Read Karbi HOSEA 2 Bible Online

HOSEA 2 - Karbi bible

HOSEA 2

¹Nangkorte atum aphan “Ne rat” lapen ne ingjir aphan “Kangjinso longtang-lo” pura punon.

²“Nangtum apei pen lam chedannon, chedannon, pima la ne piso kali, lapen ne bangpi apenan kali- anke bangpi angno pen la akhat kave, lapen la amok-heihei angbong pen bangpi abang kechojor la che-opo;

³Kalite ne la ape phlok-etsi lapen amahang kethek arni ason thak-thaksi areng angse pinchongpo, lapen kejejangtang ajo benban ason la pinchongpo, lapen tirimrai alongle ben ban ason la bi po, lapen lang kang-it pen la pathipo.

⁴La asomar aphuthak ne ingjinsose-detpo, athe latum akhat-kave asomarlo.

⁵Pima latum apei akhat kave akam klemlo; latum aphan amahang pathek abang therak akam klemlo.” Pima la pulo, “nephan aning kehang atum nephan ne him lapen ne lang, nepekar-om, linen ape, nejangthu lapen ne kejunji ason nekepi abang aphi phi ne dunkripo.”

⁶La apotsi ne la atovar ingsu-heihei pen bengthip-po; lapen la abe thursi ne paisong isi kimpo lasi la atovar-heihei chelongledetpo.

⁷Laphan aningkehang atum aphi phi la dunpo, bonta latum along phodundedetpo lapen la halatum aphan ripo, bonta longledetpo. Ansi la pupo, “ne dampo lapen aphrangsi nepenan along chevoithupo, pima non aphan mute aphrang ahut nephan memu.”

⁸Lapen nesi laphan sok-sang, drakha alang, lapen jangthu kepi abang-lo pu lapen Baal aphan latum ke-en arup lapen aserta nesi kepa-ong abang-lo pu labangpi chininedet-lo.

⁹La apotsi la apor ahut ne sok-sang, lapen drakha alang la asek ahut ne che-enthudetpo; lapen laphan areng angse kedip-i nepekar-om lapen ne linen ape ne che-enthudetpo.

¹⁰Non ne labangpi aningkehang atum amek angden avi-kave dipdedetpo, lapen nerideng pen baduta laphan pajokjedetpo.

¹¹Lapen ne la kechehok ason an, la kecho-kejun amei-heihei la chiklo kemi-heihei, la kesang arni-heihei lapen la kedo-an kethiktang kecho-kejun amei-heihei pavedetpo.

¹²Lapen la drakha arikang-heihei lapen thebo arong-heiheita pavedetpo, lahei aphan la pulo, “Lahei hei ne long-lo, lake nephan aningkehang atum nepitekang-lo.” Ne halahei aphan isi, a-ingnam pinchongpo, lapen nampi api atum lahei cho-etpo.

¹³Lapen labangpi Baal atum achojun arni an latum aphan mephik kethor ahut Ne laphan aduk pipo; lapen la a-arnam lapen alek-aroi pen alon chepadosi lapen laphan aningkehang atum aphi duntang-lo lapen Nephan tengnetang-lo, pu HEMPHU pulo.

¹⁴“La apotsi chininon, Ne la aning vungpo, lapen kejejangtang ajo vandetpo lapen lamdok pen laphan ningjepo.

¹⁵Lapen hadak laphan la adrakha aberi-heihei pipo. Lapen Achor a-arlok ningkethe anghap paplangpo. lapen hadak la a-okarjang ahut lapen la Ijip adet pen kevan ahut ason thak thakpo.”

¹⁶Lapen halabangso arni, HEMPHU-si pulo, nang Nephan nehangpo, “Nepe-nan,” lapen Nephan “ne Baal” puke kaita hanghelo.

¹⁷Pima Ne bangpi aphan Baal atum amen paningje longledetpo, lapen latum mononphi seta amen parnonedetpo.

¹⁸Lapen Ne halabangso arni latum aphan isi kechejok aloh ingnam api atum, sining kangjar avo, lapen longle athak keklimjam api atum pen chepathikpo; lapen Nedet angbong pen thai, nokjir, lapen ron, Ne pavedetpo; lapen Ne nangphan jokvan pen nangpa-i longpo.

¹⁹Lapen kaike aphan Ne methang nangphan kepangriji alam pathikpo; Ne methangsi akechokpet lapen ahok-akangsai, larlepin akanghon, lapen akangjinso pen nangphan kepangriji alam pathikpo.

²⁰Ne kekroithirklong pen Ne methangsi nangphan kepangriji alam pathikpo; lapen nang HEMPHU aphan chinipo.

²¹Lapen halabangso arni, HEMPHU-si pulo, “Ne sining-heihei aphan thakpo lapen halatum pirthe aphan thakpo;

²²Lapen pirthe sok-sang, drakha alang, lapen jangthu aphan thakpo, lapen halatum Jez-reel aphanta thakpo,

²³Lapen Ne methang aphan det angbong la rikpo. Lapen jinsose aphan Ne jinsopo, lapen Nerat kali aphan pupo, ‘Nang Nerat-lo’; lapen la pupo, ‘Nangli ne Arnam.’ ”