Read Karbi HOSEA 10 Bible Online

HOSEA 10 - Karbi bible

HOSEA 10

¹Israel arat ke aro kechanpik athe kepathe-o arikang asonlo. Ko-anma latum kechingthur, la-ansi latum dovan builo. Latum alongle pen ko-an athe long-loma la-ansi latum lang mesen akarchoji aphan arlong kangthir anujok latum elo.

²Aning pacherei thekser arat latum non apap-heihei apot kesung chechak nangpo Arnam latum adovan-heihei beng petpet po, lapen kangthir anujok-heihei phangnopo.

³Halabangso arat atum pu dapprangpo, “Etum arecho avelo, pima etum HEMPHU aphan phereredet-lo. Jat seta recho inut etum aphan kopi klemthek poma?”

⁴Latum pasimu lapen semelangdang tang lapen alekave alam-heihei chechak. Ahok-akangsai lake hai kebai ahidi ajo bikar abap kethur asonsi ahok-he akangsai plang-lo.

⁵Samaria arongsopi kedo arat atum pherepo lapen Bethel along kangbo ser achainong-alo apot ningripo. Latum lapen kumlin aphan kangduk akurusar atum anta la apot chirupo. Lapen ahir-asang keprat ahut latum chiru charnappo.

⁶Assiria adet kumlin pondetsi recho kethe aphan nong-e plangpo. Israel aphan langrempo lapen patherakpo, pima la bang kepare alam enlo.

⁷La arecho aphan karjangtang athengpi abeng lang kepon asonthot pondetpo.

⁸Israel atum kumlin-heihei karcho adim Aven anglong kangtui anta pavirdetpo Latum adovan-heihei athak ingsu lapen bap-heihei si thurpo. Rat atum inglong aphan hangpo, “Ne patutha!” lapen inglongso aphan pupo, “Nediptha!”

⁹HEMPHU pulo, “Israel arat atum Gibeah ahut pen latum apap Nephan keklem o-elang, lasi Gibeah along ron si latum aphan neppo.

¹⁰Nesi la papi arat aphan tengkhengpo , lapen adukpipo. Det-heihei latum abe thurpo, lapen latum ongdung apap-heihei apot aduk pidetpo.”

¹¹“Ihut isi Israel ke anem ke-entang achainong api ason, chesikding lapen sok kesiji aninghang. Bonta Ne la aphan kam kesung kepaphojisi kelang mesen achethok arthang batpo, Judah aphan Ne hai pabaipo lapen Jakob adet mui vung nangji.”

¹²Ne pulo, “Nangmethang aphan longle kemile bainon, akechok-lim le e-non, lapen ahirjume-heiheile rotnon anke nangtum Nephan kardom athe longpo. Ne nang Arnam along nangtum kecherui nangji apot-lo, lapen Ne vangsi nangtum aphuthak hirjume-heihei nangdungpo.”

¹³Bonta nangtum kehingnosi elo, lapen la si rot-long-lo. Nangtum kepachorei athe checholong-lo. “Pima nangtum methang ron kechedan alosei ahemkonglong -heihei lapen ake-ong aron aso aphuthak chikilo.

¹⁴Nang rat aphuthak ron vangpo, lapen kedo-an rong apaisong virdetpo, lake recho Shalman Betharbel arongsopi ron pen kepavir arni asonpo, lapen apei atum lapen latum asomar an sorlam-lam si thinangpo.

¹⁵Lasonthotsi nangtum aphuthak plangpo Bethel arat, pima nang kepherememe kehingno akam keklem apot Ron kecheng amat Israel arecho thinangpo.”