Read Karbi DANIEL 4 Bible Online

DANIEL 4 - Karbi bible

DANIEL 4

¹Recho Nebukadnezzar det kedo-an arat, khei kedo-an, lapen pirthe adang kaprek kaprek alam keningje atum an aphan lasonsi birta pachethang toilo: Kardom!

²Kangtuinei Arnam neliphan kepaklang manghumeme asin-heihei lapen manghumeme angthek-heihei alam arjutha.

³Arnam ephan kepaklang mang-humeme asin-heihei ko-an akethe! Alangli keklem manghumeme angthek-heihei ko-an pherememe! Arnam ke kaiketa parechover. Alangli kaike seta pangriver.

⁴Ne nemethang ahem rengmesensi dolong-lo, rengdok-rengnilo.

⁵Bonta nemek kejang un ahut isi pherememe amang lapen ahirdojit ning-arjan-heihei thek-long-lo.

⁶Nemang alam lapen athe nepathanjisi Bebilon along kedo recho-thanpare atum ne ingno pavanpetjisi hukum pilo.

⁷Ansi paludep atum, kemoithek atum, thek-kere atum lapen chiklolongso kelakha atum vanpet-lo lapen ne nemang alam thanlo seta halatum nephan thanpajirmi thekthe det-lo.

⁸Ansi Daniel vang-lo. (alangli ke Belteshazar, lake ne arnam amenlo.) Arnam kangthir akarjong alanglilong dolo, lasi nelimang kopima neli alangliphan thanlo. Neli alangliphan pulo:

⁹Kopai alam kethanthek atum angbong akethenei Belteshazar neli chinilo Arnam Kangthir akarjong nanglilong dolo, lapen manghumeme kepatu ason an nangli chinipet. Lahelo nemang. La athe-heihei kopima nethannon.

¹⁰Nemek kejang un ahut eson ning arjan along erong thedung athengpi pirthe angbong ne thek-long-lo.

¹¹La sining anghun leletik thebomlo lapen pirthe asor baduta la thek-longhurlo.

¹²La arvo-heihei langmesen lapen la athe burukseksi pirthe asor aphan pachodorphlup unlo. Laso atebin along marat-mareng api atum sang, labangso aro-heihei along vo atum atar chepatar lapen kereng-et api do-an la athe-heihei cho.

¹³Ne labangso akethek-long aputhak kemathading un ahut, sining pen kecheroktok lapen ketonding Arnam apherangke vang-lo.

¹⁴Alangli asekethe pen pachethang-lo, “Thengpi pipet-ra la aro-heihei ta chor-etnon; arvo-heihei ingphrun non lapen la athe-heihei hijikjamnon. La arum kedo marat api an lapen aro kardon avo atum anta phlung etnon.

¹⁵Tebonseta atengri angtut longle along ingchin lapen tam angchin arri pen la aputhak rak-hetnon. La aphan bap penpen hidi ajo otekangnon.” Non labangso amonit aputhak ar-e paklonang lapen marat api atum lapen thengpi-heihei pen la padorapnang.

¹⁶Pima ningkan throksi alangli monit aning avedetpo, bonta marat api aningsi dopo.

¹⁷Lahelo kecheroktok lapen ketonding Arnam apherangke akephar. La apotsi, monit arecho arat aphuthak Arnam kethe ajakong do pu rat kedo-an atum pachininang lapen alangli ning kehang aling la ingvaisi pidet un, la bihek aphan seta alangli bat un.

¹⁸La helo ne keheman amang-lo, pusi recho Nebukadnejar pulo. “Non Belteshazar, la athe kopima nelithantha. Badu bidi nekepi atum ta nethanthekthe det-lo, seta nang nethan thekji, pima Arnam Kangthir akarjong nanglilong dolo.”

¹⁹Labangso alam pen Daniel mate Belteshazar pu abang mong-loisi thangta ningje thekthedet-lo. Recho alangliphan pulo, “Belteshazar, mang lapen la alam nangphan pamong-loi longri.” Belteshazar thak-lo, “Recho akehai, mang lapen la athe nangliphan kali, bonta nangli hotur atum aphan paplangnang pusi neli ninghangparlo.

