Read Karbi HOSEA 1 Bible Online

HOSEA 1 - Karbi bible

HOSEA 1

¹Judah arecho Uzziah, Jotham, Ahaz, lapen Hezekiah arni ahut, lapen Israel arecho Jeroboam, la Joash asopo, arni ahut, Beeri asopo Hosea along HEMPHU alam vang-lo.

²Hosea pen HEMPHU keningjecheng ahut, Hosea aphan HEMPHU pulo, “Damra nangmethang aphan akhat-kave arloso piso ennon lapen akhat kave asomar atum ennon, pima HEMPHU aphan ke-o pen ajok det akhat kavepik akam klemlo.”

³Lasi alangli damlo lapen Dib-laim asopi Gomer aphan piso, enlo lapen labangpi aso chopathelo lapen alangli phan sopinso inut amahang pathekpilo.

⁴Lapen HEMPHU alangliphan pulo, “Jezreel, pule la amen hangnon; pima malomso aphi Ne Jezreel avi apot Jehu ahem-asangho aphuthak aduk-pipo.

⁵Lapen halabangso arni, Jezreel arlok along Ne Israel athai ingdipet po.

⁶Labangpi puthot so chopathelo, lapen asopi inut mahang pathek-lo. Lapen HEMPHU alangliphan pulo, ‘La amen Jinsose pule irnon, pima Ne Israel akhei aphan latum kediya detji aphan jinsose pinpo.

⁷Bonta Judah akhei aputhaksi Ne jinsochotpo, lapen HEMPHU latum a-Arnam pen ajok Ne latum aphan thai pen kali; ron pen kali, losei-heihei pen kali, losei kardon atum aphanta pajokje.’”

⁸Jinsose aphan labangpi mok kechu pa-osi, labangpi so chopathelo lapen sopinso inut mahang pathek-lo.

⁹Lapen HEMPHU pulo, “Nerat kali, pule amen irnon, pima nang Nerat aso kali lapen Ne nang Arnam kalilo.”

¹⁰Tebonseta Israel arat aphai talo asangti ason thakthak plangpo, la pun un-e detpo; lapen lakha un-edetpo; lapen latum aphan nangtum Nerat kali, pu kepu adim amat latum aphan “Nangtum kereng Arnam asomar” pusi pudetpo.

¹¹Lapen Judah arat lapen Israel arat pangrum rappetpo, lapen latum amethang aphan inut akethe chebatpo, lapen latum det pen arlupo, pima Jezreel arni kethe plangpo.