Read Karbi DANIEL 8 Bible Online

DANIEL 8 - Karbi bible

DANIEL 8

¹Belshazzar kethom aningkan recho kecho ahut neli hini aphong kethek-long dolo.

²Nelimang neli Elam alongri Susa arongsopisi kedo men men chethek-long-lo. Ulai aroi alongsi neli karjap.

³Hadak langroi akung ejon abiresak alo anu hongni akedingpi thek-long-lo, ehong abang kaprek anu aphan dingchot lapen memuchot.

⁴Neli lang-lo biresak alo Nichi, Nirep lapen Nitur anat ketongjisi ingplong-lo. Badu api seta laphan khang un-e mate la ajakong pen jok un-e. La aningkehang alingsi klemlo lapen ane thebomlo.

⁵La athe kopima pu neli kemong-loi ahut, ejon abipo Nichi anat pen nang-ingplong-lo, la pu-an akeprap akeng longle phorelo. La amek hini angbong isi thedung anu do.

⁶La neli kethek-long langroi akung karjap abiresak anat vangsusulo, lapen laphan jakong do-an pen ingplong-lo.

⁷Biresak aphan ketengkheng neli thek-long-lo. La pu-an aningthilo, la aphan tongsi anuhini palok-lo. Biresak ke kechedanji ajakong avedet-lo. Laphan longle paklibup-lo lapen dong-lo, lapen laphan keraiji baduta avedet-lo.

⁸Bipo ane theponbomlo, bonta la ajakong kangtuibom un ahut, la anu ching-lokpong-lo. Laso anu adim keklangdong anu hongphli chevang-thulo, seta asitinta ahin kaprek kaprek anatsi anu chejarlo.

⁹Anu hongphli angbong ehong bihek anuso thebomlo, la nitur anat lapen nihang anat lapen kechaktang alongle anat ajakong chephajeng-lo.

¹⁰La pu-an ingtang-lo, sining lapen chiklolongso amuluk atum aphan anta ketengkhengji ajakong dolo, lapen halahei ajehak aphan varsi longle paklolo lapen halatum athak dong-lo.

¹¹La sining amuluk arecho aphan langremlo arnivang alangliphan kepajir akethok-heihei khamkhe dunlo, lapen kardomhem kangthir phangnolo.

¹²Hadak rat atum arnivang kepajir nangji athok pipesi pap klemlo, lapen ahok adhorom longle varchorlo. La anu keklem ason anta chunlo.

¹³Ansi ne pherangke atum lahin lahin kecharju arjulong-lo, “Ni ko-ansi labangso akethek-long plangbom poma? Ni ko-ansi arnivang kepajir athok-heihei adim pap dobom jilangma? Ni ko-ansi sining amuluk lapen kardom hemthepi aputhak padolongbomjima?”

¹⁴Kaprek apherangke abang ke-thak ne arjulong-lo, “La ni 1150 an doji, laso ahut arnikangsam lapen adap athok kepajir avedetpo. Ansi Kardomhemthepi ingthurthupo.”

¹⁵Neli kethek-long athe alam kechiniji kebor-i un ahut menmen neli ingno inut amonit arjapding-lo.

¹⁶Ulai Aroi pen ase neli arju long-lo, “Gabriel, la kethek-long ason athe pachininon.”

¹⁷Gabriel vangsi nelidung arjap-lo, lapen neli pherepiksi longle athak iparlip bak-lo. Alangli neliphan pulo, “Monit aso, athe chininon. Kethek-long ason ke pirthe kejut ahut alamsi kepudamlo.”

¹⁸Alangli keningjebom un ahut neli longle athak krepbupsi cheputhekthedet-lo. Tebonseta alangli neliphan otsi ingthurlo,

¹⁹lapen pulo, “Arnam aningkethi ale kopijima ne nangpaklang-lo. Nangli kethek-long ke kejut apor alamlo.”

²⁰Nangli kethek-long anu hongni kedo abiresak alo ke Media lapen parsi adet arecholo.

²¹Bipo ke Grik adet arecholo, lapen amek hini adak kedo keklangdong anu-ke la kechengsi arecholo.

²²Ehong anu lokdet aphi kevangthu hongphli anu-ke kechephlak nangji det phli-lo lapen kecheng adet ason lahei ingtang-o-edetpo.

²³Halahei adet kejutji dok-dokpo ahut halatum lapu-an ajat kelangnoji halatum aduk-kepho nangji avi doji, hadak lam karjuje, kelang un-e, lapen chobei arecho doji.

²⁴La ingtangbomji-bonta amethang ajakong pen kali. La kepherememe akevir vangji lapen la keklem ason an chun etji. Monit kangtangnei aphuthak la kevir vangji lapen Arnam methang arat aphuthakta vangji.

²⁵Pima la reset, la kechobei atovar-heihei pen kam pachunji. La amethang ajok chepindakji lapen pacheretoite pin pen ongdung arat aphan pavirji. La recho kedo-an pen akethe aphan seta pinremji, bonta monit ajakong pen rimrepinsi labangso aphan pavirdetpo.

²⁶Nangkethek-long, nangkethantang arnikangsam lapen adap athok-heihei alam chekokvekji. Bonta non la ning chebijoinon, pima la kechekokji aphrang la apor dingmuchot dojilang.

²⁷Nelining runlo, lapen penang an arni sodet-lo. Ansi neli thurlo, lapen recho nepaklemtoi akam keklemjisi damlo, bonta neli kethek-long pen ajok mong-loisi la chini thekthe det-lo.