Read Karbi DANIEL 2 Bible Online

DANIEL 2 - Karbi bible

DANIEL 2

¹Nebukadnejar recho kecho hini aningkan alangli eson amang hemanlo. Labangso amang lapu-an alangliphan pasiksak-lo, alangli amek jangthekthe det-lo.

²Lasi alangli lodeppo atum, mekbin atum, maja kanghoithek atum lapen Chaldia atum an aphan recho amang alam kepathanjisi paphapet-toilo. Lasi halatum recho angno vangpet-lo.

³Lapen recho halatum aphan pulo, “Ne eson amang hemanlo lapen ne laso amang alam kechiniji ingtungpik-lo.”

⁴Ansi Chaldia atum Aramaik alam pen recho aphan thak-lo, “O Recho nangchethe ansose padingnang! Nangli ban atum aphan nangli mang thannon, lapen nelitum mang athe alam nangthanpo.”

⁵Recho halatum aphan thak-lo, “Ne nening chesiktang-lo, nangtumsi nemang nethannangpo lapen labangso athe alam paklangnangpo. Jongsi than thekthe pulote, ne nangtum a-ok ingthan-etpo lapen nangtum ahem anta phri-etsi pavirkoipo.

⁶Bonta jongsi nangtum mang paklangthek lapen laso athe alam than thek pulote ne pen nangtum dan-heihei lapen nong-e-heihei lapen man kethe longji. La apotsi mang alam lapen la athe nethannon.”

⁷Halatum recho aphan puthot thakthulo, “Jongsi nangli mang nelitum aphan nelithan lote nelitum la athe alam nanglithan thekpo.”

⁸Halabangso ahut, Recho asekethe pen thaksi pulo, “Ne chinilo, nangtum kepaderbomjisi apor rilo, pima nangtum mang than thekthete ne nangtum aphan

⁹ejatvet aduk kepi-jisi nening chesiktang-lo pu nangtum chini, nangtum angbong nephan pachoreibomjisi chedonsarlo, pima nangtum ningthelo, apor keme vangsi la prekdakpo. Mang kopima nethannon, anke ne chinipo nangtum mang atheta thanthek.”

¹⁰Kepare atum thak-lo, nangli kopisi chini ingtung-loma la kethan thekji abang dak pirthe athak avelang. Recho kethenei lapen kangtangnei atum seta ludeppo, mekbin klembang atum, lapen kemoithek atum pen lapuson kethan nangji hanghepinlang.

¹¹Nangli kehang ason ke sungpik apotsi baduta la nangliphan than thekthe, arnam-heihei atumsi thanthekchotji seta halatum monit atum angbong dode.

¹²La amat recho aningthihak-lo, lapen Bebilon along kedo kethekkere kedo-an aphan kepathitoijisi hukum pilo.

¹³Lasi halatum Keddan aphan, Daniel lapen alangliri asangho aphan penpen kepathi-et jisi hukumpilo.

¹⁴Ansi Daniel recho angphun kerai abang Ariok along damlo, atheke la aphan kedo-an thek-kere atum aphan kepathiji ahukum pitang-lo. Karju nangji chesikkoi alamthe pen

¹⁵alangli Ariok aphan arjulo, “Kopi athesi recho lapuson kepherememe ahukum kepilo?” Lasi Ariok, Daniel aphan kopi plangtang-loma la thanlo.

¹⁶Menmen amat Daniel recho along damsi mang alam kethan thekji aphan apor chohang-lo.

¹⁷Ansi Daniel ahem chedamlo lapen ajirpo Hananiah, Mishael lapen Azariah aphan kopi plangtang loma thanlo.

¹⁸Alanglitum Bebilon akethek-kere atum along kethidunde detji aphan Sining Arnam pen kangjinso kelong pen kepatu alam halatum aphan kepaklangji aphan Arnam pardomtoilo.

¹⁹Ansi kepatu alam ajo Daniel aphan mek-rengjeng ahut paklang-lo, lapen alangli Sining Arnam aphan chorolo:

²⁰“Arnam ke reset lapen Jakong thepik: Kaike, kaike anta Alangliphan rover nangji.

²¹Apor-heihei lapen asek-heihei Alangli khang; Alangli recho atum aphan bat lapen pasun; Alanglisi recho aphan bat lapen pasun, Alanglisi bidi lapen kechinithek ajakong kepi a-Bang.

²²Karsikpik lapen kepatu alam Alanglisi paklang; Kangting arlo kepatu alam Alanglisi chinipet, lapen Alanglilong kethe-ang doklung.

²³Nephusar atum a-Arnam, ne Nangphan chorolo lapen man pilo. Nang nephan bidi lapen jakong pilo; Ne kardom nethak-lo lapen recho aphan kopisi than nangjima netum aphan paklang-lo.”

²⁴Lasi Daniel, recho athek-kere atum aphan kepathiji ahukum kelongtang abang Ariok along damlo. Alangli laphan pulo, “Halatum aphan pathirinon. Nephan recho along neponnon, lapen ne alangli mang keheman alamjir alangliphan thanpo.”

²⁵Ansi recho Nebukadnejar angno Ariok, Daniel aphan ponserak-lo lapen recho aphan pulo, “Nanglimang athe kethanthek inut a-Judia neli long-lo.”

²⁶Recho, Daniel (Belteshazar pu ta pu) aphan pulo, “Nang ne keheman-tang amang alam lapen la athe-heihei nethan thekjima?”

