pen dampo.

¹⁴Ansi ongdung arat atum Ijip arecho abethurpo. Lapen ajehak kethurham amonit atum nangdet pen vangsi abethurji Daniel, pima, halatum isi akethek-long thek-long-lo, bonta halatum remdetji.

¹⁵Lasi Siria arecho pairaikom arongsopita arideng chevandetpo. Ijip aron-aso atum anta ajakong avedetpo.

¹⁶Siria ketengkheng atum halatum aningkehang alingsi khamkhelongle pinpen klempo. Alangli kechaktang alongle along arjaptherpo lapen la kedo-an alangli rideng dopo.

¹⁷Siria arecho alangli kedo-an ron amuluk pen ketengkhengjisi mangpo. Ansi alangli hotur adet kepavirji la pen chepamepo lapen alanglisopi la aphan penan chopipo; bonta alangli kemang alam chunchedetpo.

¹⁸Laso aphi talo pen alanglidet-heihei tengkhengpo lapen ongdung adet aphan haidetpo. Bonta det kaprek asongja abang alangliphan paremdetpo lapen alangli lambek pajutkokpo; Siria arecho alambek alar alangli huipo.

¹⁹Recho amethang adet apairaikom anat chevoithupo, tebonseta alangliphan paremdetpo, lapen la helo alangliphan kejut-lo.

²⁰Alangli phi inut kaprek arecho dopo, alanglidet akhi kepa-ongjisi inut a-saihemphu toipo lapen rat pen midu rungsi chenekpo. Ajirdingdesi laso arecho aphanta pathilotpo, bonta rat angno kali, seta ron along.

²¹Pherangke thanbomlo: “Siria adun arecho abang inut kehingno amonit, recho kechoji ajakong ave, bonta ningthethepin ahutsi la vang-lo lapen lampanglit pen jakong endet-lo.

²²Alangliphan kekhamkhedun abangphan, Arnam akurusarpo aphan tame pavirdetpo.

²³Kechekroidun aloh chetoksi akaprek adet-heihei aphan chobeipo, lapen la ingtangbom si la bihek adet aphrang pacherere pin pen tengkhengpo lapen aphusar atum keklemklepin lang akam klempo. Ansi alangli phi phi kedun atum angbong ron pen kepontang ahormu lapen akhi-heihei chethakpo. La pairaikom-heihei anta ketengkhengji aphan mangpo, seta alangli apor pu amatsi jutkokpo.

²⁴Lapen la ingtangbomsi bihek adet aphrang pacherere pin pen tengkhengpo, lapen aphusar atum keklemkle pin lang akam klempo. Ansi alangli phi phi kedun atum angbong ron pen kepontang ahormu lapen akhi-heihei chethakpo. La pai-raikom-heihei anta ketengkhengji aphan mangpo, seta alangli apor pu amatsi jutkokpo.”

²⁵Ijip arecho aphan ketengkhengjisi angthin chepathelo lapen ongdung ron amuluk ingthurlo, lapen Ijip arechota ongdung lapen kangtangrak ron amuluk pen kechedandunjisi chesik-lo. Bonta Ijip arecho aphan chobeidetpo lapen chunchedetpo.

²⁶Alangli than-pare atum alangliphan pavirdetpo. Alangli ron aso ongdung thipo, lapen alangli ron amuluk avedetpo.

²⁷Ansi banghini arecho tebul isivet along chongnisi chorap-rappo, bonta halatum aning kematha ke akeme kali, lapen halatum lahin lahin chobei seroipo. Apor halatum aphan vangvelang apotsi halatum kopima aningkehang ason halatum longle.

²⁸Kethipon ahormu pensi Siria arechohem chedampo, lapen Arnam arat adhorom kepavirjisi aning chesiktang-lo. La aninghang alingsi klempo lapen amethang adet chevoijuipo.

²⁹Aphi la Ijip aphuthak tengkheng-thuji, bonta laso ahut aphrang ason plengpledetpo.

³⁰Roman atum telongpi pen vangsi laphan khamkhedunpo, lapen la pherepikpo. Ansi aningkethi pen chiruipo lapen Arnam arat adhorom kepavirji bor-ipo. Halaso adhorom ke-otang atum alamsi la arjupo,

³¹La anokbe atum Kardomhem pasa-urpo. Halatum arnivang athok pavedetpo lapen pherememe kehijim amar nangbipo,

³²halaso adhorom keche-otang atum pen pachoreisi recho akerap longpo, seta Arnam aphan ke-otthip atum chedandunpo lapen thedung akam klempo.

³³Ongdung atum pen reset asongja atum bidisore chepipo, bonta malomso aphan ajehak aphan ron along pathipo mate me phrindutpo, lapen ajehak atum aphan inghudetpo lapen kebeng angdeng bengchokpo.

³⁴Kepathibom un ahut ongdung arat methang ale risi halatum along chelangdun seta Arnam arat atum ke asap-o akerap longji.

³⁵Ajehak ke reset asongja atum aphan pathiji, bonta laso pen ajok rat atum ingthir-i-tang-lo. Arnam kethiktang kejut apor vangvetik la dobompo.

³⁶Siria arecho alangli ningkehang alingsi klempo. Ne Arnam atum apar themu pusi chepindakpo, Arnam kethe aparta themulang. Lahei Arnam laphan aduk pipetik-ke la klem unbompo. La kopisi kemang tang ason thak thaksi Arnam laphan klempo.

³⁷Aphusar atum kangduk a-arnam aphan recho mathathulo, lapen arloso atum aning kedok a-arnam aphan jokta mathalo. Chenamsi alangli anut-tin a-arnam aphanta mathathulo, pima halatum aphan mute alanglisi themu pu chemathalo.

³⁸Bonta pairaikom aphan kerai a-arnam aphan thulok-ke la amanpiji. Aphusar atum kangdukde a-arnam aphan ser-rup kechepindeng ason lapen kaprek akhi adan-heihei alangli piji.

³⁹Methang apairaikom keraiji aphan kaprek adet a-arnam aphan karcho atum aphan la rimpo. La aphan kepangri abang pu kedeng atum aphan mankethe piji, Saihem-heihei along kangtui akam lapen halatum aphan longle nong-e asonsi pipo.

⁴⁰Siria arecho apor kejutpo pu ahut, Ijip arecho vangsi tengkhengpo, lapen Siria arecho ronhemkonglong-heihei pen, losei atum pen, telong-heihei rimsi jakong kedo-an pen chedandunpo. La ongdung adet tengkhengpo, la langthepi alang ason.

⁴¹La kechaktang alongle ta tengkheng po lapen ongdung atum aphan pathipo, bonta Edom, Moab lapen Ammon ahin ke jokpo.

⁴²La kedo-an adet-heihei ketengkheng ahut Ijip adet anta jokjelo.

⁴³Ijip adet kepatu akhi-heihei ser, rup, lapen kaprek anong-e kechibi-heihei la pon-etpo. Libia lapen Sudan aphanta paremdetpo.

⁴⁴Seta Nihang lapen Nirep pen kevang abirta la aphan papheredukpo, lapen aningthihaksi ron chedanpo lapen monit pathipo.

⁴⁵Kardomhem karjap lake talo lapen inglongpi angbong recho apehem kimpo. Bonta la aphan kerap abang avepin pen thilotpo.