Read Karbi HOSEA 12 Bible Online

HOSEA 12 - Karbi bible

HOSEA 12

¹Adap pen arnikangsam an Israel keklem asontin alekave lapen kevir akam klemlo. Kepachobei lapen kephangno akam latum angbong batbom. Latum Assiria pen lam chechakpo lapen Ijip pen beha klempo.

²Judah aphuthak HEMPHU ithe kebokji asondo, Israel arat atum keklem apot Alangli la aphuthak aduk kepiji dolang. Latum kechoklemtap ale Alangli pithuvekji.

³Latum aphusar Jakob aso cherop a-ik Iso pen latum apei apok arlo kedo ahut bor-ilo; Jakob thesi la Arnam abe thursi chedanlo.

⁴Alangli Arnam apherangke pen chedansi haidet-lo. Alangli chirusi isi ahirjume chohang-lo. Lapen Bethel along aphusar Jakob along Arnam vang-lo, Lapen alangli pen chingkilo.

⁵Lahelo HEMPHU Arnam kethe, HEMPHU helo alangliphan karcho nangji amen.

⁶Lasi non Jakob aso-asu nang Arnam aphan chikinon lapen la along chiruinon kechingdukji lapen ahokpet, lapen nang Arnam kepaklemjile ningkeding pen chonghongdingnon.

⁷HEMPHU pulo, “Israel arat ke Kanan asor ason athik ave; Latum kenam abangphu aphan chobei alin-heihei pen kechobeijisi aninghang-lo.

⁸‘Netum plang-o,’ latum pu, ‘Netum akopai chesilamlo.’ lapen baduta athikthe pen keplang apot etum aphan ebok un-e.

⁹Bonta Ne HEMPHU nang Arnam Ijip adet pen nangkevan abang, Ne puthot nangtum aphan pe hem padothutoiji, hako kejejangtang ajo Ne nangtum along kevang ahut ason.”

¹⁰“Ne montri atum aphan ningjelo, lapen latum aphan ongdung akethek-longta pilo, lapen montri atum pen ajok Ne rat aphan pacherelo.

¹¹Seta Gilead along kumlin aphan archolo lapen hala karcho atum an thiji. Chainong alo Gilgal along thulo, lapen dovan-heihei hidi mek-lan-heihei along arlong abui cheplangji.”

¹²Etum aphusar Jakobta Mesopotamia anat kat nang-lo, hadak piso kelongji aphan alangli anut kaprek abiresak ora pinang-lo.

¹³HEMPHU Israel arat Ijip adet along ban pen kejokji aphan lapen kelanajisi latum aphan montri inut toilo.

¹⁴Israel arat HEMPHU aphan aning pathipik khangjang-lo; latum kehingno apot latum thivek nangji. Alangli phuthak latum kelangrem apot HEMPHU latum aphan adukpipo.