Read Karbi DANIEL 3 Bible Online

DANIEL 3 - Karbi bible

DANIEL 3

¹Recho Nebukadnejar Ser akumlin paselamlo, kangtui ingrup 60, lapen arpan ingrup 6 anbak, la Bebilon alongri, Dura pu aklam along alangli parjap-lo.

²Ansi recho saikhi atum, rechoso an, govornor an, govornorkethe an, thanpare atum an, kangsai atum an lapen longri kaprek kepangri atum an aphan kepavangpetji aphan hukum pilo. Halatum recho Nebukadnejar keparjap akumlin kechehodai amei along chetongdun pet nangji.

³Lahei kepangri atum kumlin angno kechehodai jisi karjaphrong ahut,

⁴pherangke abang asekethe pen pachethang-lo, “Det kedo-an arat atum, khei-heihei, lapen kaprek kaprek alam keningje atum!

⁵Nanglitum pong-ut arki arjulongpo, aphithu pongsi-heihei, kumbeleng-chongdeng-heihei, kum-chordeng-heihei, lapen prakso lapen akaprek kedo-an kelun-i ason amung rot dunpo. Kelun-i ason amung kerot kecheng ahut nanglitum kedo-an Nebukadnezzar recho keparjaptang ser akumlin aphan ardomkhrupsi archo nangpo.

⁶Badutame kardom-khrupkhre lapen karchoche abang aphan me angkang arlo phrindutpo.”

⁷Lasonsi halatum lun-kelun-i ason-amung-heihei arki arjulongdet aphi recho Nebukadnejar keparjaptang ser akumlin aphan ardomkhrupsi archolo.

⁸Lasi halabangso ahut mamat ajehak Bebilon asor Judia atum akekroi kepache-ojisi asai rilo.

⁹Halatum recho Nebukadnejar aphan pulo, “Recho achethe ansose padingnang!

¹⁰Recho, nangli hukum pisi pulo lun-kelun-i ason-amung kerot pen mamat bangphutinta ser akumlin aphan ardomkhrupsi archo nangji,

¹¹lapen badutame ardomkhrup-ra archoche pulote me angkang arlo phrindutpo.

¹²Bebilon alongri nangli kebat kam ahemphu ajehak a-Judia Shadrak, Meshak lapen Abednego atum nangli hukum-heihei kroikredet-lo. Halatum nangli arnam aphan archoche lapen nangli keparjaptang akumlin aphan ardom-khrupkhre.”

¹³La amat recho aningthihak-lo, lapen alangli ingno bang kethom amonit pavantoilo.

¹⁴Alangli halatum aphan pulo, “Shadrak, Meshak, lapen Abednego, ne keparjaptang ser akumlin, ne arnam aphan nangtum karchoji lapen kardomkhrupji molo pu ahokma?

¹⁵Lasi non pong-ut-heihei, pongsi-heihei, kumbeleng-chongdeng-heihei, kumbeleng-chordeng-heihei, kum beleng-heihei lapen kaprek kelun-i ason-amung-heihei arki karju long kecheng amat kumlin aphan ardomkhrupsi archo nangji. Jongsi nangtum klemkle pulote nangtum aphan men-men me angkang arlo phrindutpo. Nangtum aphan nangkepajok a-arnam do pu nangtum matha ma?”

¹⁶Shadrak, Meshak lapen Abednego thak-lo, “Recho akehai, netum methang kecheraiji aphan bor-i-elo.

¹⁷Netum kangduk a-Arnam jongsi me angkang pen netum aphan pajok un pulote, Alangli nanglirideng pen ta pajok un.

¹⁸Bonta jongsi alangli pajokje seta, recho akehai, nangli chini iknon, nelitum ke nangli arnam aphan archovekve lapen nangli keparjaptang ser akumlin aphan ardomvekve.”

¹⁹La amat Nebukadnejar aning chekhang un-esi Shadrak, Meshak, lapen Abednego aphan amahang prung-angsi aningthihak-lo. Lasi alangli methang amonit aban aphan hukum pisi aphrang pen apar phan throksi me pasomuchot-lo.

²⁰Lapen alangli ron kechedan atum kangtangnei abangphan hukum pisi bangkethom amonit aphan pangnanghetsi me angkang arlo paphrindut-toilo.

²¹Lasi halatum aphan choi, vamkok, phutup lapen kedo-an ape ari pachingthangsi ingnanghet-lo lapen me angkang arlo halatum aphan phrindut khangjang-lo.

²²Me angkang kethor pathepik nangji pu recho ahukum pasodak apotsi me angkang along kepon abangphu atum aphan me chopondet-lo.

²³Ansi Shadrak, Meshak, lapen Abednego aphan ingnanghet pen me akar angkang arlo angbong paklo-et-lo.

²⁴Nebukadnezzar manghusi men men thurphlut-lo. Alangli methang asaikhi atum aphan arjulo, “Ilitum bangkethom amonit aphan ing-nanghetsi halatum aphan me angkang arlo phrindut-lo kalima?” Halatum thak-lo “Kalang, recho, ilitum la klemlo.”

²⁵Tangte kopi apotsi ne bangphli amonit atum me adang arlo kehelat kethek-long loma? “Alangli arjulo.” “Halatum kangnanghet kali, lapen halatum aphan me kecho angthek thangta ave lapen phli abangphu ke inut Arnam apherangke nangnak.”

²⁶Lasi Nebukadnezzar me akar anghap along damsi hang-lo, “Shadrak! Meshak! Abednego! Kangtuinei Arnam aban atum! Ingtan vangnon!” Lapen menmen amat halatum ingtan nangbarlo.

²⁷Rechoso kedo-an, govornor atum, govornor kethe atum lapen kaprek adet asaikhi recho atum chingrumpetsi me pen kejok bangkethom amonit atum aphan langdamlo. Halatum achu me choche, halatum keche-um ape me choche, lapen halatum abang athak thangnat me angnim ave.

²⁸Recho pulo, “Shadrak, Meshak lapen Abednego a-Arnam hirjume atheng! Alangphan kangduk lapen kechiki amonit atum aphan alangli pherangke nangchetoisi pajok-lo. Halatum nelam-heihei patepek seta halatum amethang a-Arnam apar akaprek a-arnam aphan ardomkhrup-khre lapen archochesi amethang apran chemathathe det-lo.”

²⁹“Lapen non badu akhei amonit setame, kur kaprektame, mate lam prekjamtame Shadrak, Meshak lapen Abednego a-Arnam aphan pinrem lote, halabangphan ari akeng ingsek-ipo, lapen ahem paru-et po. Lason kepajokthek Arnam nahokta ave.”

³⁰Lapen Shadrak, Meshak lapen Abednego aphan Bebilon alongri along kangtui anghoi akam bat-lo.