²⁷Daniel thak-lo, “Recho kehang kepatu alam ke thek-kere atum, majakanghoi atum, kemoithek atum, ludeppo atum, lapen chiklolongso kelangthek atum jokta bangso alam nanglithan thekthe.

²⁸Tebonseta kepatu alam kepaklang abang sining Arnam inut do. Mo aphi kopi plangjima la Alangli pachinitang-lo. Non neli nanglimek kejang ahut keheman kethek-long amang nangliphan thanpo.”

²⁹Nangli mek kejang un ahut mo aphi keplangji alam nangli hemanlo; lapen kepatu alam kepaklang a-Arnam, kopisi plangjima nangliphan paklangtang-lo.

³⁰Nonke labangso kepatu alam neliphan paklangtang-lo, neli kaprek atum aphan bidi do muchot lapu kali, bonta nangli keheman amang alam athe kechini nangji aphan lapen nanglining arlo kevang akematha ason-heihei kechini nangji aphan.

³¹O Recho, isi akumlin thepi nangli ingno karjapdong nangli thek-long-lo, klarbong lapen turbong, lapen kelang pherememepik.

³²La aphu ajukave aser pensi keselam; la aning lapen aphang-heihei rup pensi keselam; la avam lapen amelumbong-heihei tam angchin pen;

³³la akeng-heihei lapen la akengpak ajehak ingchin lapen longle-inghan pen kepangvui.

³⁴Nangli la aphan kelangding ahut, isi arlongkethe, monit ari pen kehonghepin lapen la vangsi ingchin lapen inghan akumlin akeng tongphunsi pangje-ilo.

³⁵Ansi men men amat ingchin, inghan, tam, rup lapen ser kedo-anta ingje-ilo lapen barla ahut sok kejap aduk nangnak-lo. Tomon pon-etsi angthek pavedet-lo. Bonta arlong inglong akethe cheplangsi pirthe adang kupthip-lo.

³⁶Mang lapuson helo. Non neli recho aphan la athe kopima than po.

³⁷Nangli recho atheng, nangli recho atum angbong kethenei arecholo. Sining a-Arnamsi nangliphan recho kethe bat-lo lapen jakong-horang, kangtang-kangsak lapen adak-atur pitang-lo.

³⁸Alangli nangliphan pirthe adang kedo-an aputhak kechari abang battang-lo lapen kadokave marat-mareng api atum aputhak, votek-voso aputhak, kepangri abang battang-lo. Nangli helo ser aphu lo.

³⁹Nangliphi puthot kaprek inut parechoji, la nangli an kethe kali, lapen laso aphi kethom arecho, isi tam-angchin arecho, lasi pirthe adang pangripo.

⁴⁰Lapen phli arecho dopo, la ingchin ason ingtangrak, pachingdatpre lapen asontinta ing-lok un lapen ingchinle pachingdatpre ason, la pachingdatpreji lapen aphrang arecho arat an sorlampo.

⁴¹Akengpak lapen akengchimun ajehak longle-inghan lapen ajehak ingchin, nangli la jokta thek-long-lo. Labangso athe ke la isi kephlakdak adet plangpo. Lake ingchin ingtangrak ason dopo, pima la ingchin pen longle-inghan pangvuilo.

⁴²Akengchimun ajehak ingchin lapen ajehak longle-inghan, la athe ke ebeng adet ke ingtangrakpo lapen ebeng ke ingtangtedetpo.

⁴³Nangli thek-long-lo, ingchinta longle-inghan pensi pangvuilo. Labangso atheke kepangri atum pangripangdon akam pen ajok halatum ahemtun-heihei isi-vet kevanji aphansi bor-ipo, bonta la halatum aphan plang un-edetpo, pima ingchinke longle-inghan pen chingvui un-e.

⁴⁴Halabangso kepangri atum ahut, sining arecho inut isi arat sengpo, lapen la kaita jutje detpo. La aphan baduta parem un-elo, bonta halahei arecho arat kedo-an pavir-detpo, lapen kaike aphan doverpo.

⁴⁵Arlong kopusonsi monit ari pen la kehong kalipin lapen la kopusonsi vangsi ingchin tam, longle-inghan, rup lapen ser pen kepinchong akumlin aphan tongphun loma la nangli thek-long-lo. Arnam kethe ke mo aphi kopipi plangjima la ethanlo, recho. Nanglimang keheman asonthotsi neli nangliphan nangthanlo lapen la ahok mang atheta nanglithanlo.

⁴⁶Ansi recho Nebukadnejar longle tongparlipbak lo lapen athok-ajir, dan-heihei Daniel aphan pinangji pura hukum-heihei pilo.

⁴⁷Recho pulo, “Nang Arnam ke arnam-heihei kedo-an angbong pen ketheneilo, recho atum ahemphu lapen kepatu-heihei ason kepaklang abang-lo. Ne la chini pima la apotsi nang lahei pajirmi thek-lo.”

⁴⁸Ansi alangli Daniel aphan isi kangtui anghoi bat-lo, lapen adorkeso adan-heihei pilo, lapen Bebilon alongsi ahemphu bat-lo; lapen recho aphan thanpare atum angbong kethenei abang bat-lo.

⁴⁹Daniel kechoningri pen Shadrak, Meshak lapen Abednego aphan recho Bebilon alongri akam an aputhak bat-lo, bonta Daniel, recho kangsai akutsi dobomlo.