Read Karbi DANIEL 7 Bible Online

DANIEL 7 - Karbi bible

DANIEL 7

¹Bebilon arecho Belshazzar recho kecho kecheng aningkan, Daniel eson amang hemanlo lahei hongplang athak amek kejang ahut ajo alangli thek-long-lo. Ansi alangli tok-lo lapen lahei helo alangli ajo kethek-long pen ketok duntang alam-heihei.

²Daniel pulo, ajo ne akethek-long amang langtha, konaphli pen tomon vangsi talopi alang adihu pa-thurlo.

³Talopi pen jonphli thedung api nangbarlo, ajontinta prekjam.

⁴Aphrangsi api abang hingho ason, bonta vomu ason avengkongdo. Ne kelangding un ahut aveng-kong-heihei ingsektang-lo. Pi aphan angsong rungtangsi monit ason parjaptherlo. Lapen monit aning angthin la aphan pilo.

⁵Hini api abang thokvam ason aphi akeng pen arjapsom. La aso pen hongthom areptak ing-omlo; lapen ase vangsi la aphan pulo, “Untik an ok chobomnon.”

⁶Neli kelangding un ahut ajon kaprek api nangklang-lo. La bongkrui ason, bonta la anung athak avengkong phli do, vo atum avengkong ason, lapen la aphu phli do. La kelang pen ajakong kedo abang nangnak.

⁷Neli kelangding un ahut phli api abang nangklang-lo. La ajakong thepik, pherememe, paphere thek. La kechoji ason la aso-pi pen ingtip, lapen la aphuthak dong, la anu hongkep do.

⁸Neli anu-heihei kelang-lor ahut, akaprek anu-heihei angbong pen ehong anu vangthulo. La kaprek kedotang hongthom anu ingsek-lo. Labangso anu monit amek-heihei do lapen kechepindak angtur ta do.

⁹Neli kelangding ahut recho anghoi-heihei adim pachedolo. Inut kaike kerengver Abang recho anghoi-heihei angbong isi along ingnilo Alangli pindeng herai asonsi lok-kling lapen Alangli chu, aju kave a-ul mate angmi ason thak thak. Alangli anghoi me ade kekar-ang athak arlulo,

¹⁰La pen isi me alangso nanglilo. Hadak suri suri arat atum Alangliphan kangdukjisi do, lapen Alangli ingno suri pharo an arat atum arjapphrong-lo. Kangsai amei angdeng cheng-lo, lapen loh athui-heihei purlo.

¹¹Neli langdingbom un ahut anuso kehang lapen kechepindak ase arjulong-lo. Neli langcharibom ahut phli api abangphan pathilot-lo, lapen la abang arpum me akar arlo varchorsi pavirdet-lo.

¹²Kaprek api atum ajakongta thijok-lo, bonta halatum aphan isi kepathiktang ang-ang apor ansi pareng-longchot-lo.

¹³Labangso ajo kethek-long ahut, monit arje ason neli thek-long-lo. Alangli nelidung vangbomlo, inghun kompetsi alangli Kaike Kerengver Abang along damlo, lapen alangli angno dolo.

¹⁴Alangliphan rat ajakong, aman, lapen recho ajakong pidet-lo, ansi rat kedo-an, khei kedo-an lapen alam-aki kedo-an atum alangliphan ingdukpo. Alangli rat ajakong doverpo, lapen alangli rat jutjedetpo.

¹⁵Neli kethek-long ason-heihei neliphan pathirik-lo, lapen neliphan padonodak-lo.

¹⁶Hadak karjap-phrong atum angbong inut along damlo lapen neli kepathanjisi alangliphan la do-an arjulo. Lasi alangli laso athe nelithanlo.

¹⁷Alangli pulo, “La pi jonphli ke pirthe pen kethurji adet atumlo.

¹⁸Lapen Arnam kethe arat atum recho ajakong longji lapen kaike aphan la biverpo.”

¹⁹Ansi phli api alam kechinijisi nelining hangparlo, lake kaprek api atum pen prekjam-pherememe api, kechoji ason tam lapen ingchin aso-heihei pen korrup-rup lapen halahei athak dong.

²⁰Lapen la aphu along kedo anu hongkep alam lapen aphi kevang anu alam hongthom aphan pakrep-lo, la amek-heihei lapen angho do lapen chepindakpik. Lake api kaprek atum aphan pente la pherememe-o khangjang.

²¹Neli kelangbom un ahut halaso anu Arnam arat pen ron chedan lo lapen halatum aphan haidet-lo.

²²Ansi kaike kerengver Abang vang-lo lapen Arnam Kethe arat abesi kangsai pathirlo. Arnam arat atum recho ajakong kedeng apor vangtang-lo.

²³La helo neli kepitang alamjir: “Phli api ke phli adet pirthe athak keplangji adet lapen kaprek adet pen prekviji. La pirthe kedo-an bengrup-rup po lapen la athak donglampo.

²⁴Hongkep anu-ke bangkep arecho atum halaso adet pangripo. Ansi anut kaprek arecho nangklangpo, la aphrang abang pen prekpikji lapen bang kethom arecho aphan pavedetpo.

²⁵Alangli Arnam Kethe abe thursi ningjepo lapen Arnam arat aphan chenekpo. Halatum dhorom aron-heihei lapen rong-aje-heihei kelarjisi bor-ipo, lapen Arnam arat atum ningkan kethom-ra ebeng an la abersi donangpo.

²⁶Ansi sining akangsai kedojisi ingnipo lapen la ajakong endetpo lapen la aphan pavirdet khangjangpo.

²⁷Pirthe det ajakong do-an lapen akethe do-an Arnam Kethe arat aphansi pidetpo. Halatum recho ajakong kaita jutjedet po lapen pirthe do-an kepangri atum halatum aphan ingdukpo lapen kroipo.”

²⁸La an helo ketok kepajutdam alam.