²⁰Thengpi arong ingtuipiksi sining pholo, pirthe baduta thek-longpet-lo,

²¹la arvo-heihei langmesen lapen la pirthe asor aphan kepachoji dorphlup athe-heihei do. La arum marat api atum sang, lapen votek-voso atum la aro-heihei along halatum atar-heihei chepatar.”

²²Recho, nangli helo kangtui lapen kangtang athengpi arong-lo. Nangli lapu-an thelo, nangli sining pholo, lapen nangli jakong pirthe adang chethang-phlup-lo.

²³Nangli kelangding un ahut, inut Arnam apherangke sining pen vangsi pulo, “Thengpi pira pakrepdupnon lapen la pavirdetnon, bonta angtut ke longle athak padonang. Ingchin lapen tam-angchin arri pen la koknon, lapen laphan bap penpen hidi ajo otekangnon, lapen sining ar-e labangso amonit aphuthak panghunang, lapen alangli marat api atum pen pen ningkan throksi padonang.”

²⁴La atheke lahelo, recho, lapen lake nangliphan kopi plang poma la kangtangnei Arnam pachethangtang-lo.

²⁵Monit atum angbong pen nangliphan phlungjuipo lapen marat api atum pen donangpo. Hidi adang along ejon achainong alo bap kechopan ason lapen amek kejang asonsi nangli ningkan throksi bap chonangpo, lapen hadak sining ar-e nangli phuthak klopo. Ansi nangli chinipo, Arnam kethe monit arat-heihei pangri, lapen Alangli ning kehang aling abangphan Alangli pidet un.

²⁶Angtut longle athak kepadojisi Arnam apherangke hukum pilo. Labangso athe, ke pirthe athak Arnamsi pangrilo pu chinilote puthot nangli recho cholongthuji.

²⁷La apotsi recho, neli kepare alam arju iktha. Pap klemrinon, kopima keme la klemnon, lapen keduk atum aphan jinsonon. Ansi nangli rengdok-rengni longbompo.

²⁸Lahei recho Nebukadnejar aphan plang-lo.

²⁹Chiklo jonkrehini aphi Bebilon recho ahem asarnung athak kehelatvoi un ahut,

³⁰alangli pulo, “Langtha Bebilon ko-an the loma! Nejakong lapen kangtang, nenong lapen ahir-asang kepaklangjisi ne la det arongsopi-kethe kimlo.”

³¹La angho pen lamthe bardet aphi, sining pen ase vangsi pulo, “Recho Nebukadnejar, Ne kopima kepu arjutha! Nang recho ajakong nang pen non pontang-lo.

³²Monit arat pen nangphan phlung si marat api-heihei pen donangpo, lapen ejon achainong alo bap kecho asonsi ningkan throksi bap chopanpo. Ansi nang chinipo, Arnam kethe monit arat-heihei aphuthak jakong do lapen lahei Alangli ningkehang aling abang aphan pidet un.”

³³Labangso alam chekokdapprang-lo. Nebukadnejar aphan monit arat pen phlungjuilo lapen chainong alo asonsi bap chonang-lo. Ar-e alangli bang aphuthak klolo, lapen vomu arveng keding asonsi alangli chu dinghamlo lapen ari-chimi vo-heihei achimi asonsi ding-lo.

³⁴Ningkan throksi pardet aphi, recho pulo, “Ne sining anat lang-lo, lapen ne bidi nangchevoilo. Ne Arnam kethe aphan chorolo lapen man pilo lapen kaike kedover a-Bang aphan anong pathelo.” Alangli kaike aphan pangripo, lapen Alangli rat kaike seta doverpo.

³⁵Pirthe amonit atum aphan ke Alangli thangta kali; sining apherangke lapen pirthe amonit atum Alangli kepangri abersi do. Baduta Alangli ningkehang akam hili un-e lapen Alangli keklem akam khinde un-e.

³⁶“Ne bidi nang chevang lote, neman nedak, netur, nedet anong nephan nepithupo. Keja atum lapen arlengkethe atum nephan nehangpo, lapen aphrang an sose ne recho ajakong, man nepithudetpo.”

³⁷Lapen non, Ne Nebukadnejar, sining arecho aphan rolo, man pilo, lapen anong pathelo. Alangli keklem ason an chokpet lapen kengset lapen kechepindak akam keklem abangphan Alangli pabihek